12
No sui i wara hagawai no hahina ma no nuna nat na bulu
1 Io, ma tiga tamat na hakilang ga puasa aram ra mawai, ma i hoken: tiga hahina ga sigam tar no matana kasakesa ma no teka manapu ta ira airua kakena. Ma tiga vuvu na lualua, a sangahul ma irua na tagul tana, ga kis taar tano walina. 2 Ga kap bala taar ma ga huteta bia na kakaha. Ma a bulu ga paspaas ia kaikek gaam manga kup ma ra ngunungut.
3 Io, tiga mes na hakilang ga puasa aram ra mawai, ma i hoken: kaia tiga tamat na dardarana sui. Ma a len ma irua na walina ma a sangahul na lakona. Ma a len ma irua na vuvu na lualua ta ira walina. 4 No lapina ga kurhai hasur tiga sibaan ta ira aitul a sibaan ta ira tagul maram ra mawai ukai napu tano ula hanua. Ma no tamat na sui ga sua taar manaluai tano hahina i wara kinakaha bia na ien no natina ing a mon na kaha sei ia. 5 Io, no hahina ga kaha tiga bulu na tunana nong na balaurei ma na kurei hadadas ira huntunaan tano ula hanua bakut. Ma di ga ras lah no nat na bulu uram ta Kalou tano nuna tamat na kinkinis na warkurai. 6 Ma no hahina ga hilau ukaia tano hanua bia, tano sibaan Kalou gata tagurei tar ia utana. Ma ga haan ukaia ing Kalou na balaurei ia ra 1,260 na bung.
7 Ma tiga kamana hinarubu ga hanuat aram ra mawai. Maikel ma ira nuna angelo diet ga harubu ma no tamat na sui ma ira nuna angelo. 8 Ma sen no tamat na sui pa ga dadas haruat, hua taia ta mahua utana ma ira nuna angelo aram ra mawai. 9 Ma di ga sei hasur no tamat na sui. Ma ia a mon iakano sui manaluai sakit. Di kilam ia bia no Tena Hartakun, bia Satan, nong i la lamlam harango no ula hanua bakut. Io, di ga sei hasur ia ukai tano ula hanua, tikai ma ira nuna angelo.
10 Ma iau ga hadadei ra tamat na ingana tikai aram ra mawai i tangai bia,
“No tena hartakun nong i la taktakun ira tasi dahat ta Karisito ra matmataan ta Kalou ta ira pakana bung bakut,
di ta sei hasur um ia maram ra mawai.
Io hua, kaiken um i palai bia no harhalon ta Kalou i ta hanuat.
Kaiken um i ta haminis no nuna dadas bia a Tamat na Lualua ia.
Kaiken um no nuna Mesaia i ta haminis no nuna kinkinis na warkurai.
11 Ira tasi dahat diet ga bul hasur no dadas tano tena hartakun ma no gapina no Nat na Sipsip ma ta ira tutuna diet ga hinhinawas tanai.
Pa diet ga manga lilik uta ira nudiet nilon. Taia. Diet ga taram bia diet na maat.
12 Io hua, i tahut bia muat bakut ing muat kis aram ra mawai, muat na guama!
Senbia na sakena ta diet tano ula hanua ma no tes, kanong no tena hartakun i ta hansur tupas muat!
I manga ngalngaluan taar kanong i nunurei bia ira nuna pakana bung i kumkumina.”
13 Io, ma ing bia no tamat na sui ga nas bia di gata sei hasur ia ukai napu tano ula hanua, ga tur lah wara paspasak no hahina nong gata kaha tar no bulu. 14 Ma di ga tar ra airua babana taragau tano hahina waing na pupunga ma dir ukaia tano hanua bia, ta iakano sibaan Kalou gata tagurei tar ia utana. Ma ga nanaas bia Kalou na balaurei bat ia ta ira aitul ma sibana tinahon. Ma no tamat na sui pa na tale bia na hagawai ia kaia. 15 Io, no tamat na sui ga maruanei ra tamat na taah bia na saliranei sei no hahina. 16 Senbia no pisa ga harahut no hahina. No pisa ga tamapapos wara kankanam no tamat na taah makaia tano hana no tamat na sui. 17 Io, no tamat na sui ga manga ngalngaluan taar tano hahina ma ga haan laah wara hinarubu ma ira nuna mes na natina. Diet ing diet la tartaram ira warkurai ta Kalou. Ma diet la murmur no tutuna Iesu ga hapuasnei. 18 Ma no tamat na sui um ga tur taar nawana.