1 इंजेके मोसानाङ अडोङ पुनवालोर मावोर यहुदिरिर, मीक नना वेहतलाह आतन. मन्कल जीवात मनेकेने, ओना पोग़ोन अडोना अदिकर ताकिह्‌ता, इद पोल्‍लोतुन मीट सबेटोरिर पुतिरे. 2 मर्मता अडो वने अहे: आंचाळि तना मुजोना संगेन जोळ आस मनदना इनजोर अडो मन्ह्‌ता, दुस्रोन्क दायलाह पोलो. मति मुजो डोलतेक अचोन तान्क अद अडो दल्गो. 3 अदिनेनाह्‌क ताना मुजो जीवात मनेकेन अद दुस्रोन्क अतेके, तान सिंड्रि आंचाळ इन्ह्‌तोर. मति ताना मुजो डोलतेके, ओनाय संगे जोळ मनदनद अडो ताको. इतेके अद रांडे आतापया, दुस्रोन्क अतेके अद सिंड्रि आंचाळ आयो.

4 अद्रमलेह्‌काने मावोरिर, मुने माट यहुदिरल मोसानाङ अडोना संगे जोळ आस मतल. किर्स्तु डोलतस्के माटवने ओना संगे डोलतप लेह्‌कान आसि, अडोना अदिकरताहि पेसतल. रांडे आंचाळ दुस्रोन्क दाया पग़तप लेह्‌काने, माट वने इंजेके किर्स्तुना संगे हामुरतग्डाहि जीवा अरतप आसि ओना संगे जोळ आतल; जोळ आसि ओनाय संगे देवुळता बेसता सेवा कीया पग़यह्‌नल. 5 माट मुने मन्कना बुदते ताकसोर मतल अस्के, मावाङ मेंदुस्किन पापम कीयलाह लालुस्क ताकिह कींदुङ. मोसानाङ अडोङ पुताह्‌कु अव लालुस्क नेका वीळसोर अताङ.* 7:5मोसानाङ अडोङ वावस्के वने मन्कलोर पापम कीयलाहि विचर कींदुर; मति अडोङ वास पापम केमाट इनजोर इतापया, मन्कलोरिह्‌क तमा कैंगम बुदते अडोङ देहतलाह पका विचर वास्ता. अदिनेनाह्‌क अडोन पुताह्‌कु मावाङ लालुस्क नेका वीळसोर अताङ, इनजोर पोलु वेहतलाह आतोग़. अदिनेनाह्‌क माट पापम कबस्क कीसोरे अमेसाता हामुरता लायकतोरल मतल. 6 मति इंजेके माट किर्स्तुना संगे डोलतप लेह्‌का आताह्‌कु, मावा पोग़ोन अडोना बातय अदिकर इले. अदिनेनाह्‌क इंजेक माट पाळ्ना रीतते रासतव अडोना इसबते सेवा केवल, मति देवुळता जीवा वेहतपु पूना रीतते कीय्ह्‌नल.

7 नना इचोन वेहतस्के, मोसानाङ अडोङ ओसो पापमि इव उंदिय पोल्‍लो इनदनाया? आयो, मुर्तिय आयो! सास्त्रमतगा अडोङ रासतव लेवेके नना पापमतुन पुनोन आवेनन. दुस्रोना मालसोमतगा कोंडा कीयनद आयो इनजोर मोसाना अडो उकुम एवेके, कोंडा कीयनद पापम इनजोर नना बह पुनेनन? 8 मति अडोता मेटे पापम अग़ दोर्किह कीता, कीसि नावा जीवातगा सबे रीतिनाङ कोंडा कीयनव विचर्क पुटिह कीता. बाराह्‌क इतेके, पापम केमा इनजोर अडो मतेकेने मावा जीवातगा अद पापम कीयनद विचर पुटिह्‌ता. 9 मुनेन नना मोसानाङ अडोनाङ पोल्‍लोङ पुनवा मतन, अस्के नना रंदिलेवा सुकमते पिसिंदन. मति अडोन पुतापया कसुर कीतोनन आंदन इनजोर पुतन. 10 ओसो देवुळताहि एग़िसि ताना मुनेह डोलतप लेह्‌का आतोनन इनजि पुतन. लोकुर अमेसाता पिसमुळता अग़दुन पुनिर इनजोर देवुळि माक अडोङ ईता, मति अविस्किन देहताह्‌कु अवे अडोङ नाकु हामुरता अग़दे ओसीतप मन्ह्‌ताङ. 11 बह इतेके अडोना उकुमता मेटे पापम अग़ दोर्किह कीता, कीसि नाक नाळेह कीता ओसो नाक हामुरता अग़दे ओसीता.

12 इद्रमलेह्‌का देवुळ ईतव अडोङ लागोङ इनजि इनोन, अव सबे देवुळताहि वाताङ, सेतेमताङ ओसो बेसताङ आंदुङ. 13 अह इतेके इव बेसताङ अडोङ नाक डोलनाह कीस्ताङा? अद्रम मुर्तिय केवोङ! नावा पापम बुदिये बेसताङ अडोना मेटे नाक हामुरता अग़देके ओसीता. इद्रमलेह्‌का देवुळताङ अडोङ नावा पापम बुदतुन पुन्पिह कीताङ ओसो पापम बेचोन लाग्वा मन्ह्‌ता इनजोर तोहताङ.

14 निटमे, मोसानाङ अडोङ इतेके देवुळतग्डाङ आंदुङ इनजोर माट पुतल. मति नना इसि मन्कना बुदतोनन, पापमता कय इळ्न मनवानन. 15 नना बेदिन कीकन इनजोर विचर कीय्ह्‌नन, अदिन केवोन. मति नना बेदिन केवोन इनजोर विचर कीय्ह्‌नन, अदिने कीय्ह्‌नन. नना बेद्रम ताकलाह आतन अद नाके तेळियो. 16 नना कीयनद कबळतुन लाग्वद कबळ इनजि कबुल आय्ह्‌नन इतेके, अडोङ बेसताङ इनजोर मानेम आय्ह्‌नन. 17-20 मति नयगा मनदनद बुदतगा बेदे बेसता पोल्‍लो इले इनजोर पुतन. बेसता कबळ कीयलाहि नाक विचर वास्ताये, मति अदिन नना कीया पग़वोन. अदिह्‌क नना बेद बेसता कबळ कीकन इनजोर विचर कीय्ह्‌नन, अदिन केवोन. मति नना बेद लाग्वा कबळ केवोन इनजोर विचर कीय्ह्‌नन, अदिने कीय्ह्‌नन. अह इतेके लाग्वाङ कबस्किन नना नावा विचरते केवानन आयोन, मति नयगा जागा आस मनदनद पापम बुदिये नाक अद्रम कीयनाह कीस्ता.

21 इद्रमि बेस्के नना बेसताङ कबस्क कीयलाह ऊळिह्‌नन, अस्के अमेसा नावा लोप्पा मनदनद लाग्वा बुदि नाक रोमिह कीस्ता इनजोर नना पुतन. 22 देवुळताङ अडोना लोप्पा नावा जीवातगा पका गिर्दा आस्ता. 23 मति नावा मेंदुलतगा उंद अलगता बुद दिसिह्‌ता, अद नाक देवुळताङ अडोन केंजवाह कीस्ता. इद पापमता बुदि नाक दोहतप लेह्‌का कीसि नावा मेंदुलतुन ताकिह कीस्ता. 24 अलो देवन! इद नावा बेचोटा गोसा! हामुरता अग़दे दायनद इद पापि मेंदुलताहि नाक बोग़ विळ्सिह कीयनोग़?† 7:24इद वचनतगा पोलु सिरप तनाय लोप्पा इनोग़, मति सबे विस्वसिरा लोप्पा वेहतह्‌तोग़. 25 मावा किर्स्तु येसुसामिये नाक विळ्सिह केवाल आंदोग़, देवुळतुह्‌क जोहर आयि! इद्रमलेह्‌का इंजेके नावा जीवाते देवुळताङ अडोन नना माळिह्‌नन. मति बेद बुदि नावा मेंदुलतगा मन्ह्‌ता, अद पापमता कय इळ्न मन्ह्‌ता.