1 U̱n ka da-o̱ ye̱ ken hun-ne̱ ye̱ ro̱ káne̱, ye̱ ru̱ru̱ Ye̱so ma-to̱ ya-o-Gariri-ye̱ Panti Biratus ho'e̱ da-o̱ ye̱ haante̱ Shir u̱t-seke̱ à. 2 Ye̱so shasu̱ru̱ ye̱, “¿Remen Panti Biratus ho̱o̱g ka ya-o-Gariri-ye̱ kaane̱, no̱ u̱n ze̱e̱ o̱ ye̱ jiishte̱ ye̱ ken ya-o-Gariri-ye̱ no̱m u̱r-ba'as se? 3 Ayyo̱, ko̱ hiin! Komo me̱ no̱ m-ru̱re̱, 'yar no̱ u̱r-ba'as, no̱ mu̱u̱n be-de Shir m-ba kaane̱ á no̱a mer bo̱ ye̱ mare̱ à. 4 Baks no̱ ya-o-Sirom o̱p u̱n eer [18] ye̱ kuke̱-o m-pipir ho̱me̱ à. ¿No̱ u̱n ze̱e̱ ba'as-de u̱n ye̱ jiishte̱ de u̱n ye̱ ken u̱n hun-ne̱ ye̱ o-Urusharima à? 5 Ayyo̱, ko̱ hiin! Komo me̱ no̱ m-ru̱re̱, 'yar no̱ u̱r-ba'as, no̱ mu̱u̱n be-de Shir u̱n ba kaane̱ á no̱a mer bo̱ ye̱ mare̱ à.”

6 Ye̱so ru̱ru̱ ye̱ ka sha-mo̱ u̱t-ma mo̱: “Wu̱ ken ne̱t-wu̱ ro o-rum ne̱ u̱n kat-o̱ u̱n wu̱. Wu̱ haaru̱ hoob-o̱ u̱t-rum be-de u̱n yo, amba wu̱ kum ko̱ u̱r-gaan á. 7 Wu̱ ze̱e̱ru̱ wan-gu̱t-de o-kat, ‘Gwo̱t, hak-u̱s tet me̱ m-haan kane̱ hoob-o̱ u̱t-rum be-de u̱n ka rum-yo, komo me̱ kum ko u̱r-gaan á. Kups yo u̱r-'wu̱n! ¿Remen yan o̱ yo hette̱ m-ho̱ge̱ re̱re̱m-mo̱ o-dak?’ 8 Amba wan-gu̱t-de o-kat shasu̱ru̱, ‘Go̱s-wu̱, yage̱ yo temb, hak-o gaan a gu̱t, man hiin riib-se u̱n yo, u̱m ru̱'e̱ yo u̱t-wu̱u̱r. 9 U̱rege̱ yo makt hak-ye̱ ro̱o̱ne̱ à, no̱mo̱g u̱r-bon de̱e̱n, u̱rege̱ ne̱ yo mat á, ka da-o̱ wo̱a hoks yo m-kups.’ ”

10  Ho̱-de u̱r-Wu̱we̱, Ye̱so ro u̱r-yoos u̱n kuke̱-o̱ u̱n yoos u̱n Ma-to̱ Shir. 11 Wu̱ ken ne'a-wu̱ ro kane̱ u̱n wa-u̱t-ko̱t ne̱, wu̱ re̱e̱se̱ wu̱ u̱r-ko̱o̱b à. Har hak-u̱s o̱p u̱s-eer [18] wu̱ ro̱ haw-se, wu̱ m-hoks m-ine̱ te̱te̱ á. 12 Bo̱ Ye̱so hyente̱ wu̱ à, wu̱ agnu̱ru̱ wu̱, “Ne'a, go̱m ru ho'oste̱ wo̱!” 13 Ye̱so saku̱ru̱ kom-to̱ u̱n wu̱ n-to̱n u̱n ka ne'a-wu̱, wu̱ inu̱ru̱ te̱te̱, wu̱ bo̱mu̱ru̱ Shir.

14 Wu̱ ken wan-co-wu̱ u̱n kuke̱-o̱ u̱n yoos u̱n Ma-to̱ Shir, no̱mu̱ru̱ u̱s-ryaab u̱nze Ye̱so taaste̱ go̱m Ho̱-de u̱r-Wu̱we̱. Wu̱ no̱mu̱ru̱ u̱t-ma wu̱ ze̱e̱ru̱ hun-ne̱, “Ho̱-u̱t cind-to̱ ro̱ to̱ m-se̱nge̱, haan no̱ u̱n ka ho̱-u̱t cind-to̱ a taaste̱ go̱m-u̱s no̱, ba Ho̱-de u̱r-Wu̱we̱ á!”* 13:14 Hyen komo: Rwu̱u̱ 20:9-10; Kara 5:13-14.

15 Go̱s-wu̱ shasu̱ru̱ wu̱, “No̱ ya-o-she̱pe̱! Ko̱ wu̱ ke a mo̱ro̱gse̱ na-ye̱ u̱n wu̱, ko̱ janka-ye̱ u̱n wu̱, komo wu̱ ruut ye̱ n-do̱ wu̱ ye'et ye̱ m-ho̱ Ho̱-de u̱r-Wu̱we̱. 16 M-mo̱ka kane̱ ba'as-de á, a taase go̱m-o̱ u̱n ka ne'a-wu̱ Ho̱-de u̱r-Wu̱we̱. Ko-yan-baag-o Ibrahi wu̱, komo ko-Gwo̱mo-wu̱ u̱n ya-u̱t-ko̱t ru̱'u̱te̱ wu̱ go̱m har hak-u̱s o̱p u̱s-eer [18]. Komo wu̱ jiishte̱ u̱t-gu̱t be-de Shir.” 17 Shas-o̱ u̱n wu̱ ya'ag yan-yage̱-to̱ u̱n wu̱ m-'e̱, amba hun-ne̱ ye̱ ro káne̱ à no̱mu̱ru̱ o-zak remen ka hyat-to̱ wu̱ no̱me̱ à.

18 Ye̱so citu̱ru̱, “¿Re ne̱ gwo̱mo-to̱ Shir ro̱? ¿U̱n ya ne̱ u̱m he to̱ m-hongse̱? 19 Kaane̱ to̱ ro̱. Wu̱ ken ne̱t-wu̱ de̱k go̱-yo mosta wu̱ go̱o̱ru̱ u̱n kat-o̱ u̱n wu̱. Yo po̱tu̱ru̱ yo wargu̱ru̱ o-'yo, komo ye̱ge̱-no ce̱e̱ru̱ u̱t-kur u̱n jet-se u̱n yo.”

20 Ye̱so citu̱ru̱ komo, “¿U̱n ya ne̱ u̱m he m-hongse̱ u̱n gwo̱mo-to̱ Shir? 21 Kaane̱ to̱ ro̱. Ne'a de̱k m-yist wu̱ wu̱gsu̱ru̱ mo̱ be-de u̱n me'es kwo̱o̱z-u̱t yoor [40] to̱ m-hyò se̱ da-o̱ mo̱ ku̱tu̱kse̱ kap à.”

22 Ye̱so do̱ru̱ru̱ u̱t-bo̱ u̱n riib-o̱ u̱t-bo̱ ne̱, wu̱ ro̱ m-yoose̱ u̱n hun-ne̱, wu̱ ro̱ m-sho̱gbe̱ de o-Urusharima. 23 Wu̱ ken wu̱ citu̱ru̱ wu̱, “Go̱s-wu̱, ¿hun-ne̱ hiin o̱ Shir he m-gu?”

Ye̱so shasu̱ru̱ ye̱, 24 “No̱m no̱ m-se̱nge̱ no̱ cu̱w ya o-ish o-re̱k yo, remen hun-ne̱ de̱e̱n a se̱nge̱ ye̱ cu̱wu̱t amba ye̱a hoks á. 25 Wa-o-hur a ine̱ wu̱ tigu̱te̱ ish, ka da-de no̱ es n-do̱ u̱n ko̱'o̱t u̱n ish no̱ m-ze̱e̱, ‘teksu̱ te̱ ish.’ Wu̱a shes no̱, ‘Me̱ nap no̱ á!’ 26 Ka da-de no̱ shes, ‘Te̱ re̱e̱g, te̱ su̱ u̱n wo̱ ne̱, o yooste̱ u̱n bo̱-o te̱!’ 27 Amba wu̱a zee komo, ‘Me̱ nap no̱ á. Ine̱ no̱ be u̱n de. Kap no̱ yan-me̱n-u̱t jaas-to̱!’† 13:27 Hyen komo: Bo̱ng 6:8. 28 Kane̱ no̱ he u̱s-kan no̱ ti-m yin da-o̱ no̱ he Ibrahi m-hyan à u̱n Ishaku, Yakubu u̱n kap yan-Rwo̱r u̱n Ma-to̱ Shir ne̱ n-me̱ u̱n gwo̱mo-to̱ Shir, amba Shir a 'ye no̱ ish-o m-co̱w á!‡ 13:28 Hyen komo: Mati 22:13; 25:30. 29 Hun-ne̱ a haan rwu̱u̱n-mo̱ u̱r-ho̱ran u̱r-ho̱rim ne̱, so̱ o-ye'er u̱n so̱ o-baar ne̱, ye̱a she'et be-de u̱n biki-o̱ u̱n gwo̱mo-to̱ Shir.§ 13:28-29 Hyen komo: Mati 8:11-12. 30 No̱a hyen, ka ye̱ hun-ne̱ 'yare̱ à, Shir a go̱ks ye̱, komo ka ye̱ hun-ne̱ go̱kse̱ à, Shir a 'yarag ye̱.”* 13:30 Hyen komo: Mati 19:30; 20:16; Mark 10:31.

31 U̱n ka da-o̱ hond hond ye̱ ken Parisa-ne̱ ye̱ haanu̱ru̱ be-u̱r Ye̱so, ye̱ ze̱e̱ru̱ wu̱, “O cu̱ne̱, o yage̱, wo̱a ru m-mo̱ka kane̱ o warag de ken be-de, remen Here̱ [Atipas] co̱no̱g wo̱ m-ho̱.”

32 Ye̱so shasu̱ru̱ ye̱, “Ha no̱ ru̱re̱ Here̱ ká wo̱-yo o-tuk-yo, ‘Me̱ u̱n yan-se u̱n ya-u̱t-ko̱t komo me̱ u̱n ta'as u̱s-go̱m caane̱ u̱n buk ne̱, ho̱-u̱r atette̱-de man kom se̱nge̱-m re.’ 33 Kap u̱n kaane̱ ne̱, man bu̱p o-co̱w caane̱, m-buk, n-yisho̱ ne̱, u̱n no̱m u̱r-bon hun-ne̱ ho wan-rwo̱r u̱n Ma-to̱ Shir de ken be-de á se̱ o-Urusharima.