1 Asa karaw, do kayan naw ni Moyses a mangay-aywan siras binyay saw ni Jetro a katogāngan na a iyaw pādyaw do Midyan, inikwan na saw binyay saw do matengaw do bīt no let-ang. Nakarapit do Horeb* 3:1 Mana “Tokon a Sinai”. a iyaw tokonaw ni Āpo Dyos. 2 Do dāwri, nagparang dyaw anghilaw ni ĀPO† 3:2 Do Hebreo a chirin, iyaw ngaran a ĀPO, ki “Yahweh.” Eks. 6:2-8 do somdesdeb a apoy a yapo do hobokaw no dēkey a kayo. Chiniban ni Moyses dēkeyaw a kayo, ki aran somdesdeb, ki marōnot aba. 3 Myan naynamotan na a iniktokto na a kāna, “Oy! Āngo ta dya marōnot dēkeyaya a kayo? Yangay ko pa chiban makaskasdāawaya.”

4 Do nakaboyaw sya ni ĀPO a maypaypasngen si Moyses tan chiban na, tinawagan ni ĀPO a yapo do hobokaw no dēkey a kayo, kan binata na kāna, “Moyses! Moyses!”

Ki initbay ni Moyses a kāna, “Cha kwaya dya.”

5 Binata no Dyos a kāna, “Makasngen kaba. Bahasen mo tokap mwaya, ta iyaw yananaya payteytēnekan mo, ki masantwan a tana.” 6 Binata na pa a kāna, “Yaken Dyos da no kapoonan mo a iyaw Dyos ni Abraham, iyaw Dyos ni Isaak, kan iyaw Dyos ni Jakob.” Ki intayo ni Moyses rōpa na, ta chamo na chiban si Āpo Dyos.

7 Binata pa ni ĀPO a kāna, “Naboya ko kalidyatan dan tawotawo kwaw do Egipto, kan nadngey ko katanyitanyis daw a maynamot dyirad taga-mandar da saw a nangadīpenaya sira, as kan nadidiw ko kalidyalidyat daya. 8 As dawa, gominchin ako tan isalākan ko sa do tanoro dan taga Egipto saya, kan yangay ko sa ikaro do dawri a tana, as kan ikwan ko sa do maganay kan marahawa a tana, tana a mataba kan maasi.‡ 3:8Do Hebreo a chirin, ki “tana a mangyoyog so gatas kan tagapolot no yokan”. Iyaw nyaya tanaw yanan dan Kananeo, Heteo, Amoreo, Pereseo, Hibeo, kan Jeboseo. 9 On, iyaw katanyis dan Israelita saya, ki nakarapit dana dyaken, as kan naboya ko an maypāngo iyaw kalidyalidyat da sira no taga Egipto saya. 10 Dawa, sichangori, toboyen koymo di Paraon tan yangay mo sa ikaro tawotawo ko saw a Israelita do Egipto.”

11 Ki binata ni Moyses di Āpo Dyos a kāna, “Sino ako kono a mangay di Paraon, kan yangay ko sa ikaro Israelitaw do Egipto?”

12 Tinbay ni Āpo Dyos a kāna, “Na, myan ako dyimo. Iyanchiw nyaw pakaboyan dyimo a yaken nanoboy dyimo: Anchan ikaro mo saw tawotawowaw do Egipto, idāyaw nyonchi a tabo yaken a Dyos do dyaya a tokon.”

13 Initbay ni Moyses di Āpo Dyos a kāna, “Na, an mangay ako dyirad Israelita saya kan batahen ko dyira a, ‘Iyaw Dyos daw no kapoonan nyo saw, ki tinoboy naw yaken dyinyo,’ as kan iyahes da dyaken a kon da, ‘Āngo ngaran na?’ Āngo itbay ko dyira?”

14 Ki binata ni Āpo Dyos di Moyses a kāna, “YAKEN, ki YAKEN. Iyanchiw nyaw ibahey mo dyirad Israelita saya: ‘Iyaw mayngaran so YAKEN, ki iyaw nanoboy dyaken dyinyo.’ ”

15 Tinongtong ni Āpo Dyos a binata di Moyses a kāna, “Ibahey mo pa dyirad Israelita saya a kon mo, ‘Si ĀPO a Dyos dan kapoonan nyo saw a iyaw Dyos ni Abraham, iyaw Dyos ni Isaak, kan iyaw Dyos ni Jakob, ki tinoboy na yaken dyinyo.’ Nyaw ngaran ko a abos pandan. Iyaw ngaran a ĀPO a manakenakem do tabo kapkapotōtan.

16 “Ngay, yangay mo sa akpehen panglakayen saw no Israel, kan batahen mo dyira a kon mo, ‘Si ĀPO a Dyos dan kapoonan nyo saw a iyaw Dyos ni Abraham, iyaw Dyos ni Isaak, kan iyaw Dyos ni Jakob, nagparang dyaken, as kan binata na pa dyaken a kāna, “Binoybōya koynyo, as kan naboya ko napariparin dyinyo do Egipto. 17 As kan inkari ko a ikaro koynyo do Egipto do dawri a pakarahmetan nyo, kan ikwan koynyo do tana daw no Kananeo, Heteo, Amoreo, Pereseo, Hibeo, kan Jeboseo. On, mataba kan maasi iyaw nawri a tana.” ’

18 “On, siranchiw panglakayen saw do Israel, ki adngeyen danchimo. As imonchi kan panglakayen saw, ki mayirayay kamonchi a mangay do āryaw do Egipto, kan batahen nyonchi dya a kon nyo, ‘Si ĀPO a Dyos da no Hebreo a tawotawo, ki napaboya dyamen. Palobōsan mo pa yamen a manakey so tatdo a karaw a komwan do let-ang tan mangidāton kami so binyay saw di ĀPO a Dyos namen.’ 19 Ki chapatak ko a palobōsan abanchi inyo no āryaw do Egipto malaksid an pilīten ko do panakabalin ko. 20 As dawa, iwāyat konchiw panakabalin ko, kan dosāen konchiw taga Egipto do tabo a makaskasdāaw a parinen konchi dyira. Katayoka sanchi no nawri, palobōsan narananchi inyo.

21 “Ipaanyib ko sanchiw tawotawo ko dyirad taga Egipto saw tan anchan komaro kamo, ki myan anchiw yonot nyo. 22 Iyanchiw kāda mabakes a Israelita, ki mangay anchi dyirad taga Egipto saw a karoba da, masaw aran sino a mabakes a taga Egipto a machiyan dyira. Mangdaw sanchi so warawara§ 3:22Do kadwan a naiyōlog, ki “alāhas.” a naparin do pirak kan do balitok, as kan laylay a ipalaylay nyonchi dyirad anak nyo saw a mahahakay kan mababakes. Komwan anchiw kasamsam nyo siras taga Egipto saw.”