1 Bie méifodo monámona jɨáɨe ángel daɨnámɨe, Juzíñamui abɨ ímɨe ana bíllana cɨódɨcue. Afémɨe aillo rɨ́ino dɨga bite. Afe llezica ie quenire bóodedo bínɨe egáiñote. 2 Afe llezica afémɨe fɨcɨre úrite; daɨde:

—Aillue Babilonia jofue ja jáɨcoɨzite, ja táɨnocaide. Taɨfe ocuífɨregano illánona jaide. Daje izói nana jɨáɨforiede ɨáɨrede jóriaɨ uíñoracona jaide. Afe izói nana ɨáɨre féedɨno jɨlláɨllɨnona jaide, naa jɨáɨ caɨ éoiga féedɨnuiaɨri. 3 Mei aillo fɨénide ɨ́aɨfuiaɨ afengo fɨnófɨrenado, nana naɨraɨ jɨfáidɨno izói itíaɨoɨza. Iemo naga énɨe illaɨnɨ afengo dɨga aillo jɨruifue izoide ɨ́aɨfuiaɨna fɨnófɨrediaɨoɨ. Bínɨemo ráanɨaɨ fecáfɨredɨno ɨere úcuberedɨnona jáidiaɨoɨ. Mei uafue, afe áillue jofue comɨnɨ izire jɨcaca táɨnomo faɨtátate ráanɨaɨ íaɨoɨ jɨcáfɨrenamona bimacɨ aillo úcubenaidiaɨoɨ.

4 Afe mei monámona jɨáɨe uaina cacádɨcue; daɨde:

—Omoɨ cúeɨedɨomoɨza bie jófuemona oni omoɨ jai; íaɨoɨ fɨnoca fɨénidɨfue afémacɨ fɨ́nua izói omoɨ fɨ́noñeilleza. Daje izói íaɨoɨmo zúite jacɨ́redɨfuiaɨ ómoɨmo jíiriñelleza. 5 Mei afémacɨmo ite fɨénidɨfuiaɨ ofilla ja monamo dúcɨdeza. Iaɨoɨ fɨnoca fɨénidɨfuiaɨmo Juzíñamui ja uíbicaideza. 6 Iemo Juzíñamuina daɨde:

—Jɨáɨmacɨmo íaɨoɨ feca izói, afe izói íaɨoɨmo fecari. Iaɨoɨ fɨeni fɨ́nua izói, afe baɨmo ménacaiño afémacɨmo fɨnori. Afémacɨ ñúemacɨmo erɨ́redena jóoneta jirota izói duere íaɨoɨna fɨnódiaɨoɨ. Afe íaɨoɨ fɨ́nua izói, afe ɨbana ménacaiño afémacɨmo rɨire duere íaɨoɨna fɨnori. 7 Aillo táɨnodo abɨ íaɨoɨ ɨ́ɨnua dɨeze, íemo cómena canóñedemo fáɨfifɨrena dɨeze, áfeze afémacɨna duere fɨnori; afe izói íaɨoɨna duere zefuítari. Mei bie rɨngo izoide jofue comɨnɨ afengo ie comécɨdo daɨífɨredeza: “Benomo illáɨngona ráɨidɨcue. Jaca fécɨnaiñeitɨcue; jaca dúenitɨcue,” —afengo daɨde. 8 Ie jira bie izói úrillamona, dáaruido omo dúide jacɨ́redɨfuiaɨ cómuite: tɨ́illa íemo duere zefuilla, íemo júbie. Iemo iraimo cóonaitɨo. Mei o duere fɨnótate Juzíñamui jamánomo rɨ́inoredeza. Afémɨe jaca caɨ Ocuíraɨma.

9 Afengo dɨga jɨruírede bínɨe illáɨcomɨnɨ, daje izói afengo dɨga cómena canóñedemo fáɨfidɨno aféngori ɨere éenaitiaɨoɨ. Mei uafue, afengo cóonailla uíllɨena cɨóillamona aféngori cáillɨcaillɨ éeitiaɨoɨ. 10 Afengo ɨere duere fɨnóinari jacɨ́naillamona oni jɨca íitiaɨoɨ. Afemona dáɨitiaɨoɨ:

—¡Aɨɨ, nɨɨ o dúerena! Jamánomo rɨ́irede Babilonia jófuedɨo, ¡nɨɨ duere o zefuilla! ¡Mei raɨre dáaruido o duere fɨnoina comuíbicaide! —dáɨitiaɨoɨ.

11 Bínɨe ráanɨaɨ fecáfɨredɨno aféngori cáillɨcaillɨ éenaitiaɨoɨ, mei ja íaɨoɨ atɨca ráaɨe ɨ́baitɨno iñede. 12 Iaɨoɨ atɨ́fɨrega ráanɨaɨ, be nɨɨe: Oro, plata, ráifide nofɨ́cɨaɨ, ‘perla’ daɨna ráifide zírio, ráifide úzecuiro, íemo jíaɨrede ‘sédacuiro,’ morádona eroide seda dɨga, íemo jɨáɨ dɨga jɨáɨfodo zióriede aménaɨaɨ, íemo ebírede ‘marfil’ daɨna elefante zicaɨ fɨnoina ráifide raana, íemo ráifide amena fɨnoina raa, íemo ‘bronce’ daɨna borárede lloébɨcɨ fɨnoina raa, íemo jamai lloébɨcɨ fɨnoina raa, íemo ‘marmol’ daɨna nofɨcɨ fɨnoina raa, 13 daje izói ‘canela’ daɨna güíllemo faɨga raa, íemo jɨáɨforie ráifide ziórede raa, íemo ziórede ugucɨ, íemo ‘mira’ daɨna ziórede raa, íemo come abɨ jɨlláiranɨaɨ, íemo ‘vino’ daɨna jiróraji, íemo cáɨredɨji, íemo ñuera pan fɨnófɨrena harina, íemo trigo, íemo daje izói abɨ́fɨrede cáadɨno, íemo ovéjaɨaɨ, íemo cabálluaɨ, íemo ‘carros’ daɨna arɨ́nellaɨaɨ, daje izói jacɨre rairuica comɨ́nɨna fecádiaɨoɨ. Bie izói daɨna cáadɨno ɨima rɨngo dɨga jɨáɨmacɨmo fecádiaɨoɨ rɨire íaɨoɨ ocuíllena. 14 Afe jofue comɨ́nɨna dáɨitiaɨoɨ:

—¡Baie omoɨ gaɨga caɨmárede amena llɨzíllanɨaɨ izoide ráaɨe jae iñede. Nana omoɨ ofítaga ebíriede ráanɨaɨ ja táɨnocaide! —dáɨitiaɨoɨ.

15 Afe ráanɨaɨ fécajano ɨba úcube ófɨredɨno bie áillue jofue comɨ́nɨmona otíaɨoɨ. Uano aillo úcuberediaɨoɨ. Mei íadɨ aféruido afe jofue ɨere duere fɨnóinari jacɨ́naillamona oni jɨca íitiaɨoɨ. Afénomona aféngori cáillɨcaillɨ éeitiaɨoɨ. 16 Iemo dáɨitiaɨoɨ:

—¡Aɨɨ. Aillue jófuedɨo nɨɨ dúerena! Naui ñuera ráifide úzecuiro jɨtádɨngo izóidɨo. Daje izói o comɨnɨ jíaɨrede ráifide ɨniroi, íemo morádona eroide ráifide ɨniroi jɨtáfɨrediaɨoɨ. Afe llezica oro íena fɨnóritiaɨoɨ; daje izói ráifide nofɨcɨ fɨnoina raana fɨnóritiaɨoɨ, íemo jɨáɨ ‘perla’ daɨna zíriona jɨtáfɨrediaɨoɨ. 17 Iemo dáaruido naado aillo ráanɨaɨ nɨné táɨnocaide.

Daje izói nana ‘barco’ daɨna áillue nocáe ocuídɨllaɨnɨ, naa afécaedo jáidɨno dɨga, áfena jacɨ́ruillano oni jɨ́carie itíaɨoɨ; daje izói afécaedo táɨjɨdɨnori naa jɨáɨfodo monáillajimo táɨjɨde comɨ́nɨri oni jɨ́carie itíaɨoɨ. 18 Iemo afe jofue bóua úillɨana cɨóillano caillɨ́diaɨoɨ:

—Bie izoide naui áillue jófuena, ¿Nɨnomo cɨ́oitɨcaɨ? Bie izoide jofue jaca íñeite, —daɨdíaɨoɨ.

19 Ɨere zúucaillano íaɨoɨ ɨfomo énɨe júdaɨdiaɨoɨ. Daɨí ñiano cáillɨcaillɨ éediaɨoɨ. Daɨdíaɨoɨ:

—¡Aɨɨ! ¡Aillue jofue nɨɨ dúerena! Nana monáillajido ráanɨaɨ fecáfɨredɨno afe ráanɨaɨ o comɨnɨ úamona afémacɨ aillo úcuberediaɨoɨ. ¡Mei íadɨ dáaruido afe áillue comɨnɨ jofue ja nɨné táɨnocailla! —daɨdíaɨoɨ.

20 Afe mei áfena cɨódɨmɨe daɨde:

—Monamo itɨ́nuiaɨ, mai afe áillue jofue táɨnocaillari omoɨ ióbiri. Uáfueza, Jesucristo orécano, naa Juzíñamui dɨbénedo úritɨnori mai ióbiri, naa Juzíñamuimo jaɨnáidɨno dɨga. Mei Juzíñamui afengo nɨné táɨnocaitajado, omoɨ duere zefuítaja ñue jaɨ́cɨna ɨba ote, —daɨde.

21 Afe mei rɨírede Juzíñamui abɨ ímɨe áillue nofɨcɨ caifo raiñode. Afecɨ áillue ‘molina’ daɨna trigo llaira mérede nofɨcɨ fɨnoina eroide. Caifo ráiñuano afécɨna monáillajimo dotade. Dótajano daɨde:

—Afe bie izói áillue Babilonia jofue ana cáicoɨzite, íemona jaca nɨnomo meine cɨ́oñeille. 22 Benómona jaca o cɨ́gɨdo joide iomo ‘arpa’ daɨna rua roia taiga raa rúanɨaɨna meine cácaiñeille. Daje izói totíbacui uai naa bainada uai dɨga ja meine cácaiñeille. Afe izói nana jɨáɨforie táɨjɨana baitádɨnomona buna fɨébiñena. Iemo daje izói dobérilla fɨcɨ́rena izói ‘molina’ daɨna nofɨcɨ uaina cácaiñeille. 23 Afe daje llezica o jófuiaɨ eromo bóofɨrede mechera izói boode ráanɨaɨ abɨdo bóoñeite. Iemo aféruimo áɨrena llezica ɨráɨzie caɨmare fɨ́cɨrerie íaɨoɨ úrilla uáillaɨna meine jaca cácaiñeille. Mei naui omo ite ráanɨaɨ fecáfɨredɨno bínɨe comɨ́nɨmona jamánomoidiaɨoɨ íadɨ, ja birui afe caɨmárede uaillaɨ cácaiñeille. Naui aféruimo aima bífuefɨrena uai izóidedo náɨraɨaɨna jɨ́fuefɨredɨo; mei íadɨ afe jɨ́fuefɨrena ona nabáiñede.

24 Mei uafue, afe o jofue cɨ́gɨmo Juzíñamui dɨbénedo úrifɨredɨno dɨ́ena cɨona. Daje izói Juzíñamuimo jaɨnáidɨno naa jɨáɨe bínɨemo fagano dɨ́ena afénomo cɨona. Afe cɨona dɨe, afe jofue comɨnɨ jɨáɨmacɨ tɨ́taja ɨ́coɨnia daɨí illa jana, —daɨde.