1 पया ओरिन येसु पुन्‍पिह कीयनद पीटोते इद्रम वेहता बोटटोग़ इतेके, “ओर्वोग़ मन्‍कल तना जागातगा अंगुर सोपता वाळुम ओग़्सतोग़. ओग़्सिसि ताना सर्ने बंडाना वेटळ दोहतोग़. पया वाळुमता लोपा अंगुर-जोमा पेग़लाहि उंदि बोंदा तर्वतोग़ ओसो ताना एरे वाळुमतुन केपलाह उंद मंडा पंटोग़. पया ओग़ दुस्रोरिह्‌क कोराते ईसि, जेक देसेमते अतोग़. 2 पया अंगुर पंडिना पंटा वातस्‍के, ओरातोरग्डाहि पंडिना तना तूस एतलाहि ओग़ तना ओर्वोग़ ओर्युलतोन कोरातोरके लोहतोग़. 3 मति कोरातोर ओन पोसि पका नल्‍हतोर, अह कीसि वेट्टाङ कय्‍क पूंडिसीतोर. 4 पूंडटस्‍के पया माल्‍कल ओसो ओर्वोग़ ओर्युलतोन लोहतोग़. ओर कोरातोर ओना तलातुन विर्हतोर. ओसो लजा वानाह ओना कदर रेहतोर. 5 पया ओसो ओर्वोग़ ओर्युलतोन लोहतोग़, ओन ओर हव्‍कतोर. अस्‍के इद्रमे ओग़ माल्‍कल ओसो वेल्‍लाटोरे ओर्युलतोरिन लोहतोग़. मति कोरातोर ओरग्डाह उच्‍वुरिन बार नल्‍हतोर, उच्‍वुरिन बार हव्‍कतोर. 6 इंजेके ओग़ माल्‍कनगा तना जीवा कीतोग़ मग़िये पिसिस मतोग़. पया आक्रिते ‘नावा मग़िन मान तासनुर,’ इनजोर विचर कीसि ओग़ तना मग़िनु ओरके लोहतोग़. 7 लोहतस्‍के ओग़ वायनदिन कोरातोर ऊळिसि तम-तमाय इतोर, ‘अरे वेग़ इतेके माल्‍कना मग़ि आंदोग़. दट, वेने माट हव्किङ, अस्‍के इद वाळुम माके आयग़ा,’ इतोर. 8 इनजि ओर ओन पोस हव्‍कतोर, अह कीसि अंगुर वाळुमता पलते जेग़्किसीतोर,” इनजोर येसु पीटोतुन मारिह कीतोग़. 9 कीसि इद्रम इतोग़, “अंगुर वाळुमता माल्‍कल इंजेके ओरिन बह कीयनोग़? ओग़ वासि अद वाळुमतुन कयदे कीतोर सबेटोर कोरातोरिन हव्‍कनोग़. अह कीसि अद वाळुमतुन दुस्रोरा कयदे ईयनोग़,” इतोग़. 10-11 ओसो इतोग़, “ ‘बेद बंडातुन मुने बेल्‍दार्क पोहचीतोर, अदे बंडा आदरता मूला-बंडा आता. इद देवुळबाबानाये कबळ आंदु, इद माक पकाय बामतप दिसिह्‌ता.’* 12:10-11 इद पोल्‍लो देवुळताङ पाटाङ 118:22, 23, इगा दोर्किह्‌ता. इद्रम देवुळता सास्‍त्रमतगा रासतदिन अर्वविरा?” इनजोर इतोग़. 12 येसु वेहतद पुन्‍पिह कीयनद पीटोतुन केंजिसि, “मावाय लोप्‍पा इद पीटो वेहतोग़,” इनजोर पेर्मालोर, सास्‍त्रमगूरुर पुतोर. अदिह्‌क येसुन ओर पोयतलाहि अग़ पर्ह्‌किंदुर. मति लोकुरा रेयतुह्‌कु ओन पोयवाये अहे अतोर.

13 पया ओर बह कीतोर इतेके, “येसु वळ्‍ह्‌कनद पोल्‍लोते ओन एग़्किह कीम्‍ह्‌टु,” इनजोर उच्‍वुर परुसिरिन ओसो उच्‍वुर एरोद राजाना तुंगातोरिन येसुनगा लोहतोर. 14 लोहतस्‍के ओर येसुनगा वासि, “गूरु, निमा सेतेम मन्कनिन मह्‌निन, बोर बाताल इंदनुर इनजोर आल्‍सविन, निमा लोकुरा मोकम ऊळिस वळ्‍ह्‌कविन, देवुळता अग़दुन सेतेमते तोहतह्‌निन, इद माट पुह्‌नोम. इंजेक माक वेहा, रोम सर्करतुह्‌क सिद्‌वा दोहतनद मावा अडोना अडम मन्‍ह्‌ताया, इलेया? माट सिद्‌वा दोहतकोमा, दोहोमा?” इनजोर ओर येसुन ताल्‍ह्‌कतोर. 15 मति येसु ओरा सोङतुन पुनजि ओरिन इतोग़, “नाक बाराह्‌क एग़्किह कीयलाह ऊळिह्‌निर? नाक ऊळलाह उंदि रुप्या-बंडि ताट,” इतोग़. 16 ओर ततस्‍के येसु ओरिन, “इद बंडटगा बोना पोटो ओसो पेदिर रासतद मन्‍ह्‌ता?” ताल्‍ह्‌कतोग़. “कय्‍सर राजाना” इनजोर ओर इतोर. 17 इतस्‍के येसु ओरिन इतोग़, “अह इतेके बेद रोम राजेमता कय्‍सर राजाना मन्‍ह्‌ता, अद ओन्‍के ईम्‍ह्‌टु! ओसो बेद देवुळ ताल्‍ह्‌किह्‌ता अदिन देवुळतुह्‌क ईम्‍ह्‌टु,” इनजोर इतोग़. पया इद्रम केंजिसि ओर पका बयल आतोर.

18 पया सदुकिरा तुंगातोर उय्तुर येसुनगा वासि ताल्‍ह्‌कतोर. (वेर सदुकिरा तुंगातोर इतेके मन्‍कलोर डोलतापया बोरे जीवा अरवोर इनजोर इंदुर.) 19 “गूरु! मोसाल मावासाटि इद्रम रासिस तासतोग़ इतेके, ‘बोग़ाय मन्‍कल मुते तचि मग़-मियाळ आयवाये डोलतेके ओना तमोग़ अद रांडे मुतेन तायेग़. तचि हातोग़ तमदादाना जालपिलतुन आङिह कीयेग़,’ इनजोर मन्‍ह्‌ता. 20 इंजेके तमोग़ एळवुर मतोर. ओरग्डाहि मुनेतोग़ तमदादाल मुते ततोग़. मति मग़-मियाळ आयवाये डोलतोग़. 21 डोलतस्‍के ओना पेग़्केडोग़ अद रांडे मुतेन तासतोग़. ओग़ वने मग़-मियाळ आयवाये डोलतोग़. ओसो ओर्वोग़ ओना पेग़्केडोग़ वने अद्रमे डोलतोग़. 22 इद्रमलेह्‌का तमोग़ एळवुर आसि ओर्वोग़-ओर्वोग़ ताना संगे जोळेम आस मतोर, मति मग़-मियाळ आयवाये डोलतोर. ओर सबेटोर डोलता पया अद रांडे आंचाळ वने डोलता. 23 मति इंजेके ओर ओसो वने जीवा अरतस्‍के, एळवुरग्डाहि अद आंचाळि बोना मुते आयग़ा? बाराह्‌क इतेके ओर एळवुर आसि ताना संगे जोळेम आस मतोर,” इतोर.

24 इतस्‍के येसु ओरिन इतोग़, “हामुरताहि जीवा अरयनालोपा देवुळता सास्‍त्रम बाताङ वेहतह्‌ता, अविन मीट पुनविर, ओसो हामुरताहि तेग़्किह कीयनद देवुळता लावतुन वने पुनविर, अदिह्‌क मीटु गंगात लेसतप मह्‌निर. 25 वेर डोलतोर मल्‍स जीवा अरयनुर अस्‍के, ओरु जोळजंतुर आयोर वने ओसो जोळजंतुर कीस एवोर वने. मति ओरु देवुळदीपतगादेवतुल्‍कना लेह्‌का मर्मिङ आयवाय मंदनुर. 26 मति डोलतोर मल्‍स जीवा अरयनुर, ताना लोप्‍पा मोसाल रासतद सास्‍त्रमतगा किस पोतिस मतद मरा जपता लोप्‍पा मीट अर्विसि पुनविरा? मावा पेदामुय्तोर अब्रहम, इसक, याकुब, वेर हातस्‍के, वेल्‍लाङे वर्साना पया देवुळि मोसान इता, ‘अब्रहम, इसक, याकुब, वेर मोळ्‍कनद देवुळतन ननान आंदन,’ इता. 27 इतेके इद हातोरा देवुळ आयो मति जीवात मनवालोरा देवुळ आंदु. मीट इद पोल्‍लोते वेल्‍लाय लेसतिर,” इतोग़.

28 पया येसु ओसो सदुकिर वळ्‍ह्‌किह्‌पा ओर्वोग़ सास्‍त्रमगूरु केंजतोग़. केंजिसि येसु ओरिन बेस पोल्‍लो मल्‍ह्‌तोग़ इनजि ओग़ येसुन इद्रम ताल्‍ह्‌कतोग़, “गूरु! सबेट्‌क बेरा अडो बेद आंदु?” इतोग़. 29 इतस्‍के येसु इतोग़, “सबेट्‌क बेरा अडो इद आंदु: ‘ए इस्रयेल लोकुरिर, केंजाट! सिरप मावा देवुळये सामि आंदु. 30 नीवा सामि देवुळतुन निमा पूरा बुदताहि, पूरा जीवाताहि, पूरा विचरताहि, पूरा लावताहि जीवा कीमु.’ 31 ओसो तेना लेह्‌का दुस्रा अडो इद्रम मन्‍ह्‌ता: ‘नीक निमा बेचोन जीवा कीय्‍ह्‌निन, अचोन दुस्रोरिन जीवा कीमु,’ इव रेंड आडोन वीळिसि बेदे बेरा अडो इले,” इनजोर इतोग़. 32 पया सास्‍त्रमगूरु येसुन इतोग़, “गूरु, बेस-नेह्‌ना वेहतिन! देवुळि उंदिये मन्‍ह्‌ता, तान विळ्‍सिसि बेदे देवुळि इले इनजोर सेतेम वेहतिन. 33 ओसो देवुळतुन पूरा बुदताहि, पूरा विचरताहि, पूरा जीवाताहि, पूरा लावताहि जीवा कीयना, अहे कुदतुन जीवा कीयना लेह्‌का दुस्रोरिन जीवा कीयना, इदु देवुळतुह्‌क ईयनद सबे मोकतुह्‌काय, कोडितुह्‌काय वीळिसि बेरा पोल्‍लो आंदु,” इनजोर इतोग़. 34 पया ओग़ मन्‍कल तेल्‍वते वळ्‍ह्‌कतोग़ इनजोर येसु पुतोग़. पुनजि ओन इतोग़, “निमा देवुळता राजेमतगाह्‌क इंजेके वेल्‍ला जेक इल्‍विन,” इनजोर इतोग़. तेना पया ओसोवने बाताङाय ताल्‍ह्‌कलाह बोन्‍के बह दीरा वावो.

35 पया येसु मंदिरतगा काग़्हचोरे ओरिन इद्रम ताल्‍ह्‌कतोग़, “देवुळ लोहवाल पिसिह केवाल किर्स्‍तुनु, दाविद राजाना पुळ्‍गतोग़ इनजोर सास्‍त्रमगूरुर बाराह्‌क इन्‍ह्‌तोर? 36 दाविद राजानगा देवुळता पवित्र जीवा रेगता अस्‍के ओग़ कुदि इद्रम इतोग़:

38 अद्रमे येसु काग़्हनेके ओरिन इतोग़, “सास्‍त्रमगूरुरग्डाहि उसरते मन्‍ह्‌टु. ओर तमा बेरा तनम तोहतलाहि लाट गेंदेङ केग़्स तिरियलाह विचर कीस्‍तोर. 39 ओसो बजरतगा मनवालोर तम्‍क जोहर कीयिर इनजोर विचर कीस्‍तोर, अहे पार्तना कीयनाङ लोह्‌कनगा मुनेहतेह कुर्सिनगा उदलाह विचर कीस्‍तोर. 40 ओसो वेर गरिब रांडे आस्‍किन नाळेह कीसि लूटे कीस्‍तोर. ओसो लोकुरिह्‌क दिसना इनजि वेल्‍लाय जोम पार्तना कीस्‍तोर. वेर लोकुरिह्‌क मात्रम दुस्रोरिह्‌काय एक्वा सिक्‍सा देवुळि ईयग़ा,” इनजोर वेहतोग़.

41 पया लोकुर मंदिरता सन्दुकतगा देवुळतुह्‌क कोताङ बेद्रम वाटिह्‌तोर, इनजोर येसु सन्‍दुकता मुनेह उदिस ऊळसोर मतोग़. अस्‍के वेल्‍लाटोर मता मन्‍कलोर वेल्‍लाय दान वाटटोर. 42 अचोटेन ओसोय गरिब रांडे आंचाळ वन वासि, इतुळताङ रेंड इचुटाङ कोताङ वाटटा. 43-44 वाटटस्‍के येसु तनाङ कग़यवालोरिन केयिसि ओरिन इतोग़, “नना मीकु सेतेम वेहतह्‌नन, सन्‍दुकतगा दान वाटटोर सबेटोरगा वेल्‍लाङे कोताङ मन्‍ह्‌ताङ. ओसो दान वाटटापया वने ओरगा कोताङ पिसिह्‌ताङ. मति इद आंचानगा बाताङे इलेङ, तेला मति तना पिसवटुह्‌क तासिस मतव पूरा कोतान दान वाटटा. अदिनेनाह्‌क देवुळता कोंडा मुनेह इद रांडे आंचाळिये सबेटोरिह्‌काय एक्वा कोताङ वाटटा,” इनजोर इतोग़.