1 Do nakapaypahabas no chimpo, minirwa na inābak ni Dabid Pilisteo saw kan intorayan na sa. Inagaw naw Meteg-ammah* 8:1 No kapangtokto no kadwan a maynamot do Meteg-ammah, ki kōta, syodad, mana mayit a idi. Ki abaw nakadongso an dino yanan nya. do toray dan Pilisteo saw.

2 Inābak na pa ni Dabid Moabita saw. Pinaypoktad na sa do tana, kan nakarokod na sira do asa kanaro no hobid. Kāda narokod na a dadwa kalinya, ki diniman na sa. Iyaw chatatdo naw a linya, ki hinabas na sa a mabyay. Dawa, nayparin saw Moabita saw a adīpen ni Dabid, kan nanoroh sa so tinawen a bwis da.

3 Inābak pa ni Dabid iyaw āri no pagāryan no Sobah a si Hadadeser a pōtot ni Rehob do nakangayaw ni Hadadeser a mapabidi so toray na do tanaw a machitalin do Oksong a Oprates. 4 Tiniliw ni Dabid a yapo di Hadadeser 1,700 a komakabalyo, kan 20,000 a manakenakey a soldādo. Inpakteb ni Dabid altek da saw no tabo kabalyo saw a para dyirad logan a pachigobat, ki binidin naw manawob a para do maosar no asa gasot a logan a pachigobat.

5 Do nakayan daw no Arameo† 8:5 Mana siraw taga Sirya. do Damasko a nangay a somidong di Hadadeser a āri no Sobah, diniman sa ni Dabid 22,000. 6 Sinpangan na, pinangay ni Dabid rarakoh saw a bonggoy no soldādo do sākop dan Arameo do Damasko. As siraw Arameo, ki nagpaitoray sa di Dabid, kan nagbwis sa dya. Pinagballīgi ni ĀPO si Dabid do aran dino a kinokwanan na.

7 Inhap ni Dabid balitok saw a sarāpa a dyira dan opisyal saw ni Hadadeser, kan inyangay na sa do Jerosalem. 8 As yapo do Tebah kan Berotay a idiidi a dyira ni Hadadeser, ki inahap pa ni Dabid āro a tombāga da.

9 Do nakadāmagaw ni Toy a āri no pagāryan no Hamat a inābak ni Dabid tābo a bōyot ni Hadadeser, 10 tinoboy naw pōtot naw a si Joram a mangay a mangkablaaw di Āri Dabid do nakapagballīgi na do nakapachigobat naw di Hadadeser. Ta si Hadadeser, ki nasanyib a nachigobat di Toy. Nangyonot si Joram siras rigālo di Dabid a naparin do pirak, balitok, kan tombāga.

11 Indidikar ni Āri Dabid saw nyaya rigālo di ĀPO a akmas pinarinan na siras pirak kan balitok saw a yapo do tabo nasnasyon saw a inab-ābak na 12 a yapo do Edom, Moab, Ammon, Pilistiya, kan Amalek, as kan yapo pa do nasamsam na do āri no Sobah a si Hadadeser a pōtot ni Rehob.

13 Si Dabid, ki nayparin a malatak do nakapaybidi naw a nangdiman siras 18,000 a Edomita do Payahosongan no Asin.

14 Pinangay na saw rarakoh a bonggoy no soldādo do intīro a Edom. As siraw tabo Edomita saw, ki nagpaitoray sa di Dabid. Pinagballīgi ni ĀPO si Dabid do aran dino a kinokwanan na.

15 Nagāri si Dabid do tabo a Israel, kan pinarin na an āngo malinteg kan kosto dyirad tabo tawotawo na. 16 Si Joab a anak ni Seroyas, ki iyaw mangipangōlo so bōyot. Si Jehosapat a pōtot ni Ahilod, ki iyaw maytoytolas so mapariparin do pagāryanaw. 17 Si Sadok a pōtot ni Ahitob kan si Ahimelek a pōtot ni Abyatar, ki papādi sa. Si Serayas, ki iyaw sikritaryo da. 18 Si Benayas a pōtot ni Jehoyada, ki iyaw mangidaōlo siras Keretita kan Peletita saw.‡ 8:18 Siraw Keretita kan Peletita saw, ki nabaybayādan sa a soldādo. As siraw pōtot saw ni Dabid, ki mamagbaga sa.