1 Do nakadāmag naw no reyna no Seba so kalatak ni Solomon a maynamot do kaidaydāyaw na so ngaran ni ĀPO, ki nangay na sinōot do malilidyat saw a yahahes na. 2 Nawara do Jerosalem a kayrayay naw rakoh a bonggoy dan magsirsīrbyaw dya kontodo kamilyo sa a nayrara so rikrikādo, āro a balitok, kan mapapateg saw a bato. Nangay di Solomon kan nachisarsarīta dya so maynamot do tabo a myan do aktokto na. 3 Natbay ni Solomon tabo yahahes na. Abaw chinalidyat ni āri a inatbay. 4 Do nakaboyaw sya no reynaw no Seba so tabo kinasīrib ni Solomon, kan iyaw pinatnek naw a palasyo, 5 masaw makanaw do lamisaan na, iyaw kapaydiydisna daw no opisyalis na saw, kan siraw mayteytēnek a magsirsīrbi, kan siraw laylay daw, kan siraw maytawoyaw so palek, kan siraw nasosohanaw a indāton ni Solomon do timplo ni ĀPO, ki taywaraw nakableg ni reyna.

6 Binata na do āryaw a kāna, “No dāmagaw a nadngey ko do bōkod ko a tana a maynamot dyirad kaparin mo kan kinasīrib mo, ki oyod sawen. 7 Ki abaw anohed ko dyirad dyaya dāmag a mandad nakangay ko kan nakaboya ko sya do mismo a mata ko. Aran komwan, naibahey aba dyaken kagodwa na no kinasīrib kan kinabaknang mo a mangamangay pa kan naipadāmagaw a nadngey ko. 8 Ay, āngo a kabindisyon da no tawotawo mo! Ay, āngo a kabindisyon da pa no magsirsīrbi dyimo a nāw da mayteytēnek do salapen mo kan makadngey so kinasīrib mo! 9 Madaydāyaw pakono si ĀPO a Dyos mo a taywara a mahwahok dyimo, kan napangay dyimo do trono no Israel. Maynamot do abos pandan a kadaw ni ĀPO para do Israel, pinayparin naymo a āri, tan mangipākat ka so kinalinteg kan kalinteg.”

10 Inrigālo na do āryaw iyaw malābit dadima katonilāda a balitok, āro a rikrikādo, kan mapapateg saw a bato. Minirwa paba polos a myan komwan so kāro a rikrikādo a naiyangay a akmas intoroh naya no reyna no Seba di Āri Solomon.

11 (Otro, iyaw bonggoyaw no gapor ni Hiram, ki nangyangay sa so balitok a yapo do Opir. Yapo daw, ki nangyangay pa so āro a karga a mapapateg a bato kan kayo a mayngaran so almog. 12 Namarin si āri so pamahnyi so timplowaw ni ĀPO kan no palasyo naw a yapo do almogaw a kayo. Namarin pa siras arpa kan lyra* 10:12 Iyaw lyra, ki dekedekey kan iyaw arpa. para dyirad taga-kansyon saw. Apaba polos komwan so karo a almog a kayo a naiyangay mana naboyaboya a yapo do dawri a araw.)

13 Intoroh ni Āri Solomon di reyna no Seba iyaw tabo chinakakey na a inakdaw. Narapan pa so kadwanaw a rigālo a madādam a intoroh na dya. Sinpangan na, komnaro dana kan somnabat dana do bōkod na a tana a kayrayay na saw magsirsībyaw dya.

14 No karahmet no balitok a rinawat ni Solomon do tinawen, ki maparin a myan 25 a katonilāda. 15 Karāman pa sabaw pagbwisaw a binayādan dan maglaklāko saw kan magnignigosyo saw, kan yapo do tabo ar-āri saw do Arabya kan tabo gobirnador do dawri a tana.

16 Namarin si Solomon so dadwa gasot a rarakoh a sarāpa. Kāda asa, ki napakalopkopan so napitpit a balitok a makalo a taypapito a kakilo. 17 Namarin pa so tatdo a gasot a dekedekey a sarāpa. Kāda asa, ki napakalopkopan so napitpit a balitok a makalo a taydodwa a kakilo. Pinangay sa no āryaw do palasyo a mayngaran so Palasyo no Kahasan no Lebanon.

18 Namarin paw āryaw so rakoh a trono a nabistyan so sōng no elipanti, kan napakalopkopan so pōro a balitok. 19 No tronwaw, ki myan anem a pāngal na a kayatan. No panarngan naw, ki napaymemeh so tohos.† 10:19 Mana “No panarngan naw, ki myan nakitikit a oho no orbon a bāka”. Do maybīt naw no disnan, ki myan pachisadāgan no tachay, kan sinan lion a nakatēnek do payis no kāda sadāgan. 20 As myan saw asa poho kan dadwa sinan lion a napenged a maychamībit do kāda pāngal no ayranaw. Aba polos nakapamarin so komwan do aran dino a pagāryan. 21 Tabo no bāso ni Āri Solomon, ki balitok sa. Tabo a longlongan do Palasyo no Kahasan no Lebanon, ki pōro sa a balitok. Abaw naparin do pirak maynamot ta no pirak, ki naibidang a dēkey so balor do chimpo ni Solomon. 22 Myan bonggoy no komirsyanti a gapor no āri a nachisabay do bonggoy no gapor ni Hiram. Maypisa do kāda tatdo a katawen no kapaybidi no bonggoy no gapor no āryaw a manabat so balitok, pirak, sōng no elipanti, matatarek saw a songgo kan mapintas a manomanok a mayngaran so “peacock.”

23 Si Āri Solomon, ki kababaknangan kan kasisirīban do tabo a āri do lōbongaya. 24 Siraw tawotawo do intīro a lōbong, ki kinalikagōman daw mangay do salapen ni Solomon tan mangadngey so kinasīrib a intoroh no Dyos dya. 25 Siraw nangayaw, ki tinawen sa a napanawbi so rigālo da a karāman naparinaw do pirak mana balitok, laylay, armas, rikrikādo, siraw kabalyo, kan siraw molo.

26 In-īnot a chinpeh ni Solomon 1,400 a logan a pachigobat kan 12,000 a kabalyo.‡ 10:26 Deot. 17:16 Pinangay na saw kadwan dyirad syodad saw a pangapyan§ 10:26 1 Ār. 9:19 siras logan a pachigobat. Siraw rayay saw, ki do Jerosalem a yanan na. 27 Pinayparin ni āri iyaw pirak a akmay gagāngay a akmas kāro no bato saya do Jerosalem. Pinayparin na paw mabalor a sidro a kayo akmas kāro no gagāngay saw a sikamoro a kayokayo do paytoytokonan do Joda. 28 Siraw kabalyo sa ni Solomon, ki naiyangay sa a yapo do Mosri kan yapo do Kwe.* 10:28 No kadwan a naiyōlog, ki Egipto. Ki do Mosri (mana Silisya) kan Kwe do chimpo ni Solomon, ki sintro no pangdāman da so kabalyo. No yanan da sichangori, ki do abagātan no nasyon a Turkey. Siraw magnignigosyowaw no āryaw, gomnātang sira a yapo do Kwe. 29 As maparin a nagātang logan saw a pachigobat a yapo do Egipto, ki anem a gasot a kapidāso a pirak iyaw asa. As no bāyad no asa a kabalyo, ki asa gasot kan dadima poho a kapidāso a pirak. As siraw magnignigosyowaw no āri, ki inlāko da sa dyirad tabo a āri no Heteo saw kan siraw āri do Aram.