Yona
Mbuga ogoha gilibu ngarunaga nemandi ogo
Ngode Datagaliwabenaga bi mana latagi haga maru henerume bi mana laminiru gilibu ngarubi ndo mbuga ogoniha Yona ibugua Ngode Datagaliwabenaga mana latagi haga howa lamia nabi wahalu ibida pole manda binigo te ogoni gilibu nga.
Dindi timbuni Niniba winigo ogoniha wali agali hearu ti Isaraeleali waitigi ho howa ti koorene ko bialu heago hondowa Ngode Datagaliwabehanda Yonahondo lalu, Wali agali uruni pani muleberogonaga í̠na bi mbiwia halu lamule pu, lene. Ani layagola Yona ibugua Ngode Datagaliwabehanda wali agali bibahendeore dara howa biamogo biaga ka mitangi buwa Niniba wali agalihondo pani namulebadago manda buwa bi lamule pobe manga hene. Ani manda bu hearia mbira tara tara nahendene ale Yonahondo binirunaga te gilibu nga. Mani Yonahanda bi mbiwia hayago lola naheyagola ibu keba henego te gilibu nga.
Bi ogoniha gilibu ngarunaga tene Ngode Datagaliwabe ibugua bibahende wabini ngaru anduane ibuni ka, lalu walia ho nga. Ibugua wali agali bibahendeore ta nabihondo gubalini halu dara howa biamogo biaga kago walia ho nga. Ibunaga wali agali karunaga waitigi karu bo wahole hame nale tibi gubalini howa biamogo bule hamelo kago walia halu gilibu nga.
Bu̱lu̱baga buwa kuni uru gilibu ngago
1.1-17
Ngode Datagaliwabehanda Yona olenenagabi Yona ibugua wahalu pole binigonagabi gilibu nga. 2.1-10
Yona mini beregedenegonagabi Ngode Datagaliwabehanda ibu pele minigonagabi gilibu nga. 3.1-10
Niniba dindi pialu Yonahanda bi latagi henegonaga gilibu nga. 4.1-11
Ngode Datagaliwabehanda Niniba wali agali dara henegonaga gilibu nga.
1
Yonahanda Anduane Homogonaga bi layago hale howa mo wahenego ogo
1 Horo mbirungi Anduane Homogohanda Amidai igini Yonahondo bi mbira lamini.✡ 2 Kin 14.25 2 Ibugua lalu, Niniba dindi timbuni amugoria wali agali ogoriani karume mana ko ngubiore bialu kago i̱ manda bu ko, laya lalu ga̱ lalu lamule pobe, lene. 3 Ani layago hale howa dege Yona ibu Anduane Homogonaga bi mo wahalu ibida polenaga hariga tara mendeha pudai bini. Ibu Yoba dindi dalipe halu hearia iba sibi mbira Sebena dindi pole lowa piyaria handa walia hene. Hondowa muni mialu maru berearu heba birule iba sibi biagoha ubanda hene. Ogoni Anduane Homogo yu wahalu pole manda buwa ani bini.✡ Yos 19.46, 2 Bit 2.16, Iba 139.7-10, Iba 139.7-10, Yna 4.2, Ab 9.36
4 Ani bialu hearia Anduane Homogohanda puyabu hongoheore iba solowarani ibilene. Ani biyagola dalubi puyabubi iba yaribubi hongohe gibiore biyagome iba sibi biago podobaga bibahe wini.✡ Iba 107.25 5 Ani biyago hondowa iba sibi biagoria berearume gi timbuniore howa tini hangu hangunaga damame ti biamogo bilo lowa olagalaga bini. Ani bialu howa iba sibi biago yabia bilonaga mbirale maru ibaha mo ba pebe bini. Maru ti ani bialu heaha Yona ibu iba sibi tamu habaneha dalipe howa u palia hondo hene.✡ Ab 27.18-19, 27.38
6 Ani biaria iba sibi hondo haga biagome puwa lalu, O biragoni nde ogo ale bira lole ndo ka̱lo padebe. Ai heyalu í̠naga dama olole pu. Ibugua ina dara halu nahomoloma̱ya biamogo bulebira badago, lene.✡ Iba 107.28
7 Iba sibini biabe biaga biaru tini lamigimigi bialu lalu, Ai ina mogo lene gibi o biragoni nde ai hondowa binidabe handami̱ya tiari yama, lowa yarimiya. Yalu hemiria tiari Yona ibuha yagi pene.✡ Yos 7.14-16, 1 Sml 10.20-21, Ab 1.26 8 Ani piyago hondowa tigua Yonahondo lalu, Ai o biragoni langi naberego. O biragoni tene aiwa binigomedabe. Í̠ biabe agi biaga kebe. Í̠ dindi ani aligo kebe. Í̠ hameigini ago ariabe, lalu hale hene.
9 Ani layagola Yonahanda ladai bialu lalu, I̱ Hiburu tene ko, lene. Anduane Homogo hari daligabi dindibi iba solowarabi wabini dahuliya andaga kago mitangi bialu ibu mini yaraga haruli, lene. 10 Ani lowa Yona ibugua, I̱ Anduane Homogo wahalu pole pialu hewariago o biragoni i̱ hondowa bira, lalu lamini. Ani layagola hale howa iba sibi biagoria berearume gi timbuniore howa Yonahondo lalu, Ogoni hiriribiore bialu harida, lene.
11 Ani lalu heagola dalu puyabubi iba yaribubi biyagoni bia timbuore hayagola tigua Yonahondo lalu, Gibiore o biragoni nabilo iname í̠hondo agi bulene ngabe, lene.
12 Ani layagola Yonahanda ladai bialu lalu, Ai uru-o dalu puyabubi iba yaribubi gibi o biraruni tene i̱ hondowa bialu ngago uruni nabilo tí bayale pole i̱ iba solowara nigoniha minu bape hadaba, lene.
13 Ani layagoni hale howa dege agali biarume nde iba sibi biagoni hongo howaore tanguima pialu iba angeni ubade hole manda bini. Ani bule lowa biyariabi nabibeheore halu dalu puyabubi iba yaribu biyagobi gibiore halu iba angeni ubade habe naheore bini. 14 Ani dege bialu ai hongo piai hayagola ai wahalu Anduane Homogohondo bi lalu au lene. Anduane Homogo-o iname agali ogo homelo ibaha minu bape haramagonaga í̠na ina nde homoloma̱ya pani ngia dai buleni. O beremagoni bibahende tene í̠na howa beregoni iname ndo berama, lamini. 15 Ani lowa tigua Yona minu muwa iba solowaraha bape hene. Aniore biagola dalu puyabubi iba yaribubi timbu gibi o bialu wiyagoniore nabi nimulope hene. 16 Ani biyago hondowa agali biarume Anduane Homogo hondowa gi timbuniore howa ibuhondo mbirale bo lomabia howa delalu tigua Anduane Homogo ibunaga biabeore bialu hole lalu bi lo wini.
17 Anduane Homogohanda wena timbuniore mbira dabowa ogonime Yona mo mbedogo bilene. Ani biyagola Yona ibu horo tebiru mbi tebiru lowa wena tombeha wiai hene.✡ Md 12.40