1 I’ hak Jesus Christ‐nihqat tuptsiwhqa hapi God aṅqw tihtiwṅwu. Pu hak haqam God Itanay aw unaṅway’taqa piw put tímuyatuy amumi unaṅway’tani. 2 Itam God aw unaṅway’k̇ahk̇aṅw put tutavoyat aṅ hinwise’ pep pu’ itam put tímuyatuy amumi unaṅway’yuṅqey navoti’yuṅwni. 3 Kurs itam God aw unaṅway’yuṅwe’ itam put tutavoyat aṅ hinwisni. Noqw put tutavoat qa maqsonhinta. 4 I’ hak God ahpiy tihtiwhqa yep qatsit tunatyayat áṅwuy’taṅwu. Noqw yan hapi itam yep qatsit áṅwuy’yuṅwni‐God aw tūtuptsiwee. 5 Noqw ya hak yep qatsit tunatyayat áṅwuy’tani? I’ hak Jesus God Tíyatnihqat tuptsiwhqa hapi.

6 Ura Jesus Christ pítuhqe kūyit akw‐nik̇aṅw pu uṅwat akw tuvoylati, qa kūyit akw‐sanit, pi kūyit akw‐nik̇aṅw pu uṅwat akw’a. Noqw Hikwsi hapi put pantaqat tuawi’ta. Noqw pam hapi pas qa atsa. 7 Pi pahyom ōveqatsit ep Jesus Christ tuawi’yuṅwa‐i’ Náata, pu Lavayiat, pu Hikwsi Qahováriwtaqa. Noqw ima pahyom pay suhk̇aa. 8 Pu pahyom tūwaqatsit ep Jesus Christ tuawi’yuṅwa‐i’ Hikwsi, pu kūyi, pu uṅwa. Noqw ima pahyom sun lavayi’yuṅwa. 9 Itam pay sinmuy tuawiyamuy kwusuya. Nihqe tis ōviy itam God tuawiyat kwusuyani. Noqw pam hapi Jesus Christ put Tiatnihqat paṅqawu. 10 Ason hak God Tiyat aw tuptsiwhq God Hikwsiat put unaṅwpeq qátu, nihqe put pantaqat tuawi’ta. Noqw pay God qa tuptsiwhqa hapi pam átsanihqat pan put yukuna, ispi God Tiy hin tuawi’taqat pam qa tuptsiwhqee. 11 Noqw yan hapi God itamuy āawna: Pam itamuy qatsit qaso’taqat huyta, it qatsit put Tiyat epnihqata. 12 Tiyat kwusi’taqa hapi qatsit kwusi’ta. Pu i’ hak God Tiyat qa kwusi’taqa hapi qatsit ṅastaa.

13 Nu hapi umuy God Tiyat aw tuptsiwni’yuṅqamuy amumi īit penta. Noqw uma put aṅ túṅwantote’, uma God Tiyat aw tūtuptsiwaqe qatsit qaso’taqat himuy’vayaqey navoti’yuṅwni. 14 Noqw itam put aw tuptsiwni’yuṅqw, put tunatyayat an hihta ōviy itam put tūviṅtotaqw, pam itahnawakinpiy navotni. 15 Noqw itam put itahnawakinpiy aw tuqayvastaqat navoti’yuṅqw, itam put aw nāp hihta tūviṅtotaqw pam itamuy put máqani. 16 Kurs uhsinosṅwa qaanhtiput pay mokiwuy aqw qa pitsíwtaqat hintsakq um put aw tayte’ pay um put eṅem tūviṅtani. Noqw God put qatsit máqamantani, kurs pam mokiwuy aqw qa pitsíwtaqat qaanhtiput hintsakniq’ö. Pas antsa kurs hin hak qa mokiwuy aqw pitsíwtaqat qaanhtiput hinhtini. Noqw kurs hak pan qaanhtiqw, um put eṅem tūviṅtaniqat qa putwat nu paṅqawu. 17 Sohsoy qaantsatskiwhqa hapi qaanhtipu. Noqw soon sohsoy qaanhtipu mokiwuy aqw pitsíwtani. 18 Itam navoti’yuṅqw i’ God ahpiy tihtiwhqa qaanhtiput aṅ qa hinma, pi God Tiat put aw tunatyawtaṅwuniq’ö. Noqw Nukpana put aw qa hintsakṅwu. 19 Noqw itam hapi God tímatnihqey navoti’yuṅwa. Noqw yep qatsit tunatyayat aṅ hinwisqam sohsoyam it hakiy qalolmat akw tuyqawiwyuṅwa. 20 Itam navoti’yuṅqw God Tiat pítuhqe itamuy suyan unaṅwtalwuwnitoyna. Noqw ōviy itam God pas antsanihqat tuwi’yuṅwa. Noqw itam it hakiy pas antsanihqat aṅ yēse, pu Tiyat Jesus Christ aṅ’a. Pam hapi pas antsa God. Noqw itam put aṅ yesk̇ahk̇aṅw qatsit qaso’taqat himuy’yuṅwa. 21 Itimhohyamu, uma hihta wutsit aw nāwakintiwhqat qa aw may’yuṅwni. Pas antsaa.