3
Myan Ōras Para do Tābo
1 Do tābo a maparin, myan maikeddeng a ōras na, kan myan maitotop a chimpo do kāda kaparin do lōbongaya:
2 ōras a kaiyanak kan ōras a kadiman,
ōras a kapaymoha kan ōras a kapamagot,
3 ōras a kapangdiman kan ōras a kapamapya,
ōras a kapanglasa kan ōras a kapamatnek,
4 ōras a kapaychahoho kan ōras a kamimyeng,
ōras a kapagdong-aw kan ōras a katatāda,
5 ōras a kapawpit siras bato kan ōras a kapangpeh sira,
ōras a kapaykepkep kan ōras a kapenpen no kapaykepkep,
6 ōras a kapaychichwas kan ōras a kapanginolay,
ōras a kapaychonokon kan ōras a kapaypoha,
7 ōras a kapamirit kan ōras a kapangrayit,
ōras a kapagolimek kan ōras a kapaychirin,
8 ōras a kadaw kan ōras a kapangipsok,
ōras a kapaggobat kan ōras a katalna.
9 Āngo mahap no tawo do nayhohopagan na? 10 Naboya ko inpasabhay no Dyos do tawotawo. 11 Pinarin na tābo a maitotop do ōras na. Inmoha na pa do kapangtokto no tawo maynamot do masakbayan a abos pandan, alit na matokod aba no tawo an āngo pinarin no Dyos yapo do siknanan a manda do pandan. 12 Chapatak ko a abaw maganaganay para do tawotawo an dya masoyot kan mangnānam ranan da a mabyay. 13 On, kāda asa, ki maparin a koman kan minom, as imāsen naw tabo a nayhohopagan na, ta nyaw sāgot no Dyos. 14 Chapatak ko a aran āngo a parinen no Dyos, ki nāw na a abos pandan. Maparin aba nayonan, kan maparin aba pakarwan. Parinen no Dyos komwan tan siraw tawotawo, ki anyiben da iya.
15 Tabo mapariparin sichāngori, ki naparin dana.
As no ītonchi, ki naparin dana sīgod,
Ta no Dyos, ki matadyan aba as kan tabo pinarin na, ki nāw na.
No Kabo no Kinalinteg do Lōbongaya
16 Naboya ko pa do lōbongaya:
Do yanan pāngokoman, ki myan marahet.
Do yanan kinalinteg, ki myan karahet.
17 Binata ko do inawan ko a kon ko,
“Okomen nanchi no Dyos
siraw malinteg kan marahet,
ta myan maikeddeng a ōras no tabo a maparin,
kan myan maitotop a chimpo do kāda kaparin.”
18 Binata ko pa do inawan ko a kon ko, “Soōten Dyos tawotawo tan maboya da a sira, ki akma say animal. 19 No pachipandan no tawo kan no animal, ki mayengay sa a madiman. Pariho anges da.* 3:19 Gen. 2:7 Maganaganay abaw kayayan no tawo kan animal. Tabo, ki abaw sinpaspangan da. 20 Sira tabo, ki pariho kwanan da. Sira tabo, ki yapo sa do ahbek, kan maybidi sa tabo daw. 21 Aryoriw makapatak an maypatohos iyaw ispirito no tawo mana no ispirito no animal, ki tod a mabidin do tanaya?”
22 As dawa, naboya ko a abaw maganaganay do tawo an dya iyaw kanānam nas tarabāko na, ta nawriw naitoroh dya, ta sino paro makaipaboya dya so myan do masakbayan na?