1 Jet nontan ma, in‐awat nen Pilato si Jesus so nonta ira solsharo et sinepsepdat sha. 2 Jet sota ira solsharo, engosikos ira ni ẃakal la nasbitan asan shaka paidnget son Jesus, ja singa korona to. Tan binesho‐an sha pay nonta dopot ja violet i kolor to, ja singa baro ni ari. 3 Jet imesop ira son si‐kato ja kowan sha ni dedamsis sha ey, “Onpalapalad ka koma, ari ni Hodiyos!” Asan shaka sedpaka.

4 Jet si Pilato, bimo‐day ali mowan jet kowan to so nonta ira Hodiyos ey, “Enshi met i nak dinoktalan na to nanbasolan, ja si‐katoy kabol la to keshosa‐an; ekak itoloy ya bistigalen. Isonga niman, pebo‐day ko di say asen jo, say mepnek kayo ni epalikatan to la.”

5 Jet si Jesus, inpabo‐day sha ali ja inpa‐onong sha sota shenget ton sebit tan sota baro ton violet, jet si Pilato, kowan to ey, “Asas jo, sajay sota too!”

6 Idi inon‐an nonta ira apo ni papashi, tan sota ira kowadja ni Timplo, kimeljaw ira ja kowan sha ey, “Paidansam shi koros! Paidansam shi koros!”

Nem si Pilato, simongbat ja kowan to son si‐kara ey, “Si‐kayo ngoy mengilansa son si‐kato shi koros tep enshi met i nak dinoktalan na to nanbasolan!”

7 Jet sota ira toray ni Hodiyos, simongbat ira ja kowan sha ey, “Waray dinteg min Hodiyos ey sota toon mengikowan ey si‐kato ket Anak kono nen Apo Shiyos, mesepol la mebono, jet satan na too, si‐katoy inkowan to.”

8 Idi intenengan nen Pilato iyay ya inkowan ira nonta toray ni Hodiyos, ema‐ma et i takot to. 9 Isonga insekep to mowan nodta naydaem da jet inbag‐an to si Jesus ja kowan to ey, “Apay toway edapo‐an mo aya?”

Nem si Jesus, eg to sinongbatan.

10 Si Pilato, kowan to ey, “Apay nga eg mowak songbatan? Eg mo aya amta ey ẃaray kanebengan ko ja mengibodos son si‐kam no piyan ko, ono mengilansa son si‐kam shi koros?”

11 Simongbat si Jesus, ja kowan to ey, “Si‐kam, enshiy nebeng mo son si‐kak, no si Apo Shiyos ket eg to itolok ja may‐eẃatak son si‐kam. Isonga sota toon engilaw son si‐kak alid jay son si‐kam, mas ebadbadeg i basol to, ey say si‐kam.”

12 Idi intenengan nen Pilato iyay ya inkowan nen Jesus son si‐kato, piyan ton pasiya ja ibolos, nem sota ira toray ni Hodiyos, ema‐ma et i keljaw sha ja kowan sha ey, “No ibolos mo itan na too, aliẃen kajem toka ma nonta ari jod Roma, ta sota toon kowan to shorog ey si‐kato ket ari, si‐katoy makakontra so nonta ari shi Roma.”

13 Si Pilato, inbo‐day to mowan ali si Jesus ta intenengan to sota kowan ira nonta toray ni Hodiyos, jet en timongaw nodta dogad ja shaka pengigshengi ni ẃaray basol to, ja minetalan sha ni bato, ja kowan sha ni esel ni Hodiyos ey Gabata. 14 Nontan na akew, si‐katoy pansekana ni Hodiyos, ta no meẃa‐ẃa, piyasta ma ni Hodiyos ja Paskowa. Jet idi nonta nankawa may akew, kowan nen Pilato son si‐kara ey, “Iyay sota ari jo. Pan‐ala jo ngo tep ari jo.”

15 Sota ira Hodiyos, kimeljaw mowan ira ja kowan sha ey, “Bonom! Bonom! Paidansam et shi koros!”

Jet si Pilato, kowan to son si‐kara ey, “Jet piyan jon angken paidansak iya ari jod koros?”

Sota ira apo ni papashi, simongbat ira ja kowan sha ey, “Enshiy eshom ma ari mi; sota ari bengat shi Roma!”

16 Jet si Pilato, in‐awat to ma si Jesus son si‐kara ja maydansa shi koros.

17 Jet sota ira Hodiyos, indara ma si Jesus jet inbo‐day sha jet inpasakbat sha son si‐kato sota koros to, jet indaw sha nodta dogad ja kowan sha ey Toktok, ja no shi esel ni Hodiyos, kowan sha ey Golgota. 18 Jet shiman, indansara nodta koros to. Tan ẃara pay i showa ja in‐inshas sha ja indansa ngo shi sanseskey ya koros: sota sakey, indansara shi apit ni kanigid nen Jesus, jet sota sakey, nodta apit ni kanawan to ngo.

19 Jet si Pilato, ẃaray inpaisolat to ja kowan to ey, “Sajay si Jesus, ja i‐Nasarit, ja ari ni Hodiyos.” Sajay ya inpaisolat to, sha inpakpak shima koros nen Jesus. 20 Sajay ya inpaisolat nen Pilato, eshakel i Hodiyos ja bimasa so, ta sota dogad ja indansa‐an sha so nen Jesus, nay‐esop shi ili. Say inpangisolat nen Pilato, ekalkalasin esel — esel ni Hodiyos, esel ni i‐Roma, tan sota esel ni Grigo ja si‐katoy shaka pan‐i‐inawatid man na dogad.

21 Sota ira apo ni papashi ni Hodiyos, kowan sha so nen Pilato ey, “Karam koma paisolat ey ari ni Hodiyos, no diket say paisolat mo, sajay: ‘Inkowan to shorog ey si‐kato konoy ari ni Hodiyos.’ ”

22 Simongbat si Pilato, ja kowan to ey, “Sota insolat ko, si‐kato; eg mesepol la mesa‐datan.”

23 Idi naksheng ma ja indansa ira nonta solsharo si Jesus shi koros, indara sota baro to, jet biningbingay sha ja inpan‐epat sha son si‐karen solsharo. Tan indara pay sota baro to ja toka ita‐kep ja emongsan ja inebel, ja enshiy to eshaitan. 24 Jet sota ira solsharo, nantatabalan sha ey eg sha pi‐pi‐katen, no diket manbibinonot ira, no sipay ontompong so. Jet sajay ya inpasing sha, sajay i tongpal nonta naysolat ja kowan to ey, “Sota barok, bingbingayen sha, tan sota dopot ja naka ita‐kep, panbibinonotan sha.”

25 Jet nontan na maramen sajay i kepandag‐a ira nonta solsharo so nen Jesus, ẃara ngo si Maria ja ina nen Jesus, ja dimayat nodtan ja nay‐esop shi koros nen Jesus; ẃara pay sota agi met laeng nen Maria, sota si Maria ja aseẃa nen Kliopas, tan ẃara pay sota sakey ya si Maria Magdalena.

26 Jet si Jesus, idi inon‐an to ja dimayat nodta nay‐esop son si‐kato sota sakey ya apostol ton ensemek ton pasiya, tan inon‐an to ja ẃara si ineto, kowan to ey, “Nanang, si iyay may ibilang mon anak mo!” 27 Jet inkowan to ngo so nonta apostol ey, “Si‐kato may inam!”

Jet nontan ma ja akew, inodop nonta apostol sota ina nen Jesus shi baley to ja meki‐iyan ma shiman.

28 Jet nontan ma, amta nen Jesus ey nontan ma i kepospos nonta obda to, jet inkowan to ey, “Na‐keẃak ni shanom.” Ta piyan ton metongpal sota inkowan ni padto ja naysolat nonta bayag da ja pangkep son si‐kato.

29 Waray salaw wa nay‐esop nodtan na enapno ni empait ta tapey, jet sota sakey ya solsharo, to in‐aneng sota singa bonot ja masbet ni shanom, jet inpi‐ket to nodta ngoro ni pating nga kowan sha ey hisopo, asan toka iga‐ẃat shi bongot nen Jesus. 30 Jet idi ninamtan nen Jesus sota tapey ya inka‐ẃat nonta solsharo shi bongot to, kowan nen Jesus ey, “Naksheng ma.” Jet nanjokmos, asan ma ma‐bosi.

31 Sota ira Hodiyos, dimaw ira so nen Pilato jet sha inbag‐an ey, “No mebedin, pagetdom i sedi nonta ira naydansed koros, say metey iren shagos. Tan mesepol pay ya pa‐kal mo ira, ta shanshani ma sota kapatkan na akew son si‐kamin Hodiyos, jet na‐alas no on‐onong ira shima koros.”

32 Jet sota ira solsharo nen Pilato, sha kinetdo i sedi nonta ira showen too ja naydansa shi apit ni kanawan tan kanigid nen Jesus. 33 Nem idi onsabi ira sota solsharo so nen Jesus, inon‐an sha ja etey ma si Jesus; isonga binay‐an sha ja eg sha kinetdoy sedi to. 34 Nem sota sakey ya solsharo, intebek toy kayang to shi tagdang nen Jesus, jet imayos alin shagos i shala, tan shanom. 35 (Sota mismon engasas niyay ya edaga so nen Jesus, insodsod to la iyay say memati kayon memasa niyay. Sigoradon eg panshowashowa‐an ta amta to ey podno ni olay i toka ikowan.) 36 Eg kinetdo ira nonta solsharo i sedi nen Jesus, ta naypadto nonta bayag da ey angken sakey ya pokel to ket enshiy en ma‐an‐ano. 37 Tan ẃara pay i naysolat ta naypadto nontan da, ja kowan to ey, “Asen sha met laeng sota toon timbek sha.”

38 Idi naksheng ma ja dingka ira nonta solsharo son Jesus iyay, si Jose ja i‐Arimatia, dimaw ngo so nen Pilato, jet to inbag‐an no mebedin na a‐den toy bakdang nen Jesus nodta koros. Jet intolok nen Pilato. Jet si Jose, impas to sota bakdang nen Jesus shi koros. Sajay ya too, emati son Jesus, nem eg to ipa‐sas so nonta ira toray ni Hodiyos i inpamati to, ta entakot to ira. 39 Jet dimaw ngo ali si Nikodimo ja engidaw ali ni eshakel la kilo nonta emanseng‐ew wa nandaok ni kowan sha ey mira tan alo. (Si Nikodimo, si‐kato sota dimaw so nen Jesus ni edabi nonta ikayshogshogi nen Jesus ja mengitosho.) 40 Inda nen Nikodimo tan si Jose sota bakdang nen Jesus jet dinibotan sha nonta empotin dopot, jet inpakidibot sha sota emanseng‐ew, ta si‐katoy ogadi ni Hodiyos no ẃaray ibekara ja etey. 41 Nodta dogad ja inkorosan sha so nen Jesus, ẃaray gardin ja nay‐esop, jet nodtan, ẃaray diniyangan sha ja kaybebka‐an ni metey ja eg pay laeng na‐os‐osal. 42 Nodtan i indawan sha so ni bakdang nen Jesus ta sotan i nay‐esop, tep shanshanin manshoki ma sota akew wa ngilin ni Hodiyos.