1 अद्रमलेह्‌काने पया पकाय लावता ओसो उंद देवतुलिदेवुळदीपताहि इळ्न रेगनद ऊळतन. अद मोयुलतुन गेंदेता लेह्‌कान उहचि मता. ताना तला पोग़ोन देवुळविलता लेह्‌कान वेह्‌च मता. ताना मोकमि पोळ्द लेह्‌का दींचिस मता. ओसो तानाङ काल्‍क किसगुटाता लेह्‌कान मताङ. 2 अद देवतुलि लेहच मतद उड्‌ला तोला सीटटुन तना कयदे पोस मता. अदु तना तिनळ कादुन बार सम्दुरतगा, दावळ कादुन बार बूमतगा वाटिस मता. 3 पया डुवल कह्‌चना लेह्‌कान ताना लेङ वांदु. अद देवतुलि अद्रम केयतस्के एळुङ मल्काङ गुंळ्जनद केंज वाता. 4 एळुङ मल्काङ गुंळ्जनद केंज वातस्के, नना योहननन अव पोल्‍लोन राससोर मतन. अचोटेने देवुळदीपताहि उंद लेङ इद्रम इता: “गुंळ्जिह्‌पा वेहतव पोल्‍लोन रासमा, अविस्किन मकिह कीम,” इनजोर इता. 5 सम्दुरतगा ओसो बूमतगा तनाङ काल्किन वाटिस मतद देवतुलि तना तिनळ कयदुन पोग़ोन देवुळतेके आहता. 6-7 आहचि इद्रम किरिया कीता: “इंजेके वेल्‍ला दिया इले. एळुङ नंबरता देवतुलि तना अकुम ऊरिह्‌पा, देवुळि तना मकिह कीस मतद पोल्‍लोतुन निटम आनाह कीयग़ा. इद दियाते अव पोल्‍लोङ निटम आयनुङ इनजोर तना कबुरतोरिन अद मुनेन वेहच मता.” इनजि, पोग़ोटा बूमि ओसो अगा मनदनव, इळ्ता बूमि ओसो अगा मनदनव, सम्दुर ओसो तानगा मनदनव, इव सबेटविन पंडटद अमेसा-अमेसातुह्‌क जीवात मनदनद देवुळता पेदिर पोस किरिया कीता.

8 मुने देवुळदीपताहि नना केंजतद लेङु, ओसो वने नाक इद्रम इता: “अन! सम्दुरतुन ओसो बूमतुन ओय्ह्‌किस नितद देवतुलता कयदाहि, लेहच मनदनद तोला सीटटुन ओम,” इनजोर इता. 9 इतस्के नना तानगा अनजि, “अद उड्‌ला तोला सीटटुन नाक ईम,” इनजोर इतन. इतस्के अद नाक इता, “इदु! तिन! इद नीवा पोटातुन कयमुल कीयग़ा; मति नीवा तोडटुह्‌क ओग़्वे नेयदा लेह्‌का मिङग़ा,” इनजोर इता. 10 इतस्के नना ताना कयदाहि अद तोला सीटटुन ओस तितन. अद निटम नावा तोडटुह्‌क ओग़्वे नेयदा लेह्‌कान मिङिस मता; मति नना लोपतन अस्के, नावा पोटातुन कयमुल कीता. 11 तोला सीटटुन तितापया, नाक इद्रम इता: “इंजेके वायनद कालमते सबे देसेह्‌कनोरिन, सबे जातिनोरिन, सबे बासानोरिन, वेल्‍लाटोर राजालोरिन, ओरा लोप्पा आयनव पोल्‍लोन देवुळता जीवा नीक वेहतप लेह्‌कान, निमा ओसो वने वेहतकिन,” इनजोर इता.