1 अचोटेने देवुळदीपतगा बेरा सीना दिसता. अद इद्रम मता इतेके: उंद आंचाळ (इतेके इस्रयेल देसेम) दिसता, अद आंचाळि पोळ्दतुन गेंदेता लेह्‌कान उहचि मता. ओसो नेलातुन विहकिस मता. अहे महरानि केग़यना लेह्‌का तना तलातगा राजटोपि केग़्स मता. अद राजटोपितगा बारा उकाङ मताङ. 2 अद आंचाळि मेंदुदे मता. पया ताना बेस आयनद कगो एवताह्‌कु नोप तेदिस मता. अदिनेनाह्‌क अद नोपतुह्‌क केयसोर मता.

3 पया ओसो उंद सीना देवुळदीपतगा दिसता. अद इद्रम मता: उंद बेरा नेत्रल मासुंड तरस (इतेके देयह्‌कना मुक्याल) मता, तान्क एळुङ तलाङ, दहा कोहक मताङ. ओसो एळुङ तलानगा एळुङ राजटोपिङ केग़्स मता. 4 ताना तोका मूंड तूस्कनाहि उंद तूस उकान गुंजिसि बूमतगा अर्ह्‌चीता. अह कीसि पया, अद आंचाळि रिकम आतस्के ताना मग़िन लोपलाहि आंचाना मुनेह निच मता.

5 अद आंचाळ पया पेकान (इतेके किर्स्तुन) रिकम आता. ओग़ सबे जातिनोरिन पूरा अदिकरते ताकिह कीयलाह मतोग़. अद मासुंड तरस ओग़ पेकान तिनवस्केने उंद देवतुल ओन ऊंदता. अह कीसि देवुळतगा ओसो ताना राजकुर्सितगा ओता. 6 ओतस्के पया अद आंचाळि पेळ्ह्‌कल बूमतगा वितता. अगा उंद अजर्क रेंड नूह्‌क मूंड वीसाङ दियाङ एवनाह, तान अय कीयलाह देवुळि तानेनाह्‌क जागा तयर कीस मता.

7 पया देवुळदीपतगा उंद लळय आता. देवुळता मिकाइल इनदनद देवतुलि तना तोळतव देवतुल्किन पोसि ओसो मासुंडि तना तोळतविन (इतेके देयह्‌किन) पोसि ईनाह-आनाह लळय आताङ. 8 मति मासुंडि गेल्स पग़वो. अदिनेनाह्‌क देवुळदीपतगा मनदलाह तान्क जागा दोर्को. 9 पया अद बेरा मासुंडतुन बूमतगा अर्ह्‌चीता. अद मासुंडि इतेके सुरु मुनेता तरसि! तान इबलीस वने इन्ह्‌तोर इतेके देयह्‌कना मुक्याल इन्ह्‌तोर. अदे सबे बूमतोरिन नाळेह कीसोर वाता. मिकाइल तना तोळतव देवतुल्कना संगे, मासुंडतुन ओसो ताना तोळतविन बूमतगा अर्ह्‌चीता.* 12:9सुरु मुने तरसिये आदम ओसो अवान पापम कीयलाहि काग़्हता.

10 अचोटेने देवुळदीपतग्डाह जोरते उंद लेङ इद्रम केंज वाता: “मावा ऐंगेटोर विस्वसिरिन, देवुळता मुनेह नग़्का-पिळ्‍विळ पियल-पोळ्‍द कसुर ओपसोर मतदिन इंजेके बूमतगा अर्ह्‌चीता. इंजेके देवुळि तना मन्कलोरिन पिसिह कीयनद कगो वाता. देवुळि तना लावते राजेम ताकिह कीस्ता. इंजेके ताना किर्स्तु तना अदिकरतुन पूरा बूमतगा ताकिह कीस्तोग़. 11 मावा ऐंगेटोर विस्वसिर, तम्क कसुर ओपसोर मतद मासुंडतुन आरे कीतोर. गोरे पिलाता नेतुरता मेटे ओसो तमा वेहचोर तिरियतद साक्सिता मेटे तान आरे कीतोर. ओर ताना संगे लळेम आयह्‌पा हामुर वाता, तेला मति ओर तमा जीवाता पर्वा केवोर. 12 अदिनेनाह्‌क ए देवुळदीपतगा मनवालोरिर! मीट गिर्दा आम्ह्‌टु! इळ्ता बूमतगा ओसो सम्दुरतगा मनवालोरिर! मीक बेरा गोसा वायग़ा. देयह्‌कना मुक्याल पका ओङ आसि इंजेके मियगा रेगता. इंजेक तना कबळ कीयलाह एक्वा दियाङ इलेङ इनजोर अद पुता,” इनजोर अद लेङ इता.

13 पया मासुंडि तन्क बूमतगा अर्ह्‌चीतोर इनजोर ओङ आसि बह कीता इतेके, ओग़ पेकान रिकम आतद आंचान तिपल कीयलाहि ताना पेग़्केह दल्गता. 14 अद्रम कीताह्‌कु, आंचाळि मासुंडताहि पग़यिसि पेळ्ह्‌कल बूमतगा विति, अगा तान मूंड वर्साना आरुङ नेलाङ एवनाह अय कीयिर इनजोर देवुळि आंचाह्‌क डेगा पिटेताङ रेकाङ इता. 15 ईतस्के मासुंडि बह कीता, अद आंचान एग़ मुळ्हि इनजोर तना तोडटाहि एतुन बेरेग़ लेह्‌कान ताना पेग़्केडाहि पोङिह कीता. 16 मति बूमि अद आंचाह्‌क साय्ता कीता. अद बूमि बह कीता इतेके, मासुंडि तना तोडटाहि पोङिह कीतद एतुन ऊतता. 17 अदिनेनाह्‌क मासुंड तरसि आंचाना पोग़ोन ओङ आता; आसि तानाङ पेकोरा संगे लळेम आयलाह अता. तानाङ पेकोर इतेके देवुळताङ अडोन माळ्वालोर ओसो येसुना साक्सि एवालोर मन्कलोरु. 18 पया अद मासुंडि सम्दुरता दडटगा अन्ज निता.