1-2 Nem niman, ta ensakit i nemnem ko maypangkep son si‐kayo, sapay koma ta enosan jon itenengan iya ikowan ko, ta singa ẃaray dedamsis ko nodta ikowan ko di son si‐kayo. Ta piyan kon isagot nin i bakdang ko son si‐kayo. Ebadeg i naka pengisekit son si‐kayo, ja inges toy kepengisekit nen Apo Shiyos. May‐eshig ey bii kayon enshiy dakin imad‐arol so, jet singa intolag takejo ja esaw‐en ali nonta sakey ya daki, ja si Cristo. 3 Nem naka manshanag ta baka manbediw i nemnem jo, ja eg jo mala nemnemnemen sota koston joka pansilbi so nen Cristo. Baka may‐owapan kayo, ja inges to sota in‐olbod so ni oleg so nen Eva, nonta bayag da, jet nay‐owapan noman. 4 Ta inam‐ay met i joka ka‐eẃis. No ẃaray eshom ma ondaw son si‐kayo ja mengitosho ni apil, ja aliẃen inges to sota intoro mi ngo maypangkep so nen Jesus, joka eẃata. Masi‐met kayon mengeẃat nonta ispiriton shaka ikowan son si‐kayo, anta nga ineẃat jo la met sota koston Ispirito Santo nen Apo Shiyos nonta inpamatiyo son Cristo. Masi‐met kayo pay ya mengeẃat nonta apil ja kowan sha ey kaysedakan. 5 Jet no joka enosi ira ja kowan sha ey kangeto‐an konon apostol, anosi jowak koma ngo ni sajay ya ikowan ko. Ta say ẃared nemnem ko, angken sipa son si‐kara, eg sha‐ak et ngo ebaken ni angken ootik. 6 Aliẃen na matekalak ja man‐a‐sel, nem amtak i naka ikokowan. Nem eg mesepol la ikowan ko son si‐kayo i itsorak ja too, ta inpaleẃag kon emin son si‐kayo, jet amtayo ey apostol towak nen Cristo.

7 Nem baka apil i ẃared nemnem jo son si‐kak, ja kowan jo ey inbabak i kina‐apostol ko, ta enshiy nak siningil son si‐kayo nonta intorok sota mapteng nga shamag ja edapo so nen Apo Shiyos. Nem pansigshan joy kabol la ekak dingka‐an so nontan. 8 Nonta ẃara‐ak son si‐kayo ja emengitosho, say inosal kon pilak, sota in‐akan ni emati shi eshom ma dogad. Isonga singa tinodisan ko noman ira, say dibshi mangoy pengitoshok son si‐kayo. 9 Jet nonta ẃara‐ak son si‐kayo, enshiy kowan ko ey mengshawak son si‐kayo no ẃaray mesepol ko. Sota ira a‐aki shi pamati ja i‐Masidonia, si‐kara i engimotok ni mesepol ko nontan. Ta ekak kosto nontan ja ẃaray mankastos son si‐kayo ni kabol ni kompormin mesepol ko. Jet no ondawak da mowan, satan met laeng i dag‐en ko. 10 Ta no bilang ey si‐kayoy pengshawan ko ni mesepol ko, enshi may pengi‐tek ko ey eg takejo siningil ni inpangitorok son si‐kayo. Amtak ey sigoradon inpiyal nen Cristo son si‐kak sota podnon piyan ton maytosho, isonga amtak ngo ey ekak mengmengshaw son si‐kayon i‐Akaya. 11 Sigosho say kowan jo emo, ekak mengshaw son si‐kayo, ta enshiy semek ko son si‐kayo. Nem enshi, aliẃen sotan i ẃared nemnem ko. Amta nen Apo Shiyos ey ensemek takejon emin!

12 Jet itoloy kon eg mengmengshew son si‐kayo say sota etangsit ta totoo ja makakowan ey apostol ngo ira, onsalsheng sota shaka pandastog ja kowan sha ey sota shaka dagdag‐a ket inges toy obda mi. 13 Sotan iren totoo ket aliẃen agpayson apostol ira. Sota obdara, singa obda ni apostol nen Cristo, nem o‐owap kari. 14 Iso gayam ma angken si Satanas, singa anghil ja mismon edapo son Apo Shiyos no sin‐arom, nem emengi‐o‐owap kari. 15 Isonga aliẃen na kaskasshaaw no saja ira sinan apostol ja emansilbi son Satanas ket singa emengitosho ni mapteng nga pengonod son Apo Shiyos. Nem say panbenagan sha, epiten sha met laeng sota aramid shen ngaaw.

16 Ipinshowak iyay son si‐kayo. Aliẃen jo koma nemnemen ey singa ẃaray kolkolang ko, ta singa ẃaray dedamsis ni ikowan ko di. Nem no sotan i ẃared nemnem jo, anosi jowak, ta iyay nin i idastog ko, ja inges toy kapandastog ira nonta toon ẃared tan. 17 Say agpayso, sajay ya ikowan ko, aliẃen inbilin nen Apo Jesus, no diket ikowan ko iyay ja singa ẃaray kolkolang ko. 18 Jet niman, ta eshakel i emengilastog ni kowan sha ey nandasinan sha kono shi eshom, onoran ko ngo ira ja mandastogak. 19 No kowan jo ey ẃaray kolkolang ko, angkena, ta naydowam kayon mengitneng met nonta toon ẃaray kolkolang to. Ara, nankedaing kayo! 20 Nem joka iba‐ngat i onod nonta toon emengila‐kad son si‐kayo! Say shaka pesing met son si‐kayo ket shaka al‐ay kokowayo, ireka mayda‐da‐kam bengat, angsan i shaka pesing son si‐kayo, ja angken bebaingan shakejo pay. Jet joka enosi ira! 21 No sotan i kowan jo ey itsora ni apostol nen Cristo, agpayso sota kowan sha ey ekapoyak, ta ekak kabaalan na dag‐en sota shaka dagdag‐a son si‐kayo!

Ikowan ko mowan ey si‐kak, singa ẃaray kolkolang ko, nem mesepol ngon mandastogak. No sota eshom ket etoled iren idastog sota kowan sha ey ẃaray nandasinan sha, mebedin ngon etoleshak ja mandastog ni inges nonta kowan sha. 22 Isonga no kowan sha ey Hodiyos ira, angken si‐kak, Hodiyosak ngo met. No kowan sha ey poli ira nonta sigod ja too nen Apo Shiyos, poli sha‐ak ngo. No kowan sha ey apo ira da nen Abraham, ja mekiteẃid kono nonta kari nen Apo Shiyos, angken si‐kak, apo towak ngo. 23 Singa ẃaray angaw ko ni sajay ya naka pan‐ikowan, nem angkena. Itoloy ko et ja ikowan. No kowan sha ey ireka emansilbi so nen Cristo, mas pay ya naka mansilbi, ta eshakel i digat ko nem say si‐kara. Ebadbadeg ngo eshan i obdak nem say si‐kara, tan eminshakelak pay ja naybalod nem say si‐kara. Jet eminshakel pay ya sinepsepdat sha‐ak nonta toon naykontra son si‐kak, tan eminshakel pay ya singa ngannganin meteyak. 24 Jet sota ira kait kon Hodiyos, emindima ja sinepdat sha‐ak ni tedon polo tan siyam. 25 Emintedo ja sinepdat sha‐ak ni sowan; pinsak ja kineskespigan sha‐ak ni bato. Emintedon ena‐ned sota nandoganan kon barko jet esareyak mala. Jet nonta pinsak ka esareyan ko, sandabi tan san‐akew ja nannangoyak shima baybay. 26 Asdeg toy inek‐ekad kon dogad, jet eshakel pay i dilikaron dina‐kaman ko: ẃaray dayos, ẃara iray tolisan, jet angken sota ira kait kon Hodiyos, kataktakot i itsora sha no sin‐arom. Angken sota ira aliẃen Hodiyos, iso met laeng ja kataktakot ira no sin‐arom. Jet angken pay shima siyodad, dilikaro‐ak ja man‐ek‐ekad, angken pay shima shonshontog. Dilikaro‐ak ja mandokan shima barko. Jet angken sota ira kowan sha ey a‐aki shi pamati, ja o‐owap kari, kataktakot i itsora sha. 27 Naka emebdey ya pasiya ni sajay ya obdak, jet eminshakel la ekak pay maka‐ogip. Eminshakel la na‐ag‐agangak tep enshin polos i kenen ko tan na‐kewak pay ni shanom. Naka mekmektel ta enshiy koston barok. 28 Jet aliẃen sotan bengat, no diket ina‐akew ja naka nemnemnemen pasiya sota ira emati shi emin na dogad, no kas‐anoy kasesaad sha. 29 No ẃara iray ekapoy i pamati to, naka isakit ira, jet no ẃaray eshom ma toon panbesol so nonta kait kon emati, singa naka onpetang.

30 Mesepol la mandastogak, nem say indastog ko la, sota mengipa‐amta ni kakapoy niya bakdang ko. 31 Jet si Apo Shiyos ja Ama nen Apo Jesus, ja shedjawen ni emin na totoo ingkatod ingka, si‐katoy maka‐amta ey si‐kak, agpayso iya inkowan ko la, ekak dina‐bagan.

32 Iyay pay i ikowan kon dina‐kaman ko. Shi Damasko, sota gobinarol shiman ja insaad nen Ari Aritas, inpabantay to ni solsharo sota siyodad say a‐shelen sha‐ak. 33 Nem ẃaray tood man ja engi‐iyan son si‐kak shi baskit jet inoy‐oy sha‐ak nodta tawa ja naypetek nodta alad ja dimikmot so nonta siyodad. Isonga dinisi‐an ko sota istay kowan sha ey mengkel son si‐kak.