1 Inpakatoneng dana ni ĀPO chirin naw di Jeho a pōtot ni Hanani a maikontra di Baasa a kāna, 2 “Binangon koymo a yapo do ahbek, kan pinayparin koymo a magtoray dyirad tawotawo ko a Israel. Ki inonotan mo dadakay ni Jeroboam, kan pinawnot mo saw tawotawo ko a Israel a naygatos, as kan pinasoli mo yaken a maynamot do gatogatos da. 3 Dawa, imom Baasa, yangay konchimo a abohen kan pamilya mo. Parinen konchi do pamilya mo akmas pinarin kwaw do pamilya ni Jeroboam a pōtot ni Nebat. 4 Aran sino a mimbros no pamilya ni Baasa a madiman do syodad, ki kanen danchi no chito. As no madiman do gaganaw no syodad, ki kanen danchi no manomanok a somayasayap.”

5 Siraw kadwan saw a napariparin do nakapagāri ni Baasa, no pinariparin naw kan napatayoka na saw, ki naitolas sabawri do librowaw no pakasaritāan dan ar-āri no Israel? 6 As nachipaynahah si Baasa dyirad aāmang na saw, kan naitābon do Tirsa. Si Ela a pōtot na, ki nachitādi dya a āri.

7 Nyaw inpakatonengaw ni ĀPO di propīta Jeho a pōtot ni Hanani a maikontra di Baasa kan pamilya na a maynamot do tabo marahet a pinarin na do kapanyideb ni ĀPO. Pinasoli na pa si ĀPO a maynamot do pinariparin naw do nakatōlad naw siras kaparin no pamilya ni Jeroboam, as kan maynamot do kaiyangay naw so nakarārayaw dan kapotōtan saw ni Jeroboam.

8 Do chadadwa naw a poho kan anem a katawen no kapagāri ni Asa a āri no Joda, si Ela a pōtot ni Baasa, ki nayparin a āri no Israel, kan nagāri do Tirsa so dadwa a katawen.

9 Si Simri a asa opisyal na a komander no kagodwa dan logan na saw a pachigobat, ki nagpangta so maikontra dya. Si Āri Ela, ki myan do Tirsa do dāwri a machinom a maybobok do bahay ni Arsa a iyaw manyidechidebaw so palasyo do Tirsa. 10 Somindep si Simri, kan kinelbat na a diniman si Ela do chadadwa naw a poho kan papito a katawen no kapagāri ni Asa do Joda, as iya danaw nachitādi a āri.

11 Apāman a nangrogi si Simri a magāri a maydisna do trono, diniman ni Simriw tābo kapamilya ni Baasa. Abaw aran asa tinokos na a mahakay a kaliposan na mana sīt na. 12 Dawa, komwan nakarārayaw ni Simri so tābo kapamilya ni Baasa sigon do chirin ĀPO a inpaibahey na di propīta Jeho 13 a maynamot do tabo gatogatos a pinarin da Baasa kan Ela a pōtot na a napawnot siras tawotawo no Israel a naygatos. Pinasoli da si ĀPO a Dyos no Israel a maynamot do kapagdaydāyaw daw siras abos sinpaspangan a didyosen.

14 Siraw kadwan saw a napariparin do nakapagāri ni Ela, kan tabo pinariparin na, ki naitolas sabawri do librowaw no pakasaritāan dan ar-āri no Israel?

15 Do chadadwa naw a poho kan papito a katawen no kapagāri ni Asa a āri no Joda, nagāri si Simri so papito a karaw do Tirsa. Siraw bōyot saw no Israel, ki nakapwisto sa a manglakob do masngenaw do Gibbeton a idi dan Pilisteo. 16 Do nakadāmag daw no bōyot saw a nagkampo daw a nagpangta si Simri so maikontra do āryaw kan diniman na, pinatnek da si Omri a āri no Israel a iyaw komanderaw no bōyot da do dāwri met lang a araw do kampo daw. 17 Sinpangan na, sa Omri kan tabo bōyot na saw, ki komnaro sa do Gibbeton, as nangay da a linakob syodadaw a Tirsa. 18 Do nakaboyaw sya ni Simri a nahap daranaw syodadaw, somindep do kōtaw do irahemaw no palasyo no āri, kan sinosohan na, as nadiman do irahemaw. 19 Nyaw naparin maynamot do gatogatos a pinarin na. On, pinarin naw marahetaw do kapanyideb ni ĀPO, kan inonotan naw kabibyay ni Jeroboam. As maynamot do gatos na, ki pinawnot na saw tawotawo no Israel a naygatos.

20 Siraw kadwan saw a napariparin do nakapagāri ni Simri, kan iyaw nakapagribīldi naw, ki naitolas sabawri do librowaw no pakasaritāan dan ar-āri no Israel?

21 Sinpangan na, siraw tawotawo no Israel, naycharwa do dadwa bonggoy. No asaw, ki minonot sa di Tibni a pōtot ni Ginat tan payparinen da iya a āri da. Iyaw asaw, ki minonot sa di Omri. 22 Ki siraw minonotaw di Omri, ki inābak da saw minonotaw di Tibni a pōtot ni Ginat. Nadiman si Tibni, kan si Omri iyaw nayparin a āri.

23 Do chatatdo naw a poho kan asa a katawen no kapagāri ni Asa a āri no Joda, nayparin si Omri a āri no Israel, kan nagāri so asa poho kan dadwa a katawen. Iyaw dāmowaw a anem a katawen, ki nagāri do Tirsa. 24 Ginātang naw paytokonanaw no Samarya di Semer so anem a rībo a kapidāso a pirak.* 16:24 Mana “papito a poho a kakilo”. Napatnek so syodad do dawri a paytokonan, kan pinangaranan na so Samarya† 16:24 Do Hebreo a chirin, ki “Somron”. a ngaran no sīgodaw a akin dyira so paytokonanaw.

25 Pinarin ni Omriw marahet do kapanyideb ni ĀPO. On, mangamangay nakapaygatos na kan tabo nanmanma saw kan iya. 26 Inonotan naw tābo kabibyay ni Jeroboam a pōtot ni Nebat. As maynamot do gatogatos na, pinawnot na saw tawotawo no Israel a naygatos, as kan pinasoli na si ĀPO a Dyos no Israel maynamot dyirad abos sinpaspangan a didyosen da.

27 Siraw kadwan saw a napariparin do nakapagāri ni Omri, siraw pinarin naw, kan napatayoka na saw, ki naitolas sabawri do librowaw no pakasaritāan dan ar-āri no Israel? 28 Nachipaynahah si Omri dyirad kapoonan na saw, kan naitābon do Samarya. Si Ahab a pōtot na, ki nachitādi dya a āri.

29 Do chatatdo naw a poho kan wawaho a katawen ni Asa a āri no Joda, si Ahab a pōtot ni Omri, ki nayparin a āri no Israel. Nagāri do Samarya so dadwa poho kan dadwa a katawen. 30 Si Ahab a pōtot ni Omri, ki namarin so mangamangay pa a marahet do kapanyideb ni ĀPO kan tabo saw nanmanmaw kan iya. 31 Inbidang na a mapaw kapamarin naw so gatogatos ni Jeroboam a pōtot ni Nebat. Rinohnwan na pa do nakakabahay na si Jesebel a pōtot a mabakes ni Etabaal a āri da no Sidonyo, kan inrogi naw nagsīrbi di Baal kan nagdaydāyaw dya. 32 Napatnek si Ahab so altar para di Baal do timplowaw ni Baal a pinatnek na do Samarya. 33 Namarin pa so posti ni Asera. Iyaw pinarin ni Ahab, ki mangamangay paw nakapakasoli ni ĀPO a Dyos no Israel kan no tabo āri no Israel a nanmanma kan iya.

34 Do kachimpo ni Ahab, pinatnek ni Hiel a taga Betel a pinirwa iyaw idi a Jeriko. Do nakapangay naw so pondasyonaw, nadiman matonengaw a pōtot na a mahakay a si Abiram. As do nakapangay naw siras rowangan na saw, nadiman boridek naw a mahakay a si Segob. Nyaw naparin sigon do chirinaw ni ĀPO a inchirin ni Joswe a pōtot ni Non.‡ 16:34 Jos. 6:26