1 ताना पया येसु गालिल सम्दुरता (इतेके तिबरिया सम्दुरता) अबर डडटके मावा संगे वेंडिस वातोग़. 2 ओग़ अगा वेल्‍लाङे रोगह्‌किन सव्रे कींदोग़, इद्रमताङ ओनाङ बामिह कीयनव सीनान ऊळसोर मताह्‌कु वेल्‍लाय मुल ओना पयाह-पयाह अंदुर. 3 पया येसु ओसो माटु कग़यवालोरोम कतमतोरोमे येसुना संगे गुड्रापोग़ोन अतोम, अगा ओग़ु माक काग़्हतलाह उदतोग़. 4 अद तूकने यहुदि लोकुरा आवना पंडुम एरे एव्‍स मता.

5-6 पया येसु अग्‍डाहि ऊळनेके ओना पयाह वावालोर वेल्‍लाय मुडुन ओग़ ऊळतोग़. अस्‍के येसु तनाङ कग़यवाल पिलिप इनवान ताल्ह्‌कतोग़, “वेर कतमतोरिह्‌क तिंदलाह आरिङ बेगा असलाह दोर्कनुङ, डा?” नावा डीसातगा पिलिपिना विस्‍वस मन्ह्‌ताया, इलेया, इदिन ऊळलाह येसु ओन इह ताल्ह्‌कतोग़. बाराह्‌क इतेके तना बाताल कीयना मता, अद येसुह्‌कु एर्काये. 7 “गूरु, आट नेलाना कूल कोताने आरिङ असिस ईतेकाय वेर सबेटोरिह्‌क किळ्‍केङवने एवोङ आयनुङ,” इनजि पिलिप येसुन इतोग़. 8-9 अस्‍के दुस्रोग़ ओर्वोग़ कग़यवाल, सिमोन पत्रुना तमोग़, आंद्रेयाल इनवाल इतोग़, “इगा ओर्वोग़ उड्लोग़ पेकानगा सेन जोनानाङ एयुङ आरिङ ओसो रेंड मीन्‍क मन्ह्‌ताङ, मति इचोन मुडुह्‌क अव बेगा आलनुङ?” इनजि येसुन इतोग़. 10 पया येसु “लोकुरिन उदिह कीम्ह्‌टु,” इनजोरे माक इतोग़. अगा बेसतल रोंडा मताह्‌कु, अगा मतोरु जोक-जोक एयुङ अजर्क कोय्‍तोर तमा लोतोर बारा उदतोर. 11 येसु पया कयदे आरिन, मीन्‍किन एचि, देवुळतुन जोहर कीतोग़, जोहर कीसि माक कग़यवालोरिह्‌क आरिङ वांटलाह ईतोग़, माट पया सबे उदतोरिह्‌क वांटटोम. अद्रमे माट बेचोक इतेक अचोक मीन्‍कवने तूसिसीतोम. 12 ओर कतमतोर पंजनाह तितोर, पया “इंजेक बातय उगस पोवयनायो इनजि पिसताङ-मय्‍ताङ किळ्‍केङ पेह्‌किस जमा कीम्ह्‌ट,” इनजि येसु माक कग़यवालोरिन वेहतोग़. 13 पया कतम मुल तिनजि तेदतस्के, जोनानाङ एयुङ आरिनग्‍डाहि पिसतव-मय्‍तव किळ्‍केङ जमा कीतस्‍के, अव बारा डालाङ निंताङ. 14 येसु कीतद इचोटा बेरा सीनातुन ऊळिसि, लोकुर इंदलातोर, “बोग़ मोसाललेह्‌का देवुळता कबुरतोग़ इद दुनियाते वावाल मतोग़, ओग़ निटमे वेग़े आंदोग़ रो!”✡ 6:14 व्यवस्थाविवरण 18:15 15 लोकुर नाक पोसि राजाल कीयलाहि ऊळिह्‌तोर, इनजि येसु पुताह्‌कु ओग़ वग़ोग़े पेसिस गुड्रापोग़ोन अतोग़.

16 मुलतस्‍के माट कग़यवालोरोम सम्दुरतके ओळ्‍सिय अतोम. 17 ईकळ आस मता, मति येसु मयगा वावाये मतोग़. अदिह्‌कु माटु कापेर्नाग़ दायलाह ओडाते उदिसि सम्दुरतुन वेंडसोर मतोम. 18 अस्‍के बेरा दूंद वाताह्‌कु सम्दुरता एग़ पकाय गोकिंदु. 19 माट रेंड कोस्‍क बार जागा ओडा वग़्‍ह्‌चोर अतापया, ऊळाटु, येसु एता पोग़ोट्क ताकसोरे, ओडाता एरे वायनदिन ऊळिसि, माट पकाय रेयिस केयतोम. 20 मति येसु माक आळो कीस इतोग़, “ननाये आंदन, रा! रेयमाटु.” 21 ओन ओडातगा उदिह कीयलाह मावा गिर्दा मता. अस्‍के दोम्‍क्‍नेन ओडा मावा दायनद जागाते अबर बाजे दडकचुल एवता.

22-23 येसुसामि देवुळतुन जोहर कीसि लोकुरिह्‌कु आरिङ तूसतोग़, अद जागाते इमा दियाते नग़्‍कमि लोकुर येसुन कलियलाह जमा आस मतोर. येसुनाङ कग़यवालोर उदिस अतदु उंदिय ओडा मता, अद ओडाते इतेके येसु अनोग़, सिरप ओनाङ कग़यवालोरे अन्‍ज मतोर इनजि लोकुर पुनजिय मतोर. (मति इंजेके तिबरिया नाटेनाहि दुस्राङ ओडाङ अद जागाते वातव मताङ.) 24 अदिह्‌कु इगा येसु इलेग़, ओनाङ कग़यवालोरवने इलेर इतेके ओग़ु कापेर्नाग़ सम्दुरकचुल ताकसोरे अन्‍ज मंदनोग़ बहे इनजि वेर लोकुर विचर कीतोर. विचर कीसि वेरवने पया येसुन पर्ह्‌कलाह ओडाने उदिसि अबर डडटा कापेर्नाटे एवतोर.

25 पया येसु अबर डडटगा कलियतस्‍के, “इचोन चट्‌पिट बह वातिन, गूरु?” इनजोर लोकुर ताल्ह्‌कतोर. 26 अस्‍के येसु ओरिन इतोग़, “इह केंजाट, निटम पोल्‍लो इदे मन्ह्‌ता, मीटु नावाङ बामिह कीयनाङ सीनाङ ऊळताह्‌कु आयो, मति पंजनाह आरिङ तिताह्‌कु, ओसोवन दोर्कनुङ बहे इनजोर नाक पर्ह्‌किह्‌‍निर. 27 अवयनद तिंडटुह्‌कु पेग़्‍के अनमाट, मति अमेसाता पिसमुळ ईयनद, बेस्‍केन अववदु तिंडटुन पर्ह्‌काटु. इद्रमता तिंडि माने-मन्‍कना नडुम पुटटोनन, नना मीक ईकन, बाराह्‌क इतेके अदिन ईयलाह अदिकर नावा बाबाल नाक ईतोग़.” 28 “माट बह कीकोम इनजि देवुळता विचर मन्ह्‌ता, गूरु?” इनजोर ओर येसुन ताल्ह्‌कतोर. 29 अस्‍के येसु ओरिन इतोग़, “मीट बहे केमाटु मति देवुळ लोहतोना पोग़ोन, इतेके नावा पोग़ोन मीट बर्वस तासना, इदे देवुळता विचर मन्ह्‌ता,” इतोग़. 30 अग्डोर नाटेनोर ओन ताल्ह्‌कतोर, “अह इतेके माट नीक नमना इनजि माक बेद्रमता सीना तोहतकिन? निमा बाताल कीकिन? 31 मावोर मुनेतोर पेदल्‍कु पेळ्ह्‌कल बूमते देवुळदीपताहि अर्हतदु ‘मना’ इनदनद तिंडि तितोर. सास्‍त्रमते वने इहे मन्ह्‌ता: ‘मोसाल ओरिह्‌क तिंदलाहि पोग़ोटा बूमताहि तिंडि ईतोग़,’ इनजोर रासता मन्ह्‌ता.” 32 येसु पया ओरिन इतोग़, “इह केंजाट, निटम पोल्‍लो इदे मन्ह्‌ता, पोगोटाहि तिंड अर्हतोग़ मोसा मुय्‍तोग़ आयोग़, नावा बाबाले मतोग़. ओसो इंजेके ओग़े पोगोटाहि वायनद करलता तिंडि मीक ईकन इन्ह्‌तोग़. 33 बाराह्‌क इतेके देवुळदीपताहि रेगिसि इद दुनियातोरिह्‌क अमेसाता पिसमुळ एवाल, ओग़े देवुळ ईतद तिंडि आंदोग़,” इनजोर इतोग़. 34 “ए गूरु, इद्रमता तिंडि माकु अमेसा ईमु,” इनजोर ओर इतोर.

35 येसु पया ओरिन इतोग़, “अमेसाता पिसमुळ ईयनद तिंडि ननान आंदन. बोर नयगा वायनुर, ओरिह्‌क बेस्‍केने कग़्व वसो आयग़ा. बोर नाक नमनुर, ओरिह्‌क बेस्‍केने एग़ उंडा वसो आयग़ा. 36 मति मीट नावाङ डीसाताङ कबस्‍क ऊळिस तेला, नना बोनन इनजि मीट पुनवा, नाक नमविर, इनजोर मीक नना वेहच मतन. 37 बोन-बोन नाक बाबाल ईस्‍तोग़, ओर कतमतोर नयगा वास्‍तोर. ओसो बोर नयगा वायनुर, ओरिन नना बेस्‍केन मल्‍हच लोहोन आयकन. 38 बाराह्‌क इतेके नना नावा विचरते कीयलाह आयो, मति नाक लोहतोना विचर मतप कीयलाह देवुळदीपताहि रेगतन. 39 बोर मन्‍कलोरिन बाबाल नाक ईतोग़, ओरग्‍डाहि वग़ोग़वने लेसनायो, मति ओरिन कतमतोरिन आक्रिता दियाते नना जीवा अर्हतना, इदे नाक लोहतोना विचर मन्ह्‌ता. 40 बोर देवुळता मग़िन पुनजि नाक नमनुर, ओरिह्‌क अमेसाता पिसमुळ दोर्कग़ा, ओसो नना ओरिन आक्रिता दियाते मल्‍स जीवा अर्हतना, इद्रम नावा बाबाना विचर मन्ह्‌ता,” इनजि येसु इतोग़.

41 “देवुळदीपताहि रेगतद तिंडि ननान आंदन,” इनजोर येसु इताह्‌कु, यहुदिराङ पेदल्‍क तमतमाय येसुना लोप्पा मुयोग़ आंदुर. 42 मुयोग़ आसोर ओर इतोर, “वेग़ इतेके बोग़ु, योसेपिना मग़ि, इसि! वेना तलोग़-तपेन बह माट पुनोम? पया वेग़ ‘नना देवुळदीपताह रेगतन,’ इनजोर बेद्रम इन्ह्‌तोग़?” 43 अस्‍के येसु ओरिन इतोग़, “मीट-मीटे मुयोग़ आयमाट! 44 केंजाटु, नाक लोहतोग़ बाबाल देय्‍वा एवालेवा, बोग़े नयगा वाया पग़वोग़. ओसो ननाये ओन आक्रिता दियाते मल्‍स जीवा अर्हतकन. 45 मुनेतोर देवुळता कबुरतोरा सास्‍त्रमते बह रासतद मन्ह्‌ता इतेके, ‘ओरिन कतमतोरिन देवुळि काग़्हतग़ा,’ इद नाक नमवालोरा लोप्पा रासतदु. बोर बाबानग्‍डाह केंजिसि कग़्यतोर, ओर नावाङ पोल्‍लोङ केंजलाह नयगा वास्‍तोर. 46 ननान देवुळतेनाह वातन, नाक विळ्‍सिसि बोग़े देवुळबाबान ऊळोग़. 47 इह केंजाट, नना वेहतह्‌नन, नाक नमवालोरिह्‌क अमेसाता पिसमुळ दोर्कताये. 48 अमेसाता पिसमुळ ईयनद तिंडि ननान आंदन. 49 मीवोर मुनेतोर पेदल्‍क पेळ्‍ह्‌कल बूमते देवुळ अर्हतद ‘मना’ इनदनद तिंडि तिन्‍ज तेला ओर डोलतोर. 50 मति देवुळदीपताहि इळ्‍न रेगनद बेद तिंटुन नना वेहतन, अदिन तिनवालोर अमेसा जीवात मंदनुर. 51 देवुळदीपताह रेगतद जीवात मनदनद तिंडि ननान आंदन. बोर इद तिंटुन तिनदनुर, ओर अमेसा जीवात मंदनुर. इद तिंडि नावा मेंदुल आंदु, इदिन नना दुनियातोरा पिसमुळतेनाह्‌कु ईकन,” इनजोर येसु इतोग़.

52 इदिन केंजिसि यहुदिराङ पेदल्‍क तमतमाय जेटामारा आतोर, “वेग़ मन्‍कल माक तना मेंदुल तिंदलाह बेद्रमते ईयनोग़, अय?” 53 अस्‍के नना दुनियातोर कतमतोरा पापमतेनाह्‌कु मोक आयकन, एनवालोरिह्‌के अद मोकता पाय्‍दा दोर्कग़ा, इदिन पुन्‍पिह कीयलाह येसु इह वळ्ह्‌कतोग़, “इह केंजाट, नना वेहतह्‌नन, नना माने-मन्‍कना नडुम पुटटोनन, नावा मेंदुदुन तिनवालेवा, ओसो नावा नेतुरतुन उनवालेवा, मीवा लोप्पा देवुळ ईयनद जीवा मनो आयग़ा, गोतो. 54 मति बोर नावा मेंदुदुन तिनदनुर, नावा नेतुरतुन उनडनुर, ओरिह्‌क अमेसाता पिसमुळ दोर्कग़ा. ओसो आक्रिता दियाते नना ओरिन जीवा अर्हतकन. 55 बाराह्‌क इतेके नावा मेंदुलि करलता तिंडि आंदु, ओसो नावा नेतुरि करलता उंदि उनडनद आंदु. 56 बोर नावा मेंदुदुन तिनदनुर ओसो नावा नेतुरतुन उनडनुर, ओर नयगा जोळेम आस मंदनुर, ओसो नना ओरगा जोळेम आस मंदकन. 57 नाक लोहतोग़ जीवात मनवाल बाबाल, ओनाय संगे ननावने जीवात मह्‌नन. अहलेह्‌का बोर नावा मेंदुदुन तिनदनुर, ओरवने नावा संगे जीवात मंदनुर. 58 देवुळदीपताहि रेगतद करलता तिंडि ननान आंदन. मीवोर मुनेतोर पेदल्‍क मना तिन्‍ज तेला ओर डोलतोर, अद्रमलेह्‌का इद तिंड आयो. मति बोर इद तिंटुन तिनदनुर, ओर अमेसा जीवात मंदनुर,” इनजि येसु काग़्हतोग़. 59 कापेर्नाटे मनदनद देवुळता सास्‍त्रम काग़्हतना लोते येसु काग़्हनेके इव इचोक गोटिङ वळ्ह्‌कतोग़.

60 इव गोटिङ केंजिसि, येसुनाङ कग़यवालोर वेल्‍लाटोर इतोर, “माकु अग़्‍ङ वास्‍ता, रा! इविन बोग़ केंजनोग़?” 61 नावाङ कग़यवालोर तमतमाय मुयोग़ आस्‍तोर, इनजि येसु तना पोटालोप्पा पुतोग़. पुनजि इतोग़, “मीक इव गोटिङ केंजिस, एग़्‍कुळलेह्‌का आस्‍ताया? 62 माने-मन्‍कना नडुम पुटटोनन, नना बेगा मुने मतन, अगा पोग़ोन मल्‍स दायनस्‍के मीट नाक ऊळकिर अस्‍के मीट बह इंदकिर? 63 इद बूमता बुदते विचर केमाटु, ताना पाय्‍दा बातय इले. मति पोगोटाहि दोर्कनद बुदते ताकतेकेने मीकु करलता पिसमुळ दोर्कग़ा. बेव गोटिङ नना मीक वेहतन, अव पोग़ोटाङ गोटिङ आंदुङ, अविन नमतेके मीकु करलता पिसमुळ दोर्कग़ा. 64 मति मियग्‍डाहि उय्‍तुर नावाङ पोल्‍लोन नमवोरिर मह्‌निर,” इनजोर येसु इतोग़. बाराह्‌क इतेके नमवोर बोरु ओसो बोग़ नाक कोंटेतोरा कयदे पोसीयनोग़ इनजोर येसु मुनेन पुनजि. 65 पया येसु इतोग़, “अदिह्‌क मीक नना वेहच मतन इसि, बाबाल देय्‍वा एवालेवा बोग़े नयके वाया पग़वोग़ इनजोर.”

66 अस्‍केडाहि येसुनाङ कग़यवालोर वेल्‍लाटोर येसुन विळ्‍सिस मल्‍स अतोर, ओना संगे वने ओर बेस्‍केन वावोर आंदुर. 67 अस्‍के येसु माक बळयिनोरिन बारा मांतुन इतोग़,* 6:67 वेर बारा बळयिनोर बोर मतोर, तेन पुनदलाह मत्‍यल 10:1-4 ऊळाट. “मीटवने मल्‍स दायना कीय्ह्‌निरा?” इनजि ताल्ह्‌कतोग़. 68 अस्‍के सिमोन पत्रु इतोग़, “आयो गूरु, नीक विळ्‍सिसि माट बोनगा दाकोम? अमेसाता पिसमुळता कबुरतोनिन इतेके निमाने! 69 निमाने देवुळता पवित्र मग़निन आंदिन इनजोर माट विस्‍वस कीसि पुतोरोमे,” इनजि इतोग़. 70 “सिमोनि, मीट बारा मन्‍कलोरिन ननान आचतन, निटमे! तेला मति मियग्‍डाहि वग़ोग़ देयमता बुदतोग़ु मन्ह्‌तोग़,” इनजोर येसु माक इतोग़. 71 (येसु इद पोल्‍लो केर्योत नाटेनोग़ सिमोनिना मग़ि यहुदाल इनवाना लोप्पा वळ्ह्‌कतोग़. माट बळयिरोम बारा मुडग्‍डाचि वेग़ ओर्वोग़ मन्‍ज तेला येसुन कोंटेतोरा कयदे पोस एवल मतोग़.)