1 Rahela be natuna lasi, unai dainai ia ese iena kakana dekenai ia mama henia. Bona Rahela ese Iakobo dekenai ia gwau henia, ia gwau, “Natuna lau dekenai do oi henia, bema lasi neganai do lau mase.”

2 Vadaeni Iakobo ese Rahela dekenai ia badu henia, ia gwau, “Lau be Dirava, a? Ia ese mero oi dekenai ia henia lasi.”

3 Hahine ia gwau, “Lauegu hesiai hahine Bileha ia noho, ia danu oi mahuta hebou, vadaeni lauegu tuina dekenai dohore ia mara, ia dekena amo lauegu natuna do lau abia.”

4 Unai dainai, iena hesiai hahine Bileha be Iakobo dekenai ia henia, iena adavana ta, bona Iakobo ese ia sihari henia. 5 Vadaeni Bileha ia rogorogo, ia mara, mero ta ia abia, Iakobo ena. 6 Vadaeni Rahela ia gwau, “Dirava ese lau dekenai kota ia karaia vadaeni, lauegu noinoi ia abia dae vadaeni, lauegu natuna ia henia lau dekenai.” Vadaeni, iena ladana ia atoa Dano, anina be “Kota Hereva”.

7 Rahela ena hesiai hahine Bileha ma ia rogorogo, ia mara, mero iharuana ia abia, Iakobo ena. 8 Vadaeni Rahela ia gwau, “Lauegu kakana danu ai goada helulu, lau kwalimu vadaeni.” Vadaeni mero ena ladana ia atoa Napatali, ena anina be “Goada Helulu”.

9 Lea ia diba vadaeni do ia rogorogo lou lasi, vadaeni iena hesiai hahine Silipa ia abia, Iakobo dekenai ia henia, iena adavana ta. 10 Vadaeni Lea ena hesiai hahine Silipa ia rogorogo, ia mara, mero ta ia abia, Iakobo ena. 11 Vadaeni, Lea ia gwau, “Lauegu laki ena nega be inai.” Vadaeni mero ena ladana ia atoa Gado, anina be “Laki Nega Namona”.

12 Vadaeni Lea ena hesiai hahine Silipa ma ia rogorogo, ia mara, mero iharuana ia abia, Iakobo ena. 13 Vadaeni Lea ia gwau, “Lau moale, hahine ibounai danu do idia hanamoa lau dekenai.” Vadaeni mero ena ladana ia atoa Asere, ena anina be “Moale.”

14 Uiti utua ena nega dekenai Rubena be ia lao, au huahua ena ladana dudai haida ia davaria, vadaeni ia abia, iena sinana Lea dekenai ia abia lao. Vadaeni Rahela ese Lea dekenai ia noia, ia gwau, “Oiemu natuna ena dudai haida oi henia lau dekenai.”

15 To Lea ese ia gwau henia, ia gwau, “Lauegu adavana oi henaoa be oi laloa lasi, a? To edena bamona lauegu natuna ena dudai oi dadia gwauraia.” Vadaeni Rahela ia gwau, “Oiemu natuna ena dudai oi henia lau dekenai, vadaeni hari hanuaboi iseda adavana danu umui mahuta gabu tamona dekenai.”

16 Adorahi neganai, Iakobo be uma dekena amo ia giroa mai, vadaeni Lea be iena vairana dekenai ia lao, ia gwau, “Hari hanuaboi ita ruaosi gabu tamona dekenai do ita mahuta, lauegu natuna ena dudai Rahela dekenai lau henia ena davana.” Vadaeni unai hanuaboi idia ruaosi gabu tamona dekenai idia mahuta.

17 Vadaeni Dirava ese Lea ena guriguri dekenai ia kamonai, unai dainai ia rogorogo, ia mara, mero ta namba 5 ia abia, Iakobo ena. 18 Vadaeni Lea ia gwau, “Lauegu hesiai hahine be lauegu adavana dekenai lau henia ena davana be inai, Dirava ese lau dekenai mero ia henia vadaeni.” Vadaeni mero ena ladana ia atoa Isakara, ena anina be “Davana”.

19 Lea ma ia rogorogo lou, ia mara, mero namba 6 ia abia, Iakobo ena. 20 Vadaeni ia gwau, “Dirava ese harihari gauna namona lau dekenai ia henia vadaeni, harihari lauegu adavana be lau dekenai do ia noho momokani, badina be iena natuna memero 6 lau henia vadaeni.” Vadaeni mero ena ladana ia atoa Sebuluno, ena anina be “Noho”.

21 Unai murinai, ia be ena natuna kekeni ta ia abia, vadaeni kekeni ena ladana ia atoa, Daina.

22 Unai neganai Dirava ese Rahela dekenai ia laloa, iena noinoi ia abia dae, vadaeni ia danu ia rogorogo. 23 Ia mara, mero ta ia abia, vadaeni ia gwau, “Dirava ese lauegu hemarai ia kokia vadaeni.” 24 Vadaeni mero ena ladana ia atoa Iosepa, ena anina be “Ma ta”, ia gwau, “Dirava ese natuna mero ma ta bema ia henia lau dekenai be namo.”

25 Iosepa ia vara murinai, Iakobo ese Labana dekenai ia hamaoroa, ia gwau, “Mani emu kara oiemu imana dekena amo oi siaia lau, lauegu gabu korikori dekenai do lau lao, egu tano korikori dekenai do lau giroa lou. 26 Lauegu adavana bona lauegu natuna lau dekenai oi henia, badina be idia totona oiemu hesiai gaukara lau karaia vadaeni. Oiemu imana dekena amo oi negea lau, lauegu hekwarahi oiemu hesiai gaukara dekenai lau karaia be oi diba vadaeni.”

27 Labana ia gwau, “Lau noia oi dekenai, mani emu kara oi raka siri lasi, badina be lauegu lalona ia kehoa vadaeni, Lohiabada ese lau ia hanamoa oi dainai. 28 Oiemu davana do oi gwauraia, vadaeni do lau henia oi dekenai.”

29 Iakobo ese ia haere henia, ia gwau, “Lauegu hekwarahi bada oiemu hesiai gaukara dekenai, be oi itaia vadaeni, oi diba danu oiemu mamoe be idia momo herea vadaeni lauegu imana dekenai. 30 Lau be lau do mai lasi neganai, oi be oi ogogami vadaeni, harihari oi be kohu momo tauna, lau mai negana ia mai bona hari Lohiabada ese oi ia hanamoa vadaeni. To hari be nega ia ginidae vadaeni, egu adavana bona natuna kohu momo do idia davaria totona do lau gaukara hamatamaia.”

31 Vadaeni Labana ia gwau, “Dahaka oi dekenai do lau henia?” Iakobo ia gwau, “Moni davana lau dekenai do oi henia lasi, to bema lauegu ura oi abia dae neganai, oiemu mamoe bona nani do lau naridia noho. 32 Mani emu kara, hari dina oiemu mamoe bona nani do lau haria karaia. Mamoe mai toutou danu, o mai revareva danu, bona mamoe korema, bona nani mai toutou danu, o mai revareva danu, ibounai do lau hakaua siri, lauegu davana be unai. 33 Nega gabeai do oi diba, lau be maoro o kerere, bema lauegu mamoe bona nani edia huanai toutou lasi gaudia, revareva lasi gaudia, o kurokuro gaudia oi itaia neganai, lau be henaoa tauna momokani.”

34 Vadaeni Labana ia gwau, “Oiemu hereva hegeregerena do ita karaia.” 35 To unai dina dekenai Labana ese nani tatau bona nani hahine mai toutou gaudia, bona mai revareva gaudia, bona mamoe korema, ibounai ia hakaua siri, iena natuna dekenai ia henidia, idia naridia totona. 36 Ma Labana ese inai mamoe bona nani orea ibounai ia hakaua lao sisina daudau, dina toi ena raka hegeregerena. To Iakobo ese Labana ena mamoe bona nani, ia rakatania gaudia, ia naridia.

37 Vadaeni Iakobo ese au idaudia toi edia rigi matamatadia ia utua, edia kopina kahana ia kokia, kahana ia noho, itaia neganai be revareva bamona. 38 Vadaeni unai rigi mai revareva gaudia be ranu gabudia dekenai ia haginia, mamoe bona nani ranu inua totona idia mai neganai. Rigi be unuseni ia atodia, badina be mamoe bona nani hahine be idia rogorogo unai inua gabuna dekenai. 39 Unai rigi edia vairana dekenai idia rogorogo neganai, edia natuna idia vara be mai revareva danu. 40 Inai bamona nani bona mamoe natudia be Iakobo ese ia abia siri, idia be iena mamoe bona nani orea gaudia danu ia haboua. To Labana ena mamoe bona nani orea danu ia haboua lasi. 41 Vadaeni nani bona mamoe hahine, mai goada gaudia idia sihari neganai, Iakobo ese inai rigi idia edia vairana dekenai ia haginidia, ranu gabudia dekenai, rigi idia itaia nega lalonai do idia rogorogo totona. 42 To goada lasi gaudia idia sihari neganai, inai rigi ia haginidia lasi edia vairana dekenai. Unai dekenai goada lasi gaudia be Labana ena, bona mai edia goada gaudia be Iakobo ena. 43 Unai dala dekenai Iakobo be kohu momo tauna momokani ia lao. Iena mamoe bona nani be momo herea, iena hesiai tatau bona hahine, kamelo bona doniki danu idia momo herea.