1 हे वार्टुरा अदिक आकतींगेरा, ना चाहसालीन कि नीव पवित्र आत्मा अन्द वरदानगोळ बारा दा अनजान ईरी. 2 नीव जान्सतीर कि याग नीव खरा परमेश्वर उक अरालीर, हापाळ मुक्‍का मूर्तीगोळ्द पुजा माळकु अदिक अवरी मान्सोर अदिक अऊर हिंद नळोर. 3 इदुरसाटी ना नीमी चेतावनी कोळतीन कि जो यावारा परमेश्वर उन आत्मा अन्द अगुवाई देल माताळतान, आव अनालुन कि यीशु स्रापित आन; अदिक ना यावारा पवित्र आत्मा अन बिना अन सकतान कि यीशु प्रभु आन.

4  ✡ १२:४ रोमियों १२:६-८वरदान रा हापाळ प्रकार इन आव, लेकीन पवित्र आत्मा ऊंद अच आद; 5 अदिक स्यावा भी हापाळ प्रकार इन आव, लेकीन प्रभु ऊंद अच आन; 6 अदिक प्रभावशाली क्याल्सा हापाळ प्रकार ईनव आव, लेकीन परमेश्वर ऊंद अच आन, जो सब दा हर प्रकार इन प्रभाव पैदा माळतान. 7 लेकीन सप्पा मुंदरी लाभ पहुचुसोर साटी हर ऊंद इक परमेश्वर उन पवित्र आत्मा अन प्रगट आगोद. 8 यतिकी ऊंद अक आत्मा अन्द द्वारा बुद्धी इन मातगोळ कोटकु आगतव, अदिक दुसरा अक अदा आत्मा अन्द अनुसार ग्यान इन मातगोळ. 9 यावारा अक अदा आत्मा देल विश्वास, अदिक यावारा अक अदा ऊंद आत्मा देल चंगा माळोद वरदान कोटकु आगतद. 10 बाक यावारा अक सामर्थ्य अन्द क्याल्सा माळोद शक्ति, अदिक यावारा अक परमेश्वर उन वचन कोळोद दान कोट्टुन, अदिक यावारा अक परमेश्वर उन आत्मा अन्द दान इक परखुशोर साटी, अदिक यावारा अक अनेक प्रकार इन भाषा माताळोर साटी, अदिक यारीकारा अग्यात भाषागोळ्द अर्थ हेळोर साटी. 11 लेकीन ईव सप्पा प्रभावशाली क्याल्सा अदा ऊंद अच परमेश्वर उन पवित्र आत्मा माळसुसतद, अदिक यारी जो चाहासतान अद वाट्स कोमतान.

12  ✡ १२:१२ रोमियों १२:४,५यतिकी या प्रकार शरीर रा ऊंद आद अदिक अदुरव अंग हापाळ सा आव, अदिक आ ऊंद शरीर इन सप्पा अंग हापाळ आगदुर मा भी सप्पा मिलुसकु ऊंद अच शरीर आद, अदा प्रकार मसीह अन्द मय भी आद. 13 यतिकी नाव सप्पा मुंदुर येन यहूदी आगुल येन गैरयहूदी, येन दास आगुल येन स्वतंत्र, ऊंद अच आत्मा अन्द द्वारा ऊंद शरीर आगोर साटी बपतिस्मा ताकोंडेव, अदिक नाव सप्पा मुंदरी ऊंद अच परमेश्वर उन आत्मा कोटकु आग्याद.

14 इदुरसाटी कि शरीर दा ऊंद अच अंग ईला लेकीन हापाळ सा आव. 15 अगर काल अनुल, “ना कय आलच, इदुरसाटी शरीर इन आलच,” रा येन अद ई कारण शरीर इन आलच? 16 अदिक अगर किव अनुल, “ना कण्ण आलच, इदुरसाटी शरीर इन आलच,” रा येन अद ई कारण शरीर इन आलच? 17 अगर पुरा शरीर कण्ण अच आगाईत रा केळोद यल टु आगाईत? अगर पुरा शरीर किव अच आगाईत, रा सूँघसोद यल टु आगाईत? 18 लेकीन परमेश्वर अंगगोळी तान इच्छा अन्द अनुसार ऊंद ऊंद माळकु मय दा ईट्यान. 19 अगर आंदुर सप्पा ऊंद अच अंग ईरायदुर, रा मय यल ईराईत? 20 लेकीन ईग अंग रा हापाळ सा आव, लेकीन मय ऊंद अच आद.

21 कण्ण कय देल अन सकाल्द, “नानी नींद जरवत हैलेच,” अदिक ना ताल्ला कालगोळ देल अन सकतद, “नानी नीम्द जरवत हैलेच.” 22 लेकीन मय इन आ अंग जो दुसरागोळ देल निर्बल हतताव, हापाळ अच जरवत आद; 23 अदिक मय इन या अंगगोळी इक यदरी तोर्सोर देल नामी शरम बरतद हिंग अंगगोळी नाव वळ्लीद तरीका देल मुचतेव. अदरी नाव आदर इन योग्य समसालेव आंदरी अक अच नाव यक्कुल आदर कोळतेव; अदिक नामव जंग अंग अदिक भी हापाळ सुंदर आगेगताव. 24 तरी भी नाम्द सुंदर अंगगोळी इक इदुर जरवत हैलेच. लेकीन परमेश्वर मय इक हिंग माळ कोंडुन कि या अंग इक आदर इन कमी ईरोद अदरी का अदिक भी हापाळ आदर सिकतद. 25 ताकी मय दा फूट बिळ बाळुल, लेकीन अंग इन अवयव आबुर दाबुर बराबर चिन्ता माळुल. 26 इदुरसाटी अगर ऊंद अंग इन हिस्सा अक दुख सिकतद, रा सब अंगगोळ हिस्सा अक अदुर सांगुळ दुख सिकताव; अदिक अगर ऊंद अंग इनव हिस्सा अन बळाई आगतद, रा अदुर सांगुळ सब अंग आनन्द माळताव.

27 ई प्रकार नीव सब मिलुसकु मसीह इन मय हुईर, अदिक अलग अलग आऊनव अंग हुईर; 28  ✡ १२:२८ इफिसिगोळ ४:११अदिक परमेश्वर मंडली दा अलग अलग मंळसागोळ्द निवळ माळदुन: पयला प्रेरित, दुसरा भविष्यवक्ता, तिसरा गुरु, बाक सामर्थ्य इन क्याल्सा माळावाळेर, बाक चंगा माळावाळेर, अदिक उपकार माळावाळेर, अदिक व्यवस्था अन वरदान माळावाळेर, अदिक अग्यात प्रकार इन भाषा माताळावाळेर. 29 येन सब प्रेरित आर? येन सब भविष्यवक्ता आर? येन सब शिक्षा कोळावाळा गुरु हुन? येन सब सामर्थ्य अन्द क्याल्सा माळावाळेर आर? 30 येन सप्पा मुंदरी चंगा माळोद वरदान सिक्याद? येन सप्पा मुंदुर अग्यात प्रकार इन भाषा माताळतार? येन सप्पा मुंदुर अग्यात भाषा अन्द अनुवाद माळ सकतार? 31 नीव धोळ से धोळ वरदानगोळ्द लालसा ईटतीर. लेकीन ना नीमी अदिक भी सब से वळ्लीद हादी हेळतीन.