1 Waray Parisiyo ja manngeshan ni Nikodimo, ja sakey ya pangolo ni Hodiyos. 2 Sajay ya too, dimaw son Jesus ni edabi, jet kowan to ey, “Maistoro, si‐kam, amta mi ey inbetkag token Apo Shiyos ja menosho son si‐kami, ta angken sipa, enshiy ondaga so nonta dingkam ma kaskasshaaw, no enshis Apo Shiyos son si‐kato.”

3 Jet si Jesus, simongbat ja kowan to ey, “Kinapodpodno iya ikowan ko son si‐kam. Angken sipa, eg mebedin na asen toy pantoshayan nen Apo Shiyos, no eg may‐enak mowan.”

4 Jet si Nikodimo, simongbat ja kowan to ey, “Toway pesing ni toon may‐enak mowan ey bima‐deg ma? Apay mebedin aya, ja on‐oli mowan shi anakan nen ineto jet asan may‐anak mowan?”

5 Si Jesus simongbat, ja kowan to ey, “Kinapodpodno iya ikowan ko son si‐kam. Angken sipa, eg mebedin na mayda‐kam shi pantoshayan nen Apo Shiyos, no eg may‐enak mowan, ta say kedepo‐i niya biyag, shanom tan Ispirito Santo nen Apo Shiyos. 6 Sota i‐anak ni too, etoo‐an i ogadi to, nem sota toon kawad‐an ni Ispirito Santo nen Apo Shiyos, ja singa nay‐anak mowan, say ogadi to, inges to ngoy Ispirito Santo. 7 Kareka messhaaw niya inkowan ko ey si‐kayon too, mesepol la may‐enak kayo mowan. 8 Say kay‐eshigan ni Ispirito Santo nen Apo Shiyos, saja shagem. Say shagem, sota piyan ton toshongen, si‐kato. Moka itenengi i bongog to, nem eg mo amtay edapo‐an to, ono daẃan to. Sajay i kay‐eshigan nonta may‐enak mowan ja kawad‐an ni Ispirito Santo.” Kowan nen Jesus.

9 Jet si Nikodimo, simongbat ja kowan to ey, “Toway pesing niyay ya inkowan mo?”

10 Si Jesus, simongbat mowan na kowan to ey, “Eg mo gayam amta iyay, ey eshayaw ka pay ya maistoro ni pamati tayon Hodiyos? 11 Kinapodpodno iya ikowan ko son si‐kayo. Say mika pan‐ikowan, sota amta mi, tan say mika penekneki, sota inon‐an mi. Nem si‐kayo, eg jo pati‐en i kowan mi. 12 Inkowan ko son si‐kayo i maypangkep ni saja dobong jet eg jo pinati. Ma‐ma ton eg jo pati‐en no ikowan ko son si‐kayo i maypangkep ni dangit. 13 Angken sipen too, enshiy en dimaw shi dangit, nem eg si‐kak bengat, ja kowan sha ey Anak ni Too; shiman aliy edapo‐an ko. 14 Si Moises, indansa tod kiyew sota sinan oleg ja boronsi, asan toka ikedjang nonta bayag da, ja kawashared ma nan‐ak‐akshan shen enshiy koston pan‐iyanan sha. Jet si‐kak ja kowan sha ey Anak ni Too, inges niyay ngoy pesing sha son si‐kak, 15 jet sota emin na memati son si‐kak, may‐aknan ni biyag ja enshiy to pengintegan.

16 “Ta si Apo Shiyos, ensemek ton pasiya i totood ja dobong; isonga in‐akan to ali sota saksakey bengat ta Anak to, say sota emin na memati so nontan na Anak to, eg meshosa ni ingkatod ingka, no diket may‐aknan ira ni biyag ja enshiy to engintegan. 17 Ta si Apo Shiyos, aliẃen inbetkag to ali sota Anak tod ja dobong ja si‐katoy mengigsheng ey meshosa iray totoo, no diket say isalakan to koma ira. 18 Isonga sota memati son si‐kato, eg meshosa, nem sota eg memati son si‐kato, kenshat ta meshosa iren ingkatod ingka, ta eg memati nodta saksakey bengat ta Anak nen Apo Shiyos. 19 Jet say kabol la keshosa‐an sha, sota eg sha kosto‐an so nonta inbetkag ali nen Apo Shiyos ja ondawag so ni nemnem sha. Say piniyan ni too et ngo mowan, sota pandegdeka ni ngaaw, ja angken eg medeẃagan i nemnem sha. 20 Jet sota ira ngaaw i aramid sha, shaka a‐dema ja on‐esop son si‐kak ta entakot ira ey deẃagan koy aramid shen ngaaw. 21 Nem sota toon podnoy toka dagdag‐a, si‐karay kaon‐es‐esop son si‐kak, say medeẃagan ey si Apo Shiyos i edapo‐an ni mapteng nga aramid sha.”

22 Idi enaksheng iyay, si Jesus tan sota ira too to, dimaw ired sakop ni Jodia. Jet si Jesus, eki‐iyan nin shiman tep emonbonjag nin. 23 Si Juan ja para bonjag, ẃara ngo shi Inon, ja nay‐esop shi Salim. Shiman i toka pemonjagi, tep eshakel shiman i shanom. Jet sota ira totoo, dimaw ired man na en nanpabonjag. 24 Tep nontan na timpo, aneng nin i kaybedod nen Juan.

25 Sota too ira nen Juan, tan sota sakey met laeng nga Hodiyos, ẃaray eg sha nan‐inawatan pangkep ni pemonjag. 26 Jet sota too nen Juan, dimaw ira son si‐kato, jet kowan sha ey, “Maistoro, moka tanshaani sota kadẃam nontan shi baliw ni pa‐dok ka Jordan? Sotan met sota toon intorom son si‐kami ja maysa‐dat son si‐kam. Niman, ememonjag kono met, jet eshakel i toon emandaw son si‐kato.”

27 Simongbat si Juan ja kowan to ey, “No si‐kak, ekak ma‐epal nonta eshakel la emandaw son si‐kato, ta emin na too, say kedepo‐i ni saad sha, si Apo Shiyos. 28 Intenengan jon mismo i inkowan ko, ey si‐kak ket aliẃen si‐kak sota inbetkag ali nen Apo Shiyos ja mengisedakan, no diket si‐kak, epangdo‐ak bengat ali ja en mengikowan ni totoo say mesekana iren memati son si‐kato. 29 Say kay‐eshigan to, singa si‐kak i mengisekana ni mesepol nonta kajem kon mengesawa. Jet niman, en simbi nonta daki sota esaw‐en ton bii, jet naka man‐imdeng men pasiya, ta si‐katoy talaken on‐aseẃa nontan na bii; isonga ekak ma‐epal. Niman, ta intenengan koy esel to, mas naka man‐imdeng. 30 Mesepol la si‐kato may tangkaken ni totoo, nem si‐kak, nebeng ngon mekodangan sota sigod ja inpanangkak ni too son si‐kak. 31 Ta sota edapo alid naykayang, si‐kato ngo eshan i kangeto‐an ni emin. Si‐kak, ta edapo‐ak shiya dobong, say amtak ngo, ono naka ikowan, sota maypangkep ni saja dobong. Jet si‐kato, ja edapod dangit, 32 say toka pan‐ikowan, sota maypangkep ni inon‐an to tan sota intenengan to shi dangit. Emin na too, istay memati ira koma, nem ootik met i memati ni toka pan‐ikowan. 33 Nem sota toon ememati ni toka pan‐ikowan, si‐karay ememati ngo ey podnon emin i kaikowan nen Apo Shiyos. 34 Ta sota mismon inbetkag nen Apo Shiyos, say toka ikowan, sota mismon esel nen Apo Shiyos, ta eg nagshengan i panakabalin ni Ispirito Santo ja in‐akan nen Apo Shiyos son si‐kato. 35 Si Apo Shiyos, ensemek to sota Anak to, isonga emin na banag, in‐awat to so nonta Anak to. 36 Sota toon memati so nonta Anak nen Apo Shiyos, may‐aknan ni biyag ja enshiy to engintegan, nem sota eg memati so nonta Anak nen Apo Shiyos, eg may‐aknan nonta biyag ja enshiy to engintegan, no diket emansessesked son si‐kato sota penosa nen Apo Shiyos ja shosen ingkatod ingka.”