23
No Kapanawdyan Sa a Chirin ni Dabid
1 Siraw nyaw kapanawdyan a chirin ni Dabid:
“Iyaw naispiritwan sa minsāhi ni Dabid a pōtot ni Jesse,
iyaw naispiritwan a minsāhi no mahakay a pinatohos no Katotohosan,
iyaw pinidi no Dyos ni Jakob,
iyaw madawaw a maytolas so salmo no Israel:
2 “Iyaw Ispirito ni ĀPO, ki ipaichirin na dyaken.
Iyaw chirin na, ki myan sa do rida ko.
3 Iyaw Dyos no Israel, ki naychirin.
Iyaw Lāyit no Israel, ki binata na dyaken a kāna,
‘An mangitoray asa tawo dyirad tawotawo so kinalinteg
a magtoray a myan so kāmo do Dyos,
4 iya, ki akmay sēdang an domadaw araw
do mabekas a abos demdem,
akmas kalawag naw do katayoka no chimoy
a mapatobo so tametamek do tanaya.’
5 “On, komwan abawriw pamilya ko do Dyos?
Ta nachitōlag dyaken so tōlag a abos pandan
a naornos kan nasigorādo do kāda partis na.
Nāw nanchi yaken a isalākan,
kan paasinswen nanchiw tabo chakey ko.
6 Ki siraw dya mamo do Dyos,
akma saw nōlok a mapaksyat anchi,
ta maparin saba a makpeh do tanoro.
7 No tawo a mangalayid siras nōlok,
mangosar so pasek a rimīnta mana paningalan no chibot.
As mahanyib sanchi a masosohan do yanan da.”
Siraw Mabibīleg a Mahahakay a Tawo ni Dabid
(1 Kron. 11:10-41)
8 Siraw nyaw ngarangaran da no mabibīleg saw a mahahakay a tawo ni Dabid:
Si Joseb-bassebet a Tahkemonita, ki iyaw pangōlo da no Tatdwaw. Do nakaosar na so chibot naw pinaypisa na diniman saw wawaho a gasot a mahahakay do gobat.
9 Somarono dya si Eleasar a pōtot ni Doday a Ahohita.* 23:9 Mana “si Eleasar a pōtot no Dodo a pōtot no Ahohi”. Iya, ki asa dyirad tatdo saw a mabibīleg a mahahakay a tawo ni Dabid. Myan a rārayay ni Dabid do nakakārit daw siras Pilisteo saw a nakpeh do Pas-dammim a machigobat. Do dāwri, naychapayyapayyayo saw Israelita saw. 10 Basbāli a natokos a naytēnek si Eleasar, kan pinaychadimadiman na saw Pilisteo saw mandad karapid no tanoro naw a akma danaw naipadket do ispāda naw. Intoroh ni ĀPO iyaw rakoh a ballīgi do dawri a araw. Sinpangan na, naybidi saw Israelita di Eleasar, ki tod da lang a hapen armas saw yapo dyirad nadiman saw.
11 No somarono dya, ki si Sammah a pōtot ni Agee a Haratita. Naychipeh saw Pilisteowaw do Lehi a yanan dēkey a bengkag a napno so mohamoha a dipawo. Siraw bōyot no Israel, ki naychapayyapayayo sa. 12 Ki si Sammah, ki natokos a naytēnek do hobok naw no bengkag. Diniman na saw Pilisteo saw, kan insalākan na saw mohamohaw. Intoroh ni ĀPO iyaw rakoh a ballīgi.
13 Do chimpo no kapagāpit, tatdo dyirad tatdwaw a poho a pangpangōlo iyaw minosok do yanan ni Dabid do aschipaw no Adollam do kayan dan Pilisteo saw a nagkampo do Payahosongan no Repaim. 14 Do dāwri, ki myan si Dabid do pagkamītanaw a gwardyado. As iyaw rakohaw a bonggoy a soldādo dan Pilisteo, ki myan do Betlehem. 15 Asa karaw, nawaw si Dabid, kan binata na a inahahay a kāna, “Ay, myan pakono maparin a manoroh dyaken so inomen ko a yapo do bobonaw do masngenaw do rowangan no Betlehem!” 16 Dawa, sililimed a somindep tatdo saw a mabibīleg a mahahakay do yanan dan Pilisteo saw, namoranom sa yapo do bobonaw a masngen do rowangan no Betlehem, kan insabat da di Dabid. Ki chinakey naba ininom ni Dabid. Basbāli a pinado na a indāton di ĀPO. 17 Binata na a kāna, “O ĀPO, taywaran parinen ko nyaya? Engga ah! Akma abawris raya dan mahahakayaw a nangiposta so byay da a namoranom sya?” Dawa, ininom aba ni Dabid.
Siraw nya iyaw pinarin da no tatdo saw a mabibīleg a mahahakay a tawo ni Dabid.
18 Si Abisay a kakakteh a mahakay ni Joab a anak ni Seroyas, ki iyaw pangōlo no tatdwaw a poho.† 23:18 No “Tatdwaw a poho” mana “Tatdwaw”. Do nakaosar na so chibot naw, diniman naw tatdo a gasot a mahahakay. Dawa, nayparin a malatak a akma siras Tatdwaw. 19 Iyaw kalalatakan dyirad tatdwaw a poho, kan nayparin a komander da, ki aba dyirad Tatdwaw.
20 Si Benayas a pōtot ni Jehoyada, ki matored a mahakay a taga Kabseel. Pinarin naw āro a mabibīleg a kaparin. Diniman naw dadwa dyirad pangab-ābakaw no taga Moab. Nachiposek pad marahem a abot do naypisa a araw do chimpo no yilo kan nangdiman so lion. 21 As nangdiman pas asa taga Egipto a mataer a rakoh so inawan‡ 23:21 1 Kron. 11:23 a nakaarmas so chibot. Ki dinarop ni Benayas so mālo. Inagaw naw chibotaw yapo do tanoro naw no taga Egiptwaw, kan nawriw indiman na syaw bōkod naw a chibot. 22 Siraw nya iyaw pinarin ni Benayas a pōtot ni Jehoyada. Nayparin met iya a malatak a akmas tatdo saw a mabibīleg a mahahakay. 23 Nakarawat iya so arwaro a kaidāyaw kan aran sino dyirad tatdo saw a poho, ki naibidang aba dyirad Tatdwaw. Pinayparin iya ni Dabid a kapitan dyirad taga-bantay naw.
24 No kadwan dyirad tatdwaw a poho, ki nairāman si Asahel a kakteh a mahakay ni Joab, si Elhanan a pōtot ni Dodo a taga Betlehem, 25 si Sammah a taga Harod, si Elika a taga Harod, 26 si Heles a Paltita, si Ira a pōtot ni Ikkes a taga Tekowa, 27 si Abiyeser a taga Anatot, si Mebonnay a taga Hosah, 28 si Salmon a taga Ahoha, si Maharay a taga Netopah, 29 si Heled a pōtot ni Baanah a taga Netopah, si Ittay a pōtot ni Ribay a taga Gibea do Benhamin, 30 si Benayas a taga Piraton, si Hidday a taga Nahale-gaas, 31 si Abi-albon a taga Araba, si Asmabet a taga Bahorim, 32 si Eliyahba a taga Saalbon, siraw pōtot sa ni Jasen, 33 si Jonatan a pōtot ni Sammah a taga Harar, si Ahiyam a pōtot ni Sarar a taga Harar, 34 si Elipelet a pōtot ni Ahasbay a taga Maakah, si Eliyam a pōtot ni Ahitopel a taga Giloh, 35 si Hesro a taga Karmel, si Paaray a taga Arba, 36 si Igal a pōtot ni Natan a taga Sobah, si Bani a taga Gad, 37 si Selek a taga Ammon, si Naharay a taga Beerot a iyaw taga-sahabitaw so armas ni Joab a anak ni Seroyas, 38 si Ira a taga Jattir, si Gareb a taga Jattir, 39 kan si Oryas a Heteo. Bāli tatdo a poho kan papito sa a tabo.