1 Inbahey ni ĀPO di Samwel a kāna, “Maypāngo pas kahay iyaw kadongdong-aw mos Saulo? Chinaskeh ko abawri iya a āri no Israel? Apnohen mo poranom mwaya a olong so lana no olibo, as kangay mo a mangchichwas so tawowaw a mayngaran so Jesse do Betlehem. Pinidi ko na iyaw asa dyirad pōtot na saw a mayparin a āri.”

2 Ki inyahes ni Samwel a kāna, “Āngo ngayan ko daw? An madamāgan ni Saulo, dimanen nanchi yaken.”

Ki tinbay ni ĀPO a kāna, “Mangyangay kas mabinayi a orbon a bāka, kan ibahey mo a kon mo, ‘Mangay ako dya tan mangidāton akonchi di ĀPO.’ 3 Awīsen mo si Jesse do pangidatōnanaw, kan ipakatoneng konchi dyimo iyaw no parinen mo. Imonchiw mapado so lana a para dyaken do pidyen kwaw.”

4 Pinarin ni Samwel akmas inbaheyaw ni ĀPO. Do nakawara naw do Betlehem, naychamirpirpir saw panglakayen no idi do nakabayat daw sya. Inyahes da dya a kon da, “Āpo, mangay kawri a mangyangay so talna?”

5 Initbay ni Samwel a kāna, “On, sitatalna. Mangay ako a mangidāton di ĀPO. Itatārek nyo inawan nyo a para dya, as kawnot nyo dyaken a machipangidāton.” Sinpangan na, intatārek na pa a para di ĀPO sa Jesse kan siraw pōtot naw, kan ināwis na sa do pangidatōnanaw.

6 Do nakawara da Jesse kan pōtot na saw, naboya ni Samwel si Eliyab a matoneng a pōtot ni Jesse, kan iniktokto na, “Sigorādo a iyaw maytēnekaya dyaw pinidi ni ĀPO.”

7 Ki inbahey ni ĀPO di Samwel a kāna, “Iyabaw kagwapo mana kakarang naw chiban mo, ta chinaskeh ko iya. No ĀPO, ki chiban naba an āngo maboyaw no tawo. Ta no tawo, ki chiban naw kapintas do hapot. Si ĀPO, chiban naw myan do pōso.”

8 Sinpangan na, tinawagan ni Jesse si Abinadab, as nakaipasalap na sya di Samwel. Ki binata ni Samwel a kāna, “Aran iyaw nyaya, ki pinidi aba ni ĀPO.” 9 Nakaipasalapaw ni Jesse si Sammah di Samwel, ki inbahey dana ni Samwel a kāna, “Aran iyaw nya, ki pinidi aba ni ĀPO.” 10 Nakaipasalapaw ni Jesse so papito saw a pōtot na di Samwel, ki binata ni Samwel a kāna, “Abaya dyirad dyaw pinidi ni ĀPO.” 11 Dawa, inyahes na di Jesse a kāna, “Sira danawri a tabo nyayaw pōtot mo?”

Tinbay ni Jesse a kāna, “Na, ari paw boridekaw, ki ari na sa aywanan karniro saw.”

“Tawagan nyo kan yay nyo a hapen do dya. Maydisna kami aba a koman mandad kawara na dya,” kāna ni Samwel.

12 Dawa, yay da tinawagan a inyangay di Samwel. Makababāya so pisnyi, maganay kapagmatmata na, kan makagwapo pa. Inbahey ni ĀPO di Samwel a kāna, “Iya danaw nyaya. Padwan mo iya so lana.”

13 Dawa, inhap ni Samwel poranom naw a olong a yanan lana no olibo, as nakapado na sya do ohwaw ni Dabid do salapen kakakteh na saw. As mangrogi do dāwri a araw, pinabīleg iya no Ispirito ni ĀPO. Sinpangan na, naybidi dana si Samwel do Rama.

14 Do dāwri, komnaro iyaw no Ispirito ni ĀPO di Saulo, kan pinalobōsan ni ĀPO marahet a ispirito a nangtōok sya.

15 Siraw magsirsīrbi di Saulo, ki binahey da dya a kon da, “Chiban pa, totoōken naymo no marehetaya ispirito a pinalobōsan no Dyos. 16 Toboyen mo pa yamen mo āpo a magsirsīrbi a myan dyimo a mangay a maychichwas so sanay a magtokar so arpa. Ta an mangay dyimo marahetaya a ispirito a pinalobōsan no Dyos, an magtokar anchi, ki maliwliwa ka.”

17 Dawa, tinoboy na saw magsirsīrbyaw a kāna, “May kamo a maychichwas an sino makapagtokar a sanay, as iyangay nyo dyaken.”

18 Asa dyirad magsirsīrbyaw tominbay a kāna, “Aryaw naboya ko a pōtot ni Jesse do Betlehem a sanay a magtokar so arpa. As nawri aba lang, ta matored, kan asa a taga-gobat. Maganay a maychirin kan magwapo, as myan dya si ĀPO.”

19 Dawa, nanoboy si Saulo siras mangay di Jesse a mangibahey so nya, “Toboyen mo dyamen pōtot mwaya a si Dabid, iyaw magpaspastoraw so karniro.” 20 Do dāwri, nanghap si Jesse so asno a kinargaan na so tināpay, asa a kalālat a napno so palek, kan orbon a kalding, as kan inpahap na di Dabid a yangay di Saulo.

21 Nangay si Dabid di Saulo, kan inrogi naw magsīrbi dya. Chinahwahok iya ni Saulo a taywara, kan pinayparin na iya a taga-sahabit so armas naw. 22 Do dāwri, inpaibahey ni Saulo di Jesse a kāna, “Palobōsan mo pa si Dabid a nāw na magsīrbi dyaken, ta chahwahok kwaya iya.”

23 Kāda mangay di Saulo iyaw marahetaw a ispirito a pinalobōsan no Dyos, ahapen ni Dabid arpa naw, as kapagtokar na. Maliwliwa dananchi si Saulo. Maypaganay dananchi iya, kan komaro dananchiw marahetaw a ispirito dya.