1 हे वार्टुरा अदिक आकतींगेरा, ईग ना नीमी याद दिलुसोद चाहसतीन अदा खुशखबरी केळ्सतीन जो पयला केळ्स बुटीन, यारी नीव अंगीकार भी माळदीर अदिक यदुर दा नीव स्थिर भी आईर. 2 अदुर्दा द्वारा नीम्द उद्धार भी आगतद, अगर आ खुशखबरी इक जो ना नीमी केळ्सीदिन ध्यान दा ईटतीर; ईदारा नीम विश्वास माळोद बेकार आत.

3 ईदा कारण ना सब से पयले नीमी अदा मात पहुचुसदीन, जो नान हात्‍ती पहुचुसीत ईद पयला महत्वपुर्ण हुन कि पवित्रशास्त्र अन वचन इन अनुसार यीशु मसीह नाम पापगोळ साटी सोतोदुन, 4  ✡ १५:४ मत्ती १२:४०; प्रेरितगोळ २:२४-३२अदिक नळ्सकु आदुन, अदिक पवित्रशास्त्र अन अनुसार तिसरा दिशी जित्‍ता भी आदुन, 5  ✡ १५:५ लूका २४:३४; मत्ती २८:१६,१७; मरकुस १६:१४; लूका २४:३६; यूहन्ना २०:१९आव कैफा अक अदिक हन्नेळ प्रेरितगोळी कांळ्सदुन. 6 बाक आव अईद सौ से यक्कुल विश्वासी वार्टुरी सांगुळल्या कांळ्सदुन, यारदा टु हापाळ सा ईगासताका जित्‍ता आर पर येनारा मंळसा सोतोग्यार. 7 बाक आव याकूब उक कांळ्सदुन आग सप्पा प्रेरितगोळी कांळ्सदुन.

8  ✡ १५:८ प्रेरितगोळ ९:३-६सप्पा मुंदुर बाद्दा नानी भी कांळ्सदुन, जो मान्सी समय इन पयला पैदा आगीदान. 9  ✡ १५:९ प्रेरितगोळ ८:३यतिकी ना प्रेरितगोळ दा सब से स्याणेव आईन, बल्‍की प्रेरित अनोद योग्य भी हैलेच, यतिकी ना परमेश्वर उन मंडली इक सतुसीदीन. 10 लेकीन ना जो येनारा भी आईन, परमेश्वर उन अनुग्रह देल आईन. आऊन अनुग्रह जो नान मा आत, अद बेकार आगीदील; लेकीन ना आ सप्पा मुंदुर से वाळुसकु मेहनत भी माळदीन: तरी भी ईद नान दी टु आगीदील लेकीन परमेश्वर उन अनुग्रह देल जो नान मा ईरोद. 11 इदुरसाटी चाहे बाक ना आगुल, चाहे बाक आंदुर आगुल, नाव सब ईदा प्रचार माळतेव, अदिक इदुर मा नीव भी विश्वास माळदीर.

12 इदुरसाटी याग भी यीशु मसीह अन्द ईद प्रचार माळकु आगतद कि आव सोत्‍तुर दा टु जित्‍ता आग्यान, रा नीम दा टु यास मुंदुर ह्यांग अनतार कि सोत्‍तकु मंळसा जित्‍ता आग अच सकालुन? 13 अगर सोत्‍तुर मंळसा अन्द जित्‍ता आगोद अच ईलच, रा मसीह भी जित्‍ता आगीदील; 14 अदिक अगर मसीह जित्‍ता आगीदील, रा नाम्द प्रचार माळोद भी बेकार आद, अदिक नीम्द विश्वास भी बेकार आद. 15 इदुर से भी वाळुसकु नाव परमेश्वर उन ख्वाटा गवाह ठहरूसेव; यतिकी नाव परमेश्वर उन बारा दा ईद गवाही कोट्टेव कि आव मसीह इक जित्‍ता माळदुन, लेकीन सोतकु मंळसा सही दा जित्‍ता माळ सकालुर रा आव मसीह अक भी जित्‍ता माळीदील. 16 अदिक अगर मुर्दा जित्‍ता आगालव, रा मसीह भी जित्‍ता आगीदील; 17 अदिक अगर मसीह जित्‍ता आगीदील, रा नीम्द विश्वास बेकार आद, अदिक नीव ईग ताका तान पापगोळ्द भागीदार आईर. 18 बल्‍की जो मसीह मा विश्वास माळतार आंदुर भी सोतोग्यार. 19 अगर नाव सिर्फ ईदा जीवन दा मसीह देल आशा ईटतेव रा नाव सब मंळसागोळ देल यक्कुल अभागा आयेव.

20 लेकीन सही दा मसीह सोत्‍तुर दा टु जित्‍ता आग्यान, अदिक जो सोतोग्यार आंदुर भी जित्‍ता आदार ईद पयला प्रमाण हुन. 21 यतिकी याग ऊंद मंळसा अन्द द्वारा मृत्यु बत्‍त, रा ऊंद मंळसा अन्द अच द्वारा सोत्‍तुर मंळसा अन्द पुनरूत्थान भी बत्‍त. 22 अदिक ह्यांग आदम सब मा मृत्यु तंदुन, हांग अच मसीह भी विश्वास ईटावाळेर इक जित्‍ता माळ्यान, 23 लेकीन हर ऊंद तान तान पारी देल: पयला मसीह जित्‍ता आदुन, बाक मसीह अन्द वापस बंदुर देल आऊन मा विश्वास माळावाळेर लॉकुर जित्‍ता आदार. 24 इदुर बाद्दा अन्त आदीत. आ समय सब प्रधान माळावाळा दुष्टआत्मा अदिक पुरा अधिकार. अदिक सामर्थ्य अन्द मसीह अन द्वारा अन्त माळकु आदीत अदिक राज्य अक परमेश्वर आप्प उन कय दा सौप्स कोंडान. 25 यतिकी यागासताका आव तान दुश्मनी ईटावाळेरी तान काल इन ल्यालमा तरतीदील, आगासताका मसीह अन्द राज्य माळोद जरूरी आद. 26 सब से आखरी दुश्मनी माळावाळा जो नाश माळकु आदान, अद मृत्यु हुन. 27 यतिकी पवित्र शास्त्र अनतद, “परमेश्वर सप्पा येनारा आऊन काल इन ल्यालमा माळ कोंडुन,” लेकीन याग आव अनतान कि सप्पा येनारा मसीह अन्द हात्‍ती माळकु आग्याद रा प्रत्यक्ष आद कि यार आऊन हात्‍ती माळ कोंडुन, परमेश्वर खुद अलग ईत्‍तुन. 28 अदिक याग सप्पा हात्‍ती आगेदार, रा पारा खुद अच परमेश्वर उन हात्‍ती आगेदान, याव सप्पा येनारा आऊन हात्‍ती माळ कोंडुन, यदुर देल कि परमेश्वर सब वस्तुगोळ मा पुरा तरीका देल राज्य माळ्यान.

29 ईदारा जो लॉकुर सोतकु मंळसा अन्द साटी बपतिस्मा ताकोमतार आंदुर येन माळ्यार? अगर सोतकु मंळसा जित्‍ता आगालुर रा बाक येती आंदुर साटी बपतिस्मा ताकोमतार? 30 अदिक नाव भी येती हर घळी जोखिम दा बिदकु ईरतार? 31 हे वार्टुरा अदिक आकतींगेरा, नानी आ घमण्ड इन किर्‍या जो नाम्द मसीह यीशु दा ना नीम्द बारा दा माळतीन कि ना हर दिन सायतीन. 32 अगर ना मंळसा अन्द रीति मा इफिसुस दा आळी अन पशुगोळ घाई लळाई आळदीन रा नानी येन लाभ आत? अगर मुर्दा जित्‍ता माळकु आगालव, “रा बरी, तिनी-कुडी, यतिकी नाळ रा सायोद अच आद.”

33 ध्वाका तिनबाळी, “बुरा संगत वळ्लीद चरित्र अक बिगळुस बुळतद.” 34 सही विचार माळोद सुरू माळी अदिक पाप इक बिट बुळी; यतिकी येनारा हिंग आर जो परमेश्वर उक जान्सालुर, ना नीमी शर्मिंदा माळोर साटी ईद अनतीन.

35 ईग यावारा ईद अंदान, “मुर्दा या रीति देल जित्‍ता आगताव, अदिक ह्यांग मय इन सांगुळ बरताव?” 36 हे निर्बुद्धी! जो येनारा नी बोऊसत्या, यागासताका आव सायालुन जित्‍ता माळकु आगालुन. 37 अदिक जो नी बोऊसत्या, ईद अद मार्र आलच जो वाळुसावाळा आद, लेकीन सिर्फ दाना हुन, चाहे गोदी इन चाहे यातोदु अदिक अनाज इन. 38 लेकीन परमेश्वर तान इच्छा अन्द अनुसार आऊक मय कोळतान, अदिक हर ऊंद बींजा अक अदुर्द विशेष मय.

39 सब मय ऊंद घाई ईलच: मंळसागोळ्द मय अलग आद, पशुगोळ्द मय अलग आद; पक्षीगोळ्द मय अलग आद; मेनगोळ्द मय अलग आद.

40 स्वर्गीय मय आद अदिक अलग पार्थिव मय भी आद लेकीन स्वर्गीय मयगोळ्द तेज अलग आद, अदिक पार्थिव इन अलग. 41 सुर्य अन्द तेज अलग आद, चंद्रमा अन्द तेज अलग आद, अदिक तारागनगोळ्द तेज अलग आद, यतिकी ऊंद तारा से दुसरा तारा अन्द तेज दा फरक आद.

42 मुर्दागोळ्द जित्‍ता आगोद भी हिंग अच आद. मय नाशवान दशा दा बोऊस्कु आगतद अदिक अविनाशी रूप दा जित्‍ता आगतद. 43 अद अपमान इन सांगुळ बोऊस्कु आगतद, अदिक तेज इन सांगुळ जित्‍ता आगतद; निर्बलता अन्द सांगुळ नळ्सकु आगतद. अदिक सामर्थ्य इन सांगुळ जित्‍ता आगतद. 44 स्वाभाविक मय नळ्सकु आगतद, अदिक आत्मिक मय जित्‍ता आगतद: जब कि स्वाभाविक मय आद, रा आत्मिक मय भी आद. 45 हिंग अच शास्त्र दा लिख्सकु आद, कि “पयला मंळसा मतलब आदम जित्‍ता प्राणी आदुन” अदिक आखरी आदम, जीवनदायक आत्मा आदुन. 46 लेकीन पयला आत्मिक मय ईला ईरोद पर स्वाभाविक ईरोद, इदुर बाद्दा आत्मिक आत. 47 पयला मंळसा आदम पृथ्वी टु मतलब मुण्ण इन ईरोन; दुसरा स्वर्गीय आन. 48 ह्यांग आव मुण्ण इनव ईरोन, हांग अच आंदुर भी आर जो मुण्ण इनोर आर; अदिक ह्यांग आव स्वर्गीय आन, हांग अच आंदुर भी आर जो स्वर्गीय आर. 49 अदिक ह्यांग नाव आऊन मय धारण माळदेव जो मुण्ण इन ईरोद हांग अच आ स्वर्गीय अन्द मय भी धारण माळेव.

50 हे वार्टुरा अदिक आकतींगेरा, ना ईद अनतीन कि मास अदिक खुन परमेश्वर उन राज्य दा प्रवेश माळ सकालव, अदिक ना नाशवान अविनाशी इन प्रवेश आग सकतद.

51  ✡ १५:५१ १ थिस्सलुनीकि ४:१५-१७नोळी, ना नीम से भेद इन मात अनतीन: नाव सप्पा मुंदुर सायालेव, लेकीन सब बदलुसेव, 52 अदिक ईद क्षण भर दा, पतनी होडुतेला अच आखरी तुरही ऊएतेला अच ईतीदान. यतिकी तुरही ऊयकु आदीत अदिक मुर्दा अविनाशी दशा दा नेगुकु आदाव, अदिक नाव बदलुसेदव. 53 यतिकी जरूरी आद कि ईद नाशवान मय अविनाश इक हाक्‍क कोमुल, अदिक ईद मरनहार मय अमरता अक हाक्‍क कोमुल. 54 याग अद वचन जो शास्त्र दा लिख्सकु आद पुरा आगेदीत: अदिक याग ईद नाशवान अविनाश इक हाक्‍क कोंडीत, अदिक ईद मरनहार अमरता अक हाक्‍क कोंडीत, मृत्यु इन अन्त आत अदिक विजय प्राप्त आत.

58 इदुरसाटी हे नान प्रिय वार्टुरा अदिक आकतींगेरा, मजबूत अदिक अटल ईरी, अदिक प्रभु उन क्याल्सा दा सदा वाळुसतेला होगी, यतिकी ईद जान्सतीर कि नीम्द मेहनत प्रभु दा बेकार हैलेच.