2
Keriso idia hasatauroa sivaraina
1 Lauegu varavara taudia e, umui dekenai lau lao neganai, lau be hereva namo herea o aonega herea lau gwauraia lasi, to Dirava ena hereva momokani lau harorolaia. 2 Umui dekenai lau noho neganai lau be idau gauna ta lau laloa diba lasi, Iesu Keriso sibona mo. Oibe, Iesu Keriso satauro dekenai ia mase sibona lau laloa. 3 Unai dainai umui emui huanai lau noho neganai lau be goada lasi. Lau gari, bona lau heudeheude momo. 4 Lauegu hereva bona lauegu haroro be taunimanima edia aonega dekenai lasi, o egu diba bada dekenai lasi. To Lauma Helaga ena siahu lau ese umui dekenai lau hedinaraia momokani. 5 Unai dainai emui abidadama be taunimanima edia aonega dekena amo ia gini lasi, to Dirava ena siahu dekena amo ia gini.
Dirava ena Lauma ese aonega ia henia
6 To momokani, Lauma Helaga ena diba gaudia dekenai idia goada vadaeni taudia, be lau ese aonega hereva dekena amo lau haroro henidia. To inai aonega be tanobada gunalaia taudia edia aonega lasi, edia siahu ia doko lao noho. 7 Lau harorolaia aonega be Dirava ena. Inai aonega be hunia gauna, tanobada taudia idia diba lasi gauna. Tanobada ia do karaia lasi neganai, Dirava ese inai aonega dalana ia karaia hegaegae, ita ese hairai momokani dohore ita abia totona. 8 Inai tanobada ena gunalaia taudia be inai bamona aonega idia diba lasi momokani. Badina be bema idia diba neganai idia be Hairai ena Lohia idia hasatauroa lasi. 9 Buka Helaga lalonai ia torea bamona, ia gwau:
“Matana ta ia itaia lasi,
bona taiana ta ia kamonai lasi gaudia,
bona tau ta ena lalona dekenai ia laloa diba lasi gaudia,
be Dirava ese ia abia hegaegae,
ia idia lalokau henia taudia edia.”
10 Inai gaudia be hunia dekenai idia noho, to Dirava ese iena Lauma dekena amo ita dekenai ia hedinaraia. Oibe, Lauma Helaga ese gau ibounai ia tahua noho, Dirava ena laloa dobu gaudia danu. 11 Badina be taunimanima edia laloa be taunimanima edia lauma sibona idia diba, ani? Unai bamona danu, Dirava ena gau be tau ta ia diba lasi, Dirava ena Lauma sibona ia diba. 12 Ita be inai tanobada ena lauma ita abia lasi. To Dirava dekena amo ia mai Lauma ita abia vadaeni, Dirava ese ita dekenai ia henia harihari gaudia do ita diba namonamo totona.
13 Unai dainai ai be tanobada taudia edia aonega dekena amo ai hereva lasi, to Lauma Helaga ese ai dekenai ia hadibaia hereva dekena amo. Vadaeni ai ese Lauma ena hereva momokani gaudia be Lauma idia abia taudia dekenai ai hadibaia. 14 Tauanina ia abidadama henia tauna ese Dirava ena Lauma gaudia ia abia dae diba lasi, badina be ia dekenai idia be kavakava bamona. Inai Lauma ena gau namodia be Lauma Helaga sibona dekena amo ita abia diba. Vadaeni Lauma ia do diba lasi tauna be unai gaudia edia anina ia davaria diba lasi. 15 Lauma Helaga ia abia vadaeni tauna ese gau ibounai edia anina ia diba. To tau ta lasi ese Lauma Helaga ia abia tauna ena mauri ia tahua diba. 16 Buka Helaga lalonai ia torea bamona, ia gwau:
“Daika ese Lohiabada ena laloa ia diba?
Daika ese Lohiabada ia sisiba henia diba?”
To, ita be Keriso ena laloa ita abia vadaeni.