1 Taywarahen mwaba paydabdab malkelkem kan imo an makagatos, basbāli a siaānos ka pakono a ombagbaga sya a akmay mismo a āmang mo. As siraw babbaro a adeadēkey kan imo, ibidang mo sa a kakteh mo. 2 As komwan saw babbaketaw a matonetoneng kan imo, ibidang mo sa a ānang. As siraw babbalāsangaw a adeadēkey kan imo, ibidang mo sa kakteh mo a abo pakono marahet a ranta mo dyira.

3 Anyiben kan aywanan mo saw babbālwaw a mababakes a oyod a malidyatan a abos kakabagyan a somidong dyira. 4 Ki an myan pa saw anak no bālwaw mana apōko na, no manma pagrebbengan no kaynapwan na do kapagsīrbi da do Dyos, ki iya pakono kaaywan da so mismo a pamilya da. Tan komwan, makabāyad sas lidyataw no inyapwan da saw kan aāpong da, ta nawriw chakey no Dyos. 5 Iyaw makāsi a bālo, ki iyaw maychatanyiyaw a maybibyay kan si Āpo Dyos lang no hahawen na. Dawa, māraw kan mahep, nāw na maydasal dya so sidong na. 6 Ki iyaw bālwaw a maybibyay do nainlobōngan a kapagragragsak, ki naibidang dana nadiman do salapen no Dyos a aran myan pa sibibyay sichangori. 7 Ibilin mo saw nyaya dyirad manganohed saw tan abo pamagatosan da sira. 8 Amnan myan manganohed a manginonolay so kakabagyan na saw, naten danaw myanaw do mismo a pamilya na, tinadyichokodan naranaw kapanganohed na. Naibidang nyaya a maraherahet pa kan siraw dyaw a manganohed a makapatak so pagrebbengan dad mismo a pamilya da.

9 Ki siraw bālwaw a ilista mo,* 5:9 Myan apat a kapangtokto do dyaya listaan, ki masigorādo aba. No asa, ki siraw bālo saw a dyakono a mababakes a nagsīrbi do iglisya (Roma 16:1). No chadadwa na, ki siraw sinidongan no iglisya a maynamot ta malidyatan dana sa (5:3, 5). No chatatdo na, ki siraw bonggoy no babbālo a somnidosidong do asa naikeddeng a rebbeng do iglisya. No chapat na, ki siraw naidaydāyawaw a bālo. ki sira lang magtawenaw so anem a poho mana nasorsorok pa as kan naypisa lang a nangabahay. 10 As pagdidināmagan dan manganohedaw maynamot do maganayaw a pariparinen na a akma siras nyaya: Maganay nakaparakoh na siras anak na, managpadagos kan mapakombaba a magsīrbi dyirad manganohed saw.† 5:10 Do dawri a chimpo, an myan bisīta a somdep do bahay, ki rebbeng no adīpen manglablab so kokod no bisīta. An komwan, ipaboya da iyaw kapakombaba da a magsīrbi. Nasidongan na pa saw maganyitaw kan malidyatan, kan nāw na nakasagāna a mamariparin so aran āngo a maganay.

11 Siraw adedekey paw a nabālo a mabakes a abo paw anem a poho a tawen da, maparin saba mailista, ta āngonchan mayīyit kalikāgomaw no inawan da kan kari daw di Kristo a magsīrbi dya, as mirwa sa machikabahay. 12 Ta an komwan parinen da, ki myan pakagatosan da a maynamot ta marārayaw danaw manmaw a kari da di Kristo a dyi sa mirwa mangabahay. 13 On, ilista mo saba, ta āngonchan maypasadot sanchi kan maywam sa mangrōnot so ōras da a midibidi do bahabahay. No karahtan no nya, ki mangay sanchi a mangis-istorya kan maparaherahet so tawotawo, kan panghapan das pachibyangan dad kadwan saw a tawo. Tod sanchi a mangiwaras so dyi pakonwaw a rombeng a maipadamag. 14 Dawa, chakakey ko a mangabahay sa kan maymanganak sa a mangaywan so pamilya kan bahay da tan abo ōras dan mangip-ipsokaw dyaten a mangpilaw dyaten. 15 Komwan saw bilbilin ko, ta myan dana saw kadwan a nabālo a tomnadyichokod di Kristo, as minonot dana sa di Satanas. 16 Masaw bilin ko do kāda mabakes a nanganohed a myan so nabālo a mababakes do kakabagyan na. Iya pakono omaywan sira, as kan dyi na pakono a nonolay iglisya a mangisabhay so kaaywan na sira. Tan komwan, siraw bālo saw a oyod a maychatanyi, siraw sidongan iglisya.

17 As an maynamot dyirad panglakayenaw a maganay do rebbeng da, ki ibidang nyo sa pakono a maikari a maidāyaw kan matangdanan so kosto, naten dana saw mapasnekaw a mangasaba kan mangnanawo. 18 Ta myan naitolas do Masantwan a Tolas a kāna, “Bosalan mwabaw bākaw an madama maytarabāko tan makaarab.”‡ 5:18 Bakaw pangirek no tawo do dawri. Deot. 25:4. 1 Kor. 9:9 Binata na pa, “Machita matangdanan saw maytarabāko.”§ 5:18 Mt. 10:10; Lk. 10:7 19 An myan maipagatos a maikontra do asa panglakayen, ki anohdan nyo aba, malaksid an ibahey no dadwa mana tatdo a sistīgo. 20 Ki an tongtongen panglakayenaw maygatos, paydabdab mod kasalasalapan iglisya tan abo omtolad so pinarin naw.* 5:20 Mt. 18:15-20

21 Changori, do salapen Āpo Dyos kan si Kristo Jesos kan siraw masantwan saw a anghilis na, ibilin ko dyimo a anohdan mo sa tabo nya inbahey ko dyimo a abo kapangidomdōma. On, do aran āngo a parinen mo, abo pakono polos a itatārek mo a aran sino. 22 Tod kaba taykalo a mamidi so panglakayen a magsirsīrbi do iglisya,† 5:22 Mana “Tod kaba taykalo a mapalapaw so tanoro mo do oho no kompormi a mangidasal sya tan maipaboya a napidi do kapagsīrbi do Dyos.” 1 Tim. 4:14; 2 Tim. 1:6; Ara. 6:6; 13:3 basbāli a manma pa sintiren mo an masingpet kan kombini dyaw rebbeng naw. Magannad ka tan dyi ka machirāman do gatos dan kadwan a tawo. Nāw mo pakono a madalos so kapangtokto kan kaparin.

23 Imom Timoteo, ranom aba lang inomen mo. Maparin mo minom so dēkey a palek tan maagāsan bodek mwaw, ta naypipira ka na naganyit.

24 Pirwahen ko na ibahey dyimo maynamot dyirad mapidi saw a magsīrbi do Dyos. Naknakmen mo a malawag a maboyaw gatogatos dan kadwan saw a tawotawo, kan masigorādo sa maokom. Ki myan saw makaparin so marahet a matayo sichangori a maiparang anchi do arawaw a kapangokom. 25 Masaw a malawag a maboyaw maganay saya kaparin. Ki myan saw tawotawo a mamarin so maganay saya a matayo. Ki alit na, myan anchiw ōras da a maipakatoneng.