1 Sinpangan na, binata ni ĀPO di Moyses a kāna, “Chiban mo, payparinen konchimo a akmay Dyos di Paraon, as kan si Aaron a ākang mo, ki pinakadangoy mo a akmay propīta mo. 2 Ibahey mo tabo ibilin ko dyimo, as kan si Aaron a ākang mo, ki mangibahey di Paraon a palobōsan na saw Israelita saw a komaro do nasyon naya. 3 Ki patwahen konchiw pōso ni Paraon, as kan aran paypaypārohen ko saw pangilasīnan kan maskaskasdāaw do Egipto, 4 adngeyen nabanchi inyo. Do dāwri, do panakabalin ko, mangitopak akonchi so makamwamomo a dōsa dyirad taga Egipto saw, kan ikaro ko sanchiw Israelita saw do tana a Egipto sigon do trībo da.” 5 Matonngan danchi no taga Egipto saw a yaken si ĀPO anchan iwāyat ko panakabalin ko a dosāen ko sa kan ikaro ko saw Israelitaw dyira.

6 Do dāwri, pinarin da Moyses kan Aaron akmas inbilinaw ni ĀPO dyira. 7 Si Moyses, ki wawaho a poho tawen na do dāwri. As si Aaron, ki wawaho a poho kan tatdo do nakapachisarīta daw di Paraon.

8 Binata ni ĀPO da Moyses kan Aaron a kāna, 9 “Anchan batahen ni Paraon dyinyo a mamarin kamos milagro, ibahey monchi di Aaron, ‘Hapen mo sarokod mwaya, as pagtosen mo do salapenaya ni Paraon,’ kan mayparin anchi a kobra.”

10 Dawa, nangay sa Moyses kan Aaron di Paraon, kan pinarin daw akmas naibilinaw dyira ni ĀPO. Pinagtos ni Aaron iyaw sarokod naw do salapen daw da Paraon kan siraw opisyalis na saw, as kan nayparin a kobra. 11 Do dāwri, pinatawag sa ni Paraon mamasīrib saw kan siraw manolib na saw a siraw magmadmādyikaw* 7:11 2 Tim 3:8 do Egpito, as kan maynamot do madyik da, tinōlad daw pinarinaw ni Aaron. 12 Katakatayisa dyiraw, napagtos so sarokod na kan nayparin sa a kobra. Ki iyaw sarokodaw ni Aaron, ki hinamon naw sarokod da saw. 13 Aran komwan, alit na matwaw pōso ni Paraon, kan inadngey na saba sa Moyses kan Aaron akmas binataw ni ĀPO.

14 Sinpangan na, binata ni ĀPO di Moyses a kāna, “Matwayaw pōso ni Paraon. Palobōsan na sabayaw tawotawo a komaro. 15 Mangay kanchi di Paraon anchan mabekas, anchan mosbos do oksongaw a Nile. Panayahen monchi do payis naw, as kan panawbi monchiw sarokodaw a nayparin a kobra. 16 Do dāwri, ibahey mo dya a kon mo, ‘Si ĀPO a Dyos dan Hebreo, tinoboy na yaken a mangibahey dyimo a kāna, “Palobōsan mo sa komaro tawotawo kwaya tan maidāyaw da yaken do let-ang. Ki manda sichangori, arim pa yaken a dya inkaskāso.” 17 Nyaw bata ni ĀPO a kāna, “Maynamot do dyaya, matonngan monchi a yaken si ĀPO. Do dyaya sarokod a myan do tanoro ko, ibāot ko do oksongaya a Nile, kan mayparin anchi a raya. 18 Siranchiw among do dyaya oksong a Nile, ki madiman sanchi, as kan mangot anchiw oksongaya. Maparin da pabanchi no taga Egipto saya a inomen ranom naya.” ’ ”

19 Binata pa ni ĀPO di Moyses a kāna, “Ibahey mo di Aaron a kon mo, ‘Hapen mo a igpet sarokod mwaya, kan ilāyat mo do hapotayan ranom saya do Egipto. On, ilāyat mo sarokod mwaya do ok-oksong saya, kanal saya, ahbeng saya, kan tabo līnaw tan mayparin sanchi a raya. Maynana anchi a raya do intīro a tana no Egipto, aran do poranom saya a kayo kan do bato saya a angang da.’ ”

20 Tinongpal da Moyses kan Aaron akmas inbilinaw ni ĀPO. Inlāyat ni Aaron sarokod naw do salapen daw da Paraon kan siraw opisyalis naw, as nakaibāot na sya do ranomaw do oksong a Nile, as kan tabo ranomaw do oksongaw, ki nayparin a raya. 21 Siraw among saw do Nile, ki nadiman sa. Iyaw oksongaw, ki taywaras kangot a nawriw dyi darana kaynoman sya no taga Egipto saw a yapo do oksongaw. Maynana raya do intīro a Egipto.

22 Ki siraw magmadmādyikaw a taga Egipto,‡ 7:22 Siraw magmadmādyik, ki mairāman saw mangarobōob saw. Eks. 7:11 ki pinarin da met komwan a yapo do madyik da. Dawa, nāw na matwaw pōso ni Paraon, kan inadngey na saba sa Moyses kan Aaron a akmas binataw ni ĀPO. 23 Basbāli a somnabat si Paraon do palasyo naw, kan akmay abo dyaw nawri a naparin. 24 Ki sira tabo taga Egipto saw, ki naychadi sa do payisaw no oksong a Nile tan manghap sa so inomen da maynamot ta maynom da pabaw ranomaw do oksongaw.

25 Papito a karaw homnabas do nakatayokaw no pinarinaw ni ĀPO do oksong.