1  Tayta Dios, munayniquiwan yanapaptiquimi rayga cushisha caycan.

Fiyupa cushishami caycan pillyacho binsinanpaj yanapashayquipita.

2 Yarpashancunata camacächishcanqui.

Mañacushushayquitami cumlishcanqui.

3 Bindisyunta gonayquipämi taripashcanqui.

Gori corönatami jatiparcushcanquipis.

4 Cawananpaj mañacamushuptiqui yanapashcanqui.

Achca wata cawananpämi bindisyunta goshcanqui.

5 Yanapashayquipitami pï-maypis rejsin.

Yanapashayquipitami rispitädupis caycan.

6 Imaycamapis alli cawananpämi bindisyunta goshcanqui.

Gam yan'gaptiquimi fiyupa cushisha goyaycan.

7 Rayga Tayta Diosmanmi yäracun.

Tayta Dios cuyacoj captin payman yäracun.

Chaymi imaypis mana allimanga mana chayangachu.

8 Tayta Dios yanapäshushayquipitami llapan contrayquicunata binsinquipaj tayta ray.

Derëchu caj maquiquimi llapan chiquishojcunata binsenga.

9 Chayamushpayqui fiyucunataga llapantami rataycaj jurnuman gaycunquipaj.

Tayta Diosnami rabyasha cashpan ninawan ushajpaj illgarachenga.

10 Fiyu runacunapa wamrancunataga illgarachengami.

Chay runapita mirajcunataga ushajpämi usharenga.

11 Chay runacuna imata rurashuyta munashpanpis

imata rurashuyta yarpashpanpis

manami imatapis rurashunquipächu.

12 Chaynöga canga paycunata magaj yaycur binsiptiquimi.

Lëchayquiwan apuntaptiqui paycunaga gueshpirmi aywaconga.

13 ¡Tayta Dios munayniyoj cashayquita llapanta musyaycachiy!

¡Chaypitami nogacunaga cushicur alabansacunawan alabashayqui!