1 Bifue uire íitɨfuiaɨ jino cɨ́otainafue. Juzíñamui bífuiaɨna Jesucrístomo cɨ́otate, afémɨe ie ocuífɨreganomo ácatallena. Daɨí Cristo uáfuena raɨre íficaitɨfuena jino íaɨoɨmo ácatate. Jesucristo ie ángel daɨna abɨ ímɨedo bie jino cɨ́otagana ie ocuífɨregamɨe Juaamo onótate. 2 Afe Juan nana ie cɨónana uáfuena jino llote. Daje izói afémɨe Juzíñamui lloga uaina nabáifɨrede. Afe Juzíñamui lloga uai Jesucrístodo ñue jaɨ́cɨna llócaiga. 3 Bie Juzíñamuimona oga uaina jɨáɨmacɨmo facáduana cacádɨno caɨmare itíaɨoɨ. Daje izói bie rabénicomo cuega uaina cacáillano ñue náfuetɨno caɨmare ióbitiaɨoɨ. Mei bie rabénicomo llogáfuiaɨ zúitɨrui ja áɨnozideza.

4 Asia énɨemo ite siete dɨ́gade iglésiaɨ daɨna Juzíñamuimo gáɨrifɨredɨnomo cuetɨcue. Cue Juáadɨcue. Mai Juzíñamui ñúefuiaɨ dɨbénemo, naa ie caɨmare uái illafue dɨbénemo omoɨ iri. Mei afe Juzíñamui birui itɨ́mɨeza, íemo jaca nanómona jaiai itɨ́mɨeza, íemo uire jaca nɨnomo íitɨmɨeza. Daje izói ie ráɨirano uícomo siete dɨ́gade ñuera jóriaɨ ite. Afe jóriaɨ Juzíñamui Ñuera Joreño jana. Afémɨe ñúefue dɨbénemo omoɨ iri. 5 Iemo daje izói Jesucristo lloga ñúefuiaɨ jeire omoɨ oíri. Afémɨe jɨáɨfo méidofɨnide uai nabáiraɨma. Daje izói afémɨe nano tɨ́illanomona abɨdo meine tɨ́iñellena cáatagamɨe. Iemo jɨáɨ afémɨemo bínɨe illáɨcomɨnɨ ocuilla rɨ́ino ite. Afe Cristo caɨna izíruillano ie totaca dɨ́edo caɨ fɨénidɨfuiaɨna oni dote. 6 Iemo nane illáɨcomɨnɨna caɨna itátate ie Moo Juzíñamuimo caɨ jaɨnáillena. Daje izói comɨ́nɨdo Juzíñamuimo úrifɨredɨnona caɨna jóonete. Afe Juzíñamui íena jóonegacaɨ. Ie jira jaca nɨnomo áillue ébifue naa ocuilla rɨ́ino dɨga afémɨe íena íteza. Aquíe izóideza.

7 ¡Ero, Cristo mona uíllɨedo bite! Nana comɨnɨ íena cɨ́oitiaɨoɨ. Daje izói ie fatɨno íena cɨ́oitiaɨoɨ. Iemo nana bínɨe naɨraɨ afémɨe bíllana cɨ́oillano éenaitiaɨoɨ. Jɨɨ, uafue daɨítadeza.

8 Caɨ jamánomo rɨire Ocuídɨmɨe bie izói daɨde: “Nana ráfuiaɨ naɨ cómuiñenia uícodo itɨ́mɨedɨcue. Daje izói fuizájillanomo itɨ́mɨedɨcue. Abecedario A-do táɨnia izói nánoramɨedɨcue. Daje izói abecedario Z-mo fuizailla izói íiraɨmɨedɨcue,” daɨde. Afémɨe birui itɨ́mɨe, íemo jaca nanómona itɨ́mɨe, íemo uire jaca nɨnomo íitɨmɨeza.

9 Omoɨ ama Juáadɨcue. Omoɨ duere zefuilla izói daane duere zefuídɨcue. Daa omoɨ izói Juzíñamui illáɨmana illánomo jaɨnáidɨcue. Iemo Jesucristo omoɨ úiñotaja izói daa omoɨ dɨga úiñotagacue. Jesucrístodo faɨríotaga Juzíñamui ñuera uai jino cue llócailla jira llavécacue. Pátmosmo mámecɨrede monaillai cɨgɨ ídumo llavécamɨedɨcue. 10 Iemo afénomo caɨ Ocuíraɨma caɨ ocózinaitaruimo Juzíñamui Ñuera Joreño náamatagacue. Afe llezica vudugoɨ fúunua izoide fɨcɨ́rede uaina cue méifomo cacádɨcue. 11 Afe uai cuena daɨde:

—Naga ráfuiaɨ uícodo itɨ́mɨedɨcue. Daje izói fuizájillanomo itɨ́mɨedɨcue. Abecedario A-do taɨneca, íemo Z-mo fuilla izóidɨmɨedɨcue. Mai nana o cɨona dɨga daa rabénicomo cúeiri. Cuiano, Asia énɨemo ite siete dɨ́gade iglésiaɨ daɨna Juzíñamuimo gaɨrífɨredɨnomo o oreri. Afe jófuenɨaɨ mámecɨaɨ: Efeso, íemo Esmirna, íemo Pérgamo, íemo Tiatira, íemo Sardis, íemo Filadelfia, íemo Laodicea, —daɨde.

12 Bu cuemo úrilla daɨíllena abɨdo gɨ́recaidɨcue. Gɨ́recaillano, siete dɨ́gade oro fɨnoina mechérana cɨódɨcue. 13 Afe cɨ́gɨmo cómemona comuídɨmɨena eróidena cɨódɨcue. Afémɨe jɨtáoigaroi éɨba ɨ́coɨmo dúcɨde. Ie jogóbemo lláɨidɨfe oro fɨnoina. 14 Afémɨe ɨfótɨraɨ ɨere úzerede, jaɨllɨcɨ úzerena izói úzerede. Iemo jɨáɨ nieve izói úzerede. Ie ui irai bóua izói cɨ́oide. 15 Afémɨe éɨba ñue queníretaga bronce izói quenírede. Ua bronce iraimo ruílla llezica jamánomo quenírena izói, ie ɨdaɨ quenírede. Iemo aillo imánillaɨ nofɨco tua fɨcɨ́rena izói ie uai fɨcɨ́rede. 16 Afémɨe onoɨ nabézimo siete dɨga ucudu llɨ́ide. Ie fuémona ɨere jáirede llojéfai izoide raa jino billa; afefai nágafene jáirede. Ie uiéco jitoma ɨere rɨire egáiñua izói rɨire egáiñote.

17 Afémɨena cɨ́oillano, ie anamo tɨ́idɨmɨe izói baɨídɨcue. Mei íadɨ afémɨe ie nabezi cuemo bɨ́tano cuena daɨde:

—Jacɨ́ruiñeno o iri. Cue bie nanóidɨmɨedɨcue; dáamɨedɨcue fuizájillanomo íitɨmɨedɨcue. 18 Birui cáadɨmɨedɨcue. Mei naui tɨ́idɨcue, mei íadɨ birui jaca nɨnomo cáaitɨcue. Tɨ́illa zuitara llave izoide raa cuemo ite; daje izói tɨ́idɨno illano llávenɨaɨ cuemo ite. 19 O cɨona dɨga mai cúeiri; birui itɨ́fuiaɨ cúeiri, íemo uire cómuitɨfuiaɨ cúeiri. 20 Cue nabézimo o cɨona siete dɨ́gade ucúduaɨ rafue naui báinino ite. Ja birui jino uáfodo llórede; daje izói siete dɨ́gade mechera rafue llórede. Afe siete dɨ́gade ucúduaɨ siete dɨ́gazie Juzíñamuimo gaɨrídɨno uai llócaitɨno jana. Iemo afe siete dɨ́gade mechera siete dɨ́gazie Juzíñamuimo gaɨrífɨredɨno jana, —daɨí afémɨe cuena daɨde.