1 Nanshalan shi Jesus shi Jiriko. 2 Waray baknang nodtan na siyodad ja apo ira nonta para singil ni bowis; say ngaran to, si Sakio. 3 Piyan ton asen nem sipa si Jesus, nem sina‐dinan ira nonta eshakel la totoo, ta si Sakio, entikey ya too. 4 Isonga say inpasing to, nanbetik ja epangdo nodta shalan ey say sota ira totoo, jet kimalab shi kiyew wa kowan sha ey sycamore, say asen tos Jesus nem manshedan ali nodtan. 5 Idi pintek nen Jesus sota kadnan nen Sakio, tinangkak to jet kowan to ey, “Sakio, kano‐im, japas ka di! Ta mesepol la ondawak shi baley mo, taka bisita‐en niman.”

6 Kinano‐an nen Sakio ja jimapas et eman‐imdeng nga engolop son Jesus shi baley to.

7 Nem emin ira sota toon engasas son Jesus ni indaw tod baley nen Sakio, ireka onẃanadegẃeg ja kowan sha ey, “Ngantoy daẃan tod man aya? Dimaw wa en memisita nima toon enshiy kenkenshat to!”

8 Nem say kowan nen Sakio son Jesus, kowan to ey, “Apo, ninemnem koy pesing ko niman! I‐akan koy kagashowa ni kokowak shi nankebiteg, tan no sipa ira sota inda‐karan ko ni singil ni bowis, bayshan ko ira ni memin‐epat.”

9 Kowan nen Jesus so nen Sakio ey, “Say kaysedakan, simabi niman shiyay ya pamilja, ta saja inpasing mo, si‐katoy ka‐asan to ey si‐kam ket agpayson anak shaka nen Abraham. 10 Si‐kak sota kowan ni para padto nonta bayag da ey Anak ni Too, jet say kabol la inbetkagan towak so nen Apo Shiyos, say mengeẃisak nonta ira toon emantoshong shi keshosa‐an sha say maysedakan ngo ira.”

11 Nonta ẃares Jesus shi Jiriko ja nay‐esop shi Jerusalem, kowan ira nonta karakdan na totoon emengitneng son si‐kato ey no onmotok si Jesus shi Jerusalem, mayshoki ma sota pantoshayan nen Apo Shiyos.

Nem say kowan to son si‐kara, eg nin metongpal sota namnama sha. In‐arigan to ira, ja kowan to ey, 12 “Waray baknang; ninemnem to ey ondaw shi araẃin ili, ja shiman i eẃatan to so ni kina‐ari to, asan ka‐oli din on‐akad, ja si‐kato may mantoshay. 13 Idi shanshanin ondaw, inpa‐odop to ira sota sampolon baga‐en to ja pinispis to, jet inẃarisan to ira ni sandedasos sa pilak ja ibiyakira ingkatod on‐oli ali. 14 Nem sota ira totoo nodtan na dogad ja edapo‐an to, eg sha koston si‐katoy mengitoshay koma son si‐kara; isonga engibetkag ira ni en manriri nodta kowan to ey daẃan to ja eẃatan to so ni kina‐ari to, ja kowan sha ey, ‘Eg mi koston si‐katoy mengitoshay son si‐kami.’ 15 Nem inpan‐ari sha met laeng. Nay‐olin imakad jet idi mimotok, inpa‐odop ton shagos sota baga‐en ton inẃarisan to ni pilak, say asen to nem pigay kinanansiya shen inbiyaki‐an. 16 Sota pilmiro, dimaw alin nanparang et kowan to ey, ‘Apo, sota sandasos sa inpiyal mo son si‐kak, nanbalin ni sandibo.’ 17 Kowan nonta ari ey, ‘Siya, mapteng i dingkam; mapteng ken baga‐en ko. Kaka mepiyal la mengimanshal ni otik ka banag, isonga niman, panbedin taken mengitoshay ni sampolon siyodad.’ 18 Sota maykadẃen baga‐en to, dimaw ngo alin nanparang et kowan to ey, ‘Apo, sota inpiyal mo son si‐kak ka sandasos, nanbalin ni dimen dasos.’ 19 Kowan nonta ari ey, ‘Manbedin ka ngon mengitoshay ni dimen siyodad.’ 20 Nem sota sakey, nanparang ngo ali, jet kowan to ey, ‘Apo, iyay sota sandasos sa inpiyal mo son si‐kak. Dinibotan ko ni panjo et insingpet kon intalok. 21 Entakotak son si‐kam tep palado ken too. Moka pan‐al‐a pay i aliẃen kokowam, tan angken sota aliẃen molam, moka pan‐epita.’ 22 Kowan nonta ari ni songbat to ey, ‘Si‐kam, eg ka mepiyal la baga‐en ko! Sota inkowan mo, si‐katoy kaybetayan ni keshosam! Amtam gayam ey palado‐ak ka too, amtam ey naka pan‐epitay angken aliẃen molak, amtam ey naka pan‐al‐ay aliẃen kokowak. 23 Apay ngarod nga intalom i pilak ko? Angken koma, no inbebangkom, say niman alin inmotok ko, ẃaray eẃaten kon patang to!’ 24 Jet kowan nonta ari so nonta ira too ton ẃara nodtan ey, ‘Alejo ima pilak ka ẃara son si‐kato et i‐kan jo so nima baga‐en kon sandiboy insapolan to!’ 25 Nem kowan sha ey, ‘Apo, ẃara met i sandibon pilak son si‐kato.’ 26 Kowan nonta ari ey, ‘Ikowan ko son si‐kayo, sota ira ẃa‐ẃa‐sha‐anan, may‐aknan pay. Nem sota ootik‐anan, angken sota oltimon ẃara son si‐kato, ma‐da pay. 27 Jet niman, shosa‐en ko ngo sota totoon simopngil son si‐kak ja kowan sha ey eg sha koston si‐kak i ari sha. Alejo did jay ira et bono jo ira! Asen koy kebonora.’ ”

28 Sajay i arig ga inkowan nen Jesus son si‐kara, asan ka‐edaw shi Jerusalem, ja epangdo ey say si‐kara.

29 Idi nay‐esop ma shi Jesus shima dogad ja kowan sha ey Bitpag tan Bitania, ja osshong ni shontog ga kowan sha ey Olibas, engibetkag ni showen too ton mepangdo. 30 Jet say inbilin to son si‐kara, kowan to ey, “Daw kayod ma dogad ja naysongbob et no onmotok kayo, ẃaray asen jon kilaw ni animal la donkey, ja naypagod. Sajay ya kilaw, eg pay laeng ekabkabajo‐an. Okasiyo et alejo did jay. 31 No ẃaray mengibeka son si‐kayo no ngantoy joka pan‐okasi so, ikowan jo ey, ‘Si Apo Jesus, mesepol to.’ ”

32 Jet siya, dimaw ira sota shadẃa et simbira sota donkey ja inkowan nen Jesus son si‐kara. 33 Idi shaka pan‐okasi sota kilaw, kowan ira nonta makakokowa ey, “Ngantoy joka pan‐okasi so nita kilaw?”

34 Kowan sha ey, “Si Apo Jesus, mesepol to.”

35 Jet indara sota kilaw et indaw sha son Jesus. Jet sota ta‐kep ni baro sha, in‐ap‐ap sha nodta beneg ni kilaw et inatngan shes Jesus sa mankebayo. 36 Dima‐jat si Jesus et sota ira totoo, in‐ap‐ap sha ngoy baro sha nodta kalsaren panshalnan ali nen Jesus.

37 Idi nay‐esop ma si Jesus shi Jerusalem, nodta kalsaren onshalong shi shontog ga kowan sha ey Olibas, sota ira eshakel la too to, ireka man‐imdeng nga pasiya, jet nan‐iyaman ira son Apo Shiyos maypangkep nonta kaskasshaaw wa milagron dingdingka nen Jesus ja inon‐an sha. Inkedsang shay keljaw sha, 38 ja kowan sha ey, “Bindisiyonan koma nen Apo Shiyos iya arin inbetkag to di. Si‐katoy en ali mengi‐kan ni talna ja edapo son Apo Shiyos! Shayaw son Apo Shiyos ja Kangeto‐an!”

39 Nem sota ira eshom ma Parisiyo ja naydaok nodta eshakel la totoo, kowan sha son Jesus ey, “Maistoro, selkag mo ira ta toom! Angsan i shayaw sha!”

40 Simongbat si Jesus ja kowan to ey, “Mesepol la ẃaray manshedjaw niman. No on‐eket ira ja too, maysa‐dat i baton onkeljaw ja manshedjaw!”

41 Nay‐esop ma shi Jerusalem si Jesus jet idi osshongan to, innangis toy toka pengisekit so ni totood man, ja kowan to ey, 42 “Si‐kayon tood Jerusalem, amtayo komay kasapolan jo say may‐aknan kayo ni talna! Nem ayshi met, eg mebedin na amta‐an jo! 43 Wara aliy timpon pandikat jo. Sota ira kabakal jo, diktoben shakejo ni mebedjag jet enshiy delsotan jo. 44 Sheshalen shen oltimoy siyodad jon Jerusalem, tan angken si‐kayo ngon too ja ẃared jay. Angken sakey ya bato, eg sha bay‐an na on‐onong shi sigod ja nay‐amagan to. Emin iyay, mepesamak son si‐kayo tep eg jo indasin iya timpon kowan nen Apo Shiyos ja kaysedakan jo!”

45 Idi mimotok ma si Jesus, simekep shi Timplo et shinagshag ton inpabo‐day ira sota emandeko nodtan. 46 Kowan to son si‐kara ey, “Say kowan ni esel nen Apo Shiyos ja naysolat nonta bayag da, kowan to ey sajay ya baley nen Apo Shiyos, pankekshawan ni totoo son si‐kato. Nem inpanbalin jo et ni singa amotan ni tolisan!”

47 Si Jesus, nantoro ni inakew shi Timplo. Nem sota ira apo ni papashi, mamaistoro ni dinteg ni Hodiyos, tan sota eshom iren pangolo ni Hodiyos, piyan shen pasiya ja bono‐en si Jesus. 48 Nem enshiy shaka nemnemen pesing sha, tep eshakel i totoon na‐awis, ja pipiyan shen mantetneng ni emin na ikowan nen Jesus.