15
No Kanta ni Moyses
1 Sinpangan na, kinanta da Moyses kan Israelita saw nyaya kanta a pagdāyaw di ĀPO:
“Kantaan ko si ĀPO, ta sidadāyaw a nangābak.
Siraw kabalyo kan kabalyiro, intapwak na sa do tāw.
2 Si ĀPO, ayit ko kan kantaan ko,* 15:2 Mana “Si ĀPO, mabīleg a mangisakit dyaken”.
kan iyaw nangisalākan dyaken.
Iya, ki Dyos ko kan idaydāyaw ko.
Iya, ki Dyos ni āmang ko kan patohosen ko.
3 Si ĀPO, ki taga-gobat.
Si ĀPO, ngaran na.
4 “Logan saw a pachigobat ni Paraon kan bōyot na saw,
ki intapwak na sa do irahem no tāw.
Siraw kagaganayanaw a opisyalis ni Paraon,
ki nahmes sa do Mabaya a Tāw.
5 Pinonan sa no marahem a tāw,
kan minned sa do kensad naw a akmay bato.
6 “No kanawan a tanoro mom ĀPO, matan-ok do bīleg.
On, iyaw kanawan a tanoro mo, hinomek naw kabōsor.
7 Maynamot do kabīleg a tan-ok mo,
rinārayaw mo saw nachikontra dyimo.
Pinabtak mo taywara a soli mo a
napasdeb sira a akmay garami.
8 Do kayit no alop no anges no momodan mo,
nachidyindyin no tāwaw.
No magpapalot a kelsang, ki nachahad.
No kensad no tāw, ki naypatwa.
9 “Naykawakawag iyaw kabōsor a kāna,
‘Lakatan ko sanchi. Adasen ko sanchi.
Paycharwahen konchiw samsamen ko,
as apneken konchiw chakey ko a yapo dyira.
Asoten konchiw ispāda ko,
kan rārayawen sanchi no tanoro ko.’
10 Ki inalopan mod anges mo, kan pinonan sa no tāw.
Minned sa a akmaw boli do kadimoken no tāw.
11 “Sino dyirad dyos sayaw akma dyimo mo ĀPO?
Sino kapariho mo do matan-okaya a kasanto mo?
Sino makapamarin so mabīleg kan makaskasdāaw?
12 Inlāyat mo kanawan a tanoro mo,
kan hinamon no tanaw kabōsor namen.
13 “Indaōlo mod dya madyiwadyiway a adaw mo,
siraw tawotawo saw a sinobbot mo.
Do ayit mo, pinalongo mo sa
do masantwan a yanan mo.
14 Nadngey dan nasnasyon, kan naychakābot sa.
Pinolipolan sa no amak Pilisteo saw.
15 Taywara a mamo saw pangpangōlo saw do Edom,
kan maychamirpirpir saw magtotoray saw do Moab.
Siraw tabo omyan do Kanaan, ki arabaw tored da.
16 Makamwamomo kan kapaychakābot, magtopak dyira.
Do panakabalin tachay mo, dinitā da akmay bato a
nandad nakahabas sira no tawotawo mo, mo ĀPO a
siraw tawo mwaya a sinobbot mo.
17 Yangay mo sanchi a patneken do tokon a dyira mo.
On, mo ĀPO, do pinarin mo a pagyanan mo a
pagdayāwan a pinatnek mo do tanoro mo, mo ĀPO.
18 Imom ĀPO, magāri a nāw na a abos pandan.”
No Kanta ni Miriam
19 Do nakasdep daw do tāw no kabalyo saw ni Paraon, logan na saw kan siraw kabalyiro naw, pinabidi ni ĀPO tāwaw a pinapon dyira. Ki siraw Israelita saw nanakey sa a nagkelsat do tāwaw do mabkoh a tana. 20 Sinpangan na, nanghap si propīta Miriam a kakteh ni Aaron so tamborin, kan inonotan da tabo no mababakes saw a konso tamborin kan tomnāda sa. 21 Kinanta ni Miriam dyiraw nyaya:
“Kantaan nyo si ĀPO, ta sidadāyaw a nangābak.
Kabalyo kan kabalyiro, intapwak na sa do tāw.”
No Makpad a Ranom
22 Sinpangan na, inpangōlwan sa ni Moyses Israelitaw a yapo do Mabaya a Tāw, kan kominwan sa do let-ang a mayngaran so Sor. Do tatdo a karaw a nakapanakey da do let-ang, ki abaw nachichwasan da ranom. 23 Do nakapakarapit daw do panghapan daw so ranom do Marah, maynom dabaw ranomaw daw, ta makpad. Nyaw naynamotan na napangaranan nawri a logar so Marah. 24 Ki do dāwri, naydabadabay saw tawotawowaw a maikontra di Moyses, kan binata da a kon da, “Āngo inomen ta?” 25 Dawa, tomnanyis si Moyses di ĀPO, kan inpaboya dya ni ĀPO asaw a kakteb no kayo. Pinagsid ni Moyses kayowaw do ranomaw, kan nayparin dana maīmas so taham.
Do dawri a yanan, namarin si ĀPO so pangeddeng kan linteg na dyirad Israelita saw, as kan dawriw nangsoōtan na sira. 26 Binata na a kāna, “An kadngeyen nyo a maganay tīmek ni ĀPO a Dyos nyo, as kan parinen nyo malinteg do salapen na, kan an adngeyen nyo saw bilin na, as kapyahen nyo tabo saw a inkeddeng na, paganyiten ko abanchi inyo so akmas pinarin kwaw dyirad taga Egipto saw, ta yaken si ĀPO a mapapya dyinyo.”
27 Sinpangan na, nakarapit sa do Elim a yanan asa poho kan dadwa a akbod kan papito a poho a palma a kayo, as kan nagkampo sa do masngenaw do ranomaw.