1 Si Āri Solomon, ki nagāri do tābo a Israel.* 4:1 Do dyaya chimpo, asa pa a nasyon Israel. 2 Siraw nyaw katotohosan a opisyalis na: si Asarya a pōtot ni Sadok, ki pādi. 3 Sa Elihorep kan Ahiha a pōtot sa ni Sisa, ki sikritaryo sa. Si Jehosapat a pōtot ni Ahilod, ki taga-tolas so pakasaritāan no pagāryan. 4 Si Benayas a pōtot ni Jehoyada, ki komander no bōyot. Sa Sadok kan Abyatar, ki papādi. 5 Si Asarya a pōtot pa ni Natan, ki iyaw mangidaōlo siras asa poho saw kan dadwa opisyalis do tana a Israel.† 4:5 Siraw asa poho saw kan dadwa, ki nailista sa do 1 Āri 4:8-19. Si Sabod a pōtot ni Natan, ki pādi kan mamagbaga di āri a mismo. 6 Si Ahisar, ki iyaw manyidechideb so palasyo. Si Adoniram a pōtot ni Abda, ki iyaw manyidechideb siras napīlitan saw a maytarabāko.

7 Myan pa di Solomon, asa poho kan dadwa a naidistino a opisyalis para do tabo a Israel. Makatoneng sa a mangpeh so kanen a yapo do sākop da a para dyirad tabo do palasyo. Kāda asa, ki rebbengen naw manoroh so kanen do asa kabohan do irahem no asa katawen. 8 Siraw nyaw ngarangaran da: si Ben-hor, ki iyaw makatoneng do katokotokonan no Epraim. 9 Si Ben-deker, ki iyaw makatoneng do Makas, Shaalbim, Bet-semes, kan Elon-bet-hanan. 10 Si Ben-hesed, ki iyaw makatoneng do Arobbot (Sokoh kan tabo intīro a tana no Heper, ki dyira na). 11 Si Ben-abinadab, ki iyaw makatoneng do tābo a Napat-dor. (Kinabahay na si Tapat a balāsang ni Solomon.) 12 Si Baana a pōtot ni Ahilod, ki iyaw makatoneng do Taanak, Megiddo, kan intīro a Bet-sean do katalin no Saretan do ibaba no Jesreel, as kan yapo do Bet-sean a maypakwan do Abel-mehola a manda do Jokmeam. 13 Si Ben-geber, ki iyaw makatoneng do Ramot-gilead. (Siraw sīcho ni Jair a pōtot ni Manasses a myan do Gilead, ki dyira na sa kontodo no tana no Argob a myan do Basan kontodo anem a poho a rarakoh a naahadan a syodad a myan so tombaga a rihas do rowangan da.) 14 Si Ahinadab a pōtot ni Iddo, ki iyaw makatoneng do Mahanaim. 15 Si Ahimaas, ki iyaw makatoneng do Naptali. (Kinabahay na si Basemat a balāsang ni Solomon.) 16 Si Baana a pōtot ni Hosay, ki iyaw makatoneng do Aser kan Alot. 17 Si Jehosapat a pōtot ni Parwah, ki iyaw makatoneng do Issakar. 18 Si Simey a pōtot ni Ela, ki iyaw makatoneng do Benhamin. 19 Si Geber a pōtot ni Ori, ki iyaw makatoneng do tana a Gilead. (Do nakarahan, ki tana da Sihon a āri dan Amoreo kan Og a āri no Basan.) Iya lang opisyal do dawri a tana.‡ 4:19 Mana “Myan paw asaw a opisyal do tana no Joda” mana “Myan asa lang a mangidaōlo do intīro a tana.”

20 Siraw tawotawo no Joda kan Israel, ki akmas kāro no anay do payis no kanayan. Komninan sa, mininom sa, kan nagragragsak sa. 21 Nagāri si Solomon do tabo a pagāryan a makayapo do oksong a Oprates a manda do tana dan Pilisteo, kan manda do letteng no tana a Egipto. Siraw nya a pagāryan, ki nangyangay sa so pagbwis da, kan nagsīrbi sa di Solomon do ōnos no kabyay na.

22 No machita da a kanen do kararaw do palasyo ni Āri Solomon, ki asa gasot kan dadima poho a kasalop a mapino a arina kan tatdo a gasot a kasalop a gagāngay a arina, 23 asa poho a napataba a bāka do koral, dadwa poho a naipasto a bāka, asa gasot a karniro mana kalding kontodo matatarek a ogsa kan napataba a manomanok. 24 Ta iya, ki magāri do tabo a pagāryan do laōden no Oprates a makayapo do Tipsah a manda do Gasa, as kan myan talna do omdibonaw dya. 25 Do ōnos no kabyay ni Āri Solomon, siraw tawotawo do Joda kan Israel, ki naybibyay sa a matalna a makayapo do tana a Dan a myan do ammyānan a manda do Beerseba do abagātan. Kāda tawo, ki ninānam naw bōkod na a kaobāsan kan igos a kayokayo. 26 Myan paw dyira ni Āri Solomon a apat a rībo a koral dyirad kabalyo a panggoyod so logan na saw a pachigobat, as kan 12,000 a kabalyo. 27 Siraw opisyalis, naytatādi sa do naikeddengaw a bohan a nangyangay so machita a kanen para di Āri Solomon kan siraw tabo saw a machakan do lamisaan no āri. Sinigōrado da a abo kōrang. 28 Inyangay da paw no machitaw a sebāda kan garami para dyirad kabalyo a para gobat kan siraw kadwan saw a kabalyo, as kan pinangay da do naitongdwaw a yanan.

29 Tinorohan no Dyos si Solomon so dya matokod a kinasīrib kan kapakaāwat, as kan marahem a kapangtokto a akmas dyaw a mabidang a anay do payis no kanayan. 30 Tan komwan, no kasīrib ni Solomon, ki mangamangay pa kan kasīrib dan tabo tawotawo do dāya kan tabo kasīrib no tawotawo do Egipto.§ 4:30 Siraw taga Arabya kan Persya do tana do dāya, ki nagdindināmag sa a myan so rakoh a sīrib. Aran do Egipto, ki nagdindināmag a nasyon dan mamasīrib. Ara. 7:22 31 Ta iya, ki masirsīrib kan aran sino a mahakay a magrāman di Etan a iyaw Esrahita. On, masirsīrib pa kan sa Heman, Kalkol, kan Darda a pōtot ni Mahol. No kalatak na, ki nagwaras do tabo omdibon saw a nasnasyon. 32 Naytolas so tatdo a rībo a panyinyirin. Siraw kanta na, ki asa rībo kan dadima. 33 Inlawlawag na a maynamot dyirad kayokayo kan tametamek a akmas sidro a kayo a myan do Lebanon kan isopo a tamek a tomobo a mohtot do bato a ahad. Innanawo na pa a maynamot dyirad animal, manomanok, komayakayab, kan among. 34 Siraw tawotawo a yapo do tabo nasyon, ki nangay sa a mangadngey so kinasīrib ni Solomon. Tinoboy sa no tabo āari do lōbongaya a nakadāmag a maynamot do kasīrib na.