1 Cˀoa⁴-sˀin² ntsˀe³, cˀoe³tsˀoa²³-no³ xi³ to⁴tˀa³tsˀe⁴ cjoa⁴ma⁴ta³con²-le⁴ Ni³na¹, nca³ coi⁴ncha³va³saon³ yao³-no³ nca³ cˀoai⁴tˀa³-lao⁴³ Ni³na¹ je² yao³-no³ jo³-ni³ jnco³ cjoa⁴tjao² xi³ ti¹jna³con³, xi³ tsje³, xi³ sa³sen¹-le⁴ Ni³na¹. Cˀoa⁴²-sˀin² ma³chjen¹-lao⁴³ Ni³na¹ cao⁴ ni⁴ma⁴-no³. 2 A³li² cˀoa⁴-jin²sˀin² ma³nquin¹cao⁴³ yao³-no³ jo³ tjin¹ cjoa⁴ son³ˀnte³-vi⁴. Ca²ta³vˀa³ntjai²yao³ yao³-no³ nca³ coan⁴cho⁴tse⁴ya³nta³ nqui²jnco³cˀa²-ni³ cjoa⁴fa³ˀai³tsjen³-no³, jme¹-ni³ nca³ jcha⁴-si¹nio³ jme³-ni³ xi³ Ni³na¹ me³-le⁴, jña³-le⁴ xi³ nta³, xi³ sa³sen¹-le⁴, xi³ ña³qui³ tji¹jnco³. 3 Cˀoa⁴xin³-no³ nca³ jnco¹jnco¹ xi³ ti³yo³-vi⁴, xi³ to⁴tˀa³tsˀe⁴ cjoa⁴nta³ xi³ tsa³cˀai²-na³, nca³ tsi² ˀya³ xi³ nqui²sa⁴ nˀion¹ ncˀa³ si⁴²cja³ˀai³tsjen³-le⁴ yao³-le⁴ cao⁴-ni³ tsa² xi³ jo³-sˀin² nca³ va³quin²-le⁴, to⁴nca³ cˀoa⁴-sˀin² ca²ta³si¹cja³ˀai³tsjen³jin³ nca³ ni⁴ncˀa³-jin² cˀoa⁴ ni⁴na³nqui³-jin² si⁴²cja³ˀai³tsjen³ xi³ tˀa³tsˀe⁴ yao³-le⁴, to⁴nca³ jo³-sˀin² choa⁴ xi³ Ni³na¹ qui³tsjoa³-le⁴ nca³ jnco¹jnco¹ nca³ coan³cjain¹-le⁴. 4 Jo³-sˀin² cjoan³ yao³-na¹ nca³ ncjin² jco⁴ya³ tjin¹-le⁴, to⁴nca³ nca³yi³je³ jco⁴ya³-le⁴ yao³-na¹ a³li² to⁴jnco³-jin² xa¹ tjin¹-le⁴ xi³ to⁴nco¹son². 5 Cˀoa⁴-sˀin² xi³ to⁴tˀa³tsˀe⁴ Cristo to⁴jnco³ yao³ nia¹, nta³ tsa² ncjin² ma³-nia¹, to⁴nca³ nca³tsˀia³² nca³ jnco¹jncoa¹ xi¹ncjin¹ ma³-ni³ yao³-na¹. 6 Cˀoa⁴-sˀin² cja⁴ˀai¹-nca¹ cjoan³ cjoa⁴tjao²-le⁴ Espíritu Santo xi³ tjin¹-le⁴ nca³ jnco¹jnco¹. Jo³-sˀin² qui³tsˀai²-le⁴ cjoa⁴nta³-le⁴, cˀoa⁴-sˀin² ca²ta³si¹chjen¹. Tsa² cjoa⁴tjao²-ve⁴ nca³ nchja⁴ya³jin³-ni³, ca²ta³si¹chjen¹ jo³-sˀin² choa⁴-le⁴ nca³ ma³cjain¹-le⁴, 7 a³xo⁴ tsa² je² cjoa⁴tjao²-ve⁴ nca³ si¹xa¹, ca²ta³si¹chjen¹ jo³-sˀin² vˀai²-le⁴ nca³ si¹xa¹, a³xo⁴ je² xi³ va³co¹ya³, cˀoa⁴-sˀin² ca²ta³si¹chjen¹ jo³-sˀin² vˀai²-le⁴ nca³ va³co¹ya³. 8 Je² xi³ vˀe¹tˀain³, ca²ta³si¹chjen¹ jo³-sˀin² vˀai²-le⁴ nca³ vˀe¹tˀain³. Je² xi³ si¹cˀa³vi¹ cjoa⁴tjao², cˀoa⁴ca²ta³sˀin¹ cao⁴ cjoa⁴nta³. Je² xi³ ma³ nca³jco⁴-le⁴, nta³ ca²ta³si¹coi²nta⁴. Je² xi³ ma³ma⁴que³, cˀoa⁴ca²ta³sˀin¹ cao⁴ cjoa⁴tsjoa³. 9 Je² cjoa⁴tjao²cha³ xi³ ña³qui³ cjoa⁴qui²xi⁴ ca²ta³ma³. Chˀao³cha³ ca²ta³mao³ xi³ chˀao³ tjin¹, nˀion¹ ta³nquin¹tˀa³-lao⁴³ xi³ nta³ tjin¹. 10 Ca²ta³ma³tsjoa³chao³ xi²nquio⁴³ jo³-ni³ nca³ ntsˀao³. Nqui²sa⁴ ti¹tjon² jcha⁴xcon¹³ xi³cˀa³ jo³-ni³ tsa² ti⁴jon²-nio³. 11 A³li² tsˀe²-jion²³ xi³ nˀiaon²³, ti⁴xi¹ti¹yao³, tsjoa³cjoa⁴ ca²ta³mao³ cao⁴ Espíritu Santo, cˀoa⁴ jo³-ni³ cho⁴nta³-sˀin² ti⁴xa¹-lao⁴³ Nai³-na¹. 12 Cjoa⁴tsjoa³ ca²ta³sˀe³-no³ xi³ tˀa³tsˀe⁴ xi³ cho³ya²-lao⁴³, cjoa⁴tse³jta³ ca²ta³sˀe³-no³ xi³ tˀa³tsˀe⁴ cjoa⁴ñˀain³ xi³ ti³chja³ˀao²³, tˀe²tsˀoa³ntsjao²³. 13 Tˀai²-lao⁴³ jme³ xi³ ma³chjen¹-le⁴ cho⁴ta⁴-le⁴ Cristo, tˀai²ˀnte³-lao⁴³ cho⁴ta⁴ xi³ xin² fa³ˀai³-ni³. 14 Ti⁴chi³con³tˀaon³ je² xi³ chˀao³ fi²cao⁴-no³, ti⁴chi³con³tˀain³-nio¹³ a³li² no²cjoa⁴ˀaon³-jin²lao⁴³. 15 Ti⁴tsjoa³cao⁴³ ˀya³ xi³ ma³tsjoa³-le⁴, chji¹ˀnta¹cao⁴³ ˀya³ xi³ cji³ˀnta¹. 16 To⁴jnco³ cjoa⁴fa³ˀai³tsjen³ ca²ta³sˀe³jin³-no³ nca³ jon², a³li² ncˀa³con³-jin² mao³, to⁴nca³ mi²yo⁴ tˀiaon⁴³ cho⁴ta⁴yo⁴ma⁴, a³li² nˀo²sje³ncˀa³-jion²³ yao³-no³. 17 A³li² chˀao³-jin² ni²cao⁴³ je² xi³ chˀao³ si¹cao⁴-no³, ti⁴coi²ntao⁴³ xi³ nta³ tjin¹ nqui³xcon⁴ nca³tsˀi³ cho⁴ta⁴. 18 To⁴jo³ cji³ nca³yi³je³ xi³ coan⁴-no³, cˀoa⁴tˀiaon⁴³ jme¹-ni³ nca³ nchˀan¹ coi⁴yo³-si¹nio³ cao⁴ nca³tsˀi³ cho⁴ta⁴. 19 Jon² xi³ tsjoa³que⁴-no³, a³li² ni²jnta²-jin²nio³ nca³ ti⁴jon²-nio³, to⁴nca³ tˀai²ˀnte³-lao⁴³ Ni³na¹ cao⁴ cjoa⁴jti³-le⁴, nca³ cˀoa⁴-sˀin² tji¹tˀa³: An³ xi³ si³jnta²³-nia³, an³ cˀoe³chji¹-nia³, tso² Nai³-na¹. 20 Tsa² co²ntran⁴-li⁴ xi³ vao³-le⁴, ti⁴cjain²³. Cˀia⁴ tsa² fa³ti²-le⁴, tˀai²-lai⁴ xi³ scˀoi¹. Tsa² cˀoa⁴nˀiain²³, vi³ncha³nto³soin²³ jco⁴ co²ntran⁴-li⁴ xo¹lˀi¹-ve⁴. 21 A³li² je²-jin² si⁴²qui³njen³-li² xi³ chˀao³ tjin¹-ve⁴, to⁴-nca³ ti⁴qui³njen³-lai⁴ xi³ chˀao³ tjin¹ xi³ to⁴tˀa³tsˀe⁴ xi³ nta³ tjin¹.