1 Ki iniktokto ni Dabid a kāna, “Myan anchiw araw a dimanen yaken ni Saulo. No kagaganayan a parinen ko, ki maglības ako a mangay dyirad Pilisteo saw. Isardeng nanchi ni Saulo yaken a chichwasen do tana no Israel, kan makakaro ako na do tanoro na.”

2 Dawa, komnaro si Dabid kan nachirayay sa dyaw anemaw a gasot a mahahakay a bonggoy na. Nangay sa di Akis a pōtot ni Maok a āri no Gat.* 27:2 1 Sam. 21:10 3 Si Dabid kan bonggoy na saw a mahahakay, ki minyan sa do Gat di Akis. Kāda mahakay, ki inyonot naw pamilya na. Si Dabid, ki inyonot na met dadwaw a baket na a sa Ahinoam a taga Jesreel kan si Abigail a taga Karmel a iyaw bālo naw ni Nabal. 4 Do nakadāmagaw sya ni Saulo a nayyayo dana si Dabid a kominwan do Gat, tinongtong na paba chinichwas.

5 Binata ni Dabid di Akis a kāna, “An chahwahok mo yaken, ki torohan mo pa yaken so yanan ko do asa dyirad idi saya tan omyan ako daw. Ta āngo ta machita no pachirawatan mo omyan dyimo do sintro a syodad no āri?”

6 Dawa, do dāwri a araw, intoroh dya ni Akis iyaw idi a Siklag a dyira no ar-āri saw no Joda manda sichangori. 7 Nachiyan si Dabid do tana dan Pilisteo saw so makatawen kan apat a kabohan.

8 Do dāwri, si Dabid kan bonggoy na saw a mahahakay, ki somnonget sa kan rinaot da saw Gesorita, Girsita, kan Amalekita saw. Ta siraw nya a tawotawo a yapo do kaychowa pa, ki minyan sa do dya tana a manda do Sor a makarapit do Egipto. 9 Do nakaraot ni Dabid do aran dino a yanan, abaw tinokos na a aran asa mahakay mana mabakes a mabyay. Ki inkaro na saw karniro, bāka, asno, kamilyo, kan laylay da saw, as nakapaybidi na di Akis.

10 Do nakayahes ni Akis a kāna, “Dino danaw nangraotan mo sicharaw?” initbay ni Dabid a kāna, “Namna, do Negeb† 27:10 Negeb, ki mabkoh a tana, kan abagatānenaw partis no pagāryan no Joda. Gen. 12:9; Jos. 10:40 a dyira no Joda,” mana “Do Negeb do tanaw a dyira dan Jerahmeelita,” mana “Do Negeb do tanaw a dyira dan Kenita.” 11 Abaw tinokos na a mahakay mana mabakes a mabyay a mangyangay so dāmag do Gat. Ta iniktokto na a kāna, “Ipaneknek danchiw maynamot dyamen, kan batahen danchi a kon da, ‘Komwanaw pinarin ni Dabid.’ ” Nyaw dadakay na do kayan na a minyan do tana dan Pilisteo saw. 12 Nagtalkan ni Akis si Dabid, kan iniktokto na a kāna, “Nayparinaya a tohang do tehnan da no tawotawo na saw a Israelita, kan mayparin anchi a pachirawatan ko a magnanayon.”