No Manōma A Tolas Ni Juan
No Pakatonngan so Paytābwan no Nya Tolas
No naytolasaw so nya tolas kan no dadwaw a somarsarono, ki si Juan a asa dyirad nanawhenaw ni Jesos (Jn. 21:7). Malkem dana si Juan do nakaitolas naw so nya, as kan do dawri, ki iya danaw nabidin a sibibyay a yapo do dosi saw a nanawhen ni Jesos. Dawa, pinangaranan naw mismo a inawan na so panglakayen dan manganohed (2 Jn. 1; 3 Jn. 1). Siraw naytolasan na, ki siraw manganohed saw do probinsya a Asya, ta minyan si Juan do Epeso do dawri.
No naynamotan no nya tolas, ki tan ballaāgan sa ni Juan manganohed saw a maynamot dyirad kabōsor saw ni Kristo (2:18-19). Siraw nyaya a kabōsor ni Kristo, ki nachisyay dana sa do oyod, kan nanginanawo dana sa so bayataw (4:1). Ta no innanawo da a aran maganay pinarin ni Jesos a taga Nasaret, ki tawo lang kono, as kan iyabaw Kristo a Anak no Dyos. Nawri aba lang innanawo da, ta innanawo da pa a maparin tabaw tomadyichokod do gatogatos maynamot ta si Satanas danaw mangitoray do lōbongaya, as kan masisīta taba a maysin-aadaw.
Dawa, inbahey ni Juan a masisīta kapanganohed a aran Dyos si Jesos, ki nayparin a tawo, tan mangay a mangisalākan so tawotawo a manganohed dya (4:2-3; 5:6). As aran sino a madaw so Dyos, ki masisīta a chadaw na paw kapayngay na a tawo (4:7-8). Ta aran sino a manghahaw a asa dana anak no Dyos, ki masisīta a tongpalen na saw bilbilin na (2:3-4; 3:24) kan tongtongen na pabaw maygatos (3:6-9; 5:18).
Pinaybibidi ni Juan a inbahey maynamot do pakapatakan ta so Dyos kan sino saw anak no Dyos (2:3-4; 3:2, 24; 4:2, 7-8, 13; 5:2, 18-20). Masisīta a paytarken taw oyod kan bayataw a nanawo (2:20-21; 3:19; 4:6), ta īto danaw panongpalan (2:18).
No Naychakarwan no Nya Tolas
Pakatoneng 1:1-4
No kapatakan ta so Dyos 1:5-2:17
No Antikristo kan siraw mangallīlaw 2:18-29
Siraw anak no Dyos 2:28-3:24
No paytarkan oyod kan dya oyod 4:1-6
No adaw no Dyos 4:7-5:5
No pangpaneknek maynamot di Jeso-Kristo 5:6-12
No kapanawdyan na 5:13-21
1 Juan
1
No Chirin no Byay
1 Maytolas kami dyinyo a maynamot di Jeso-Kristo a Chirin no Dyos a pakayapwan byay. Iya, ki myan dana sīgod do sakbay pa naparswaw no lōbongaya.* 1:1 Jn. 1:1-4 Ki aran komwan, nayparin a tawo do lōbongaya, as yamen mismo a nakadngey kan nakaboya sya. On, yamen mismo a nangimangmang kan nangsalisalid† 1:1 Lk. 24:38-43; Jn. 13:25; 20:27 sya, 2 ta do nakapayparin naw a tawo no byayaya a minyan dyaten do lōbongaya, mismo namen a naboya. Dawa, ipaneknek namen kan ipodno namen dyinyo maynamot dya a iya, ki byay a abos pandan. On, iyaw sīgod a nachiyan do Dyos a Āmang ta, ki mismo a napaboya dyamen. 3 On, no mismwaw a naboya namen kan nadngey namen a yapo dya, ki nawriw ipaneknek namen dyinyo tan mairāman kamo do kapachirayarayay namenaya di Āpo Dyos a Āmang ta kan si Āpo Jeso-Kristo a Anak na. 4 On, itolas namen nyaya dyinyo tan maypataywaraw kasoyot ta.‡ 1:4 Jn. 3:29; 16:24; 2 Jn. 12
No Tawo a Myan do Kasēdangan
5 Nyaw minsāhi a nadngey namen a yapo do Anakaya no Dyos, as kan sichangori, ipakatoneng namen dyinyo a si Āpo Dyos, ki pakayapwan soho kan aba polos sari a myan dya. 6 An batahen ta a myan ta a machirayarayay do Dyos as maybibyay tad sari a maygaygatos, maybayataw ta, ta no kaparin ta, ki machitōnos saba do oyod a chakey no Dyos. 7 Ki an nāw ta maybibyay a nasēdangan a maynamot ta myan ta nad sēdang no Dyos a akmas kayan nayad sēdangaya, ki kosto kan maganay kasa ta a manganohed, as kan nadalosan ta na do tabo gatogatos ta a maynamot do raya ni Jesos a iyaw Anak no Dyos.
8 An batahen ta a abo gatos ta, syirto a allilāwen taw mismo a inawan ta kan taywara a mabawa ta na do oyod. 9 Ki an ipodno taw gatos ta, pakawanen na yaten no Dyos kan oyasan na yaten do tabo a gatos ta, ta iya, ki matalek kan malinteg do tabo kaparin na. 10 Ki an batahen ta a dyi ta naygatos, payparinen ta bayataw si Āpo Dyos, as kan aba dyaten chirin na.