1 पया येसु तनाङ कग़यवालोरा संगे अग्डाहि यहुदा पटटा एरियाते वातोग़, वासि अग्डाह योर्दन बेरेटा अबर बाजे अतोग़. अस्‍के ओसो वने गोह्‌डिनाङ गोह्‌डिङ लोकुर ओनगा जमा आतोर. आतस्के येसु तना अल्‍वट मतपु ओरिन काग़्हता बोटटोग़. 2 पया उच्‍वुर परुसिर येसुनगावासि, ओन एग़्किह कीयलाह इतोर, “मन्‍कल तना मुतेन देह्‌चीयना इद पोलिह्‌ताया?” इनजोर ताल्‍ह्‌कतोर. 3 ताल्ह्‌कतस्के येसु ओरिन, “मोसाल मीक बेद उकुम ईतोग़?” इनजोर ताल्‍ह्‌कतोग़. 4 ओर इतोर, “मुतेन विळ्‍सना इतेके ‘मुतेन विळ्‍सिह्‌नन’ इनजोर सीटि रासिसि विळ्‍सिसीयना इनजोर उकुम ईतोग़,” इतोर. 5 येसु ओरिन इतोग़, “मीट देवुळता पोल्‍लो केंजवाह्‌कु मीवा कैंगम ऊळिसि मोसा मुय्तोग़ मीवाङ आस्किन देहचीयलाह अडो रासतोग़. 6 मति देवुळि इद बूमतुन पुटिह कीतग्डाहिये ओरिन आंचाळ-कोय्तोग़ इनजि कीसीता.✡ 10:6 पुटमुळि 1:27 7 ‘अदिनेनाह्‌क कोय्तोग़ तना तलोग़-तपेरिन विळ्‍सिसि तन मुतेना संगे जोळेम आसि, ओर इर्वुर एग़वालेवा उंदियलेह्‌का आयनुर,’✡ 10:7 पुटमुळि 2:24 इह इनजोर मीट सास्‍त्रमते अर्विसि ताना अर्तम पुनविरा? 8 अदिह्‌के इंजेके ओर इर्वुर अलग-अलग आयोर, मति उंदियलेह्‌का आस मन्‍ह्‌तोर. 9 अदिनेनाह्‌क बोरिन देवुळि जोळे कीता, ओसो ओर अमेसा ऐंगेन मनदनुर इनजि ताना विचर मन्‍ह्‌ता, इतेके ओरा जोळतुन मन्‍कलोर देहमाकिर,” इनजोर वेहतोग़.

10 पया ओर तमा जागातगा अतस्‍के मुतेन विळ्‍सनद पोल्‍लोता लोप्‍पा ओसो कग़यवालोर येसुन ताल्‍ह्‌कतोर. 11 ताल्ह्‌कतस्के येसु इतोग़, “बोग़ाय तना मुतेन विळ्‍सिसि, ओसो उंदि दुस्रा मुतेन ततोग़ इतेके ओग़ तना मुनेता मुतेना अडम सिंड्रि-साट्याता पापम कीस्‍तोग़. 12 अद्रमलेह्‌काने मुते वने तना मुजोन विळ्‍सिसि, ओसो दुस्रोन्क अता इतेके अद सिंड्रि-साट्याता पापम कीस्‍ता,” इतोग़.

13 उंद दिया तमाङ पिलाङ-पेकोरा पोग़ोन कय तासिसि, ओरिह्‌क बर्कत ईयेग़, इनजोर लोकुर तमाङ बाला पेकोरिन येसुनगा तचोर मतोर. मति इके येसुना एरे पेकोरिन तमाट, इनजोर कग़यवालोर ओराङ तलिस्‍क-तपेरिन तेर्हतोर. 14 अस्‍के येसु ऊळतोग़, ऊळिसि ओङ आसि तनाङ कग़यवालोरिन इतोग़, “पिलाङ-पेकोरिन नयग वायलाह ईम्‍ह्‌टु, ओरिन रोमिह केमाटु. बाराह्‌क इतेके देवुळता राजेम वेरा लेह्‌का कुलुल बुदतोरिह्‌के आस्‍ता. 15 नना मीक सेतेम वेहतलाह आतन, बोरु वेर उड्‌लोर पेकोरा बुदता लेह्‌का आसि देवुळतुन तमा जीवातगा राजेम कीयलाह एवोर, ओरु ताना राजेमतगा बेस्‍केन ओळिय पग़वोर,” इनजोर वेहतोग़. 16 वेहचि ओर पिलाङ-पेकोरिन ओग़्ङतोग़, ओग़्ङिसि ओरा पोग़ोन तना कय तासिसि ओरिह्‌क बर्कत ईतोग़.

17 पया तनाङ कग़यवालोरा संगे येसु अग़दे अनजोर मतोग़, अस्‍के ओर्वोग़ मन्‍कल वित वासि येसुना मुनेह मिंडाङ कोटिसि इद्रम ताल्‍ह्‌कतोग़, “गूरु! निमा पका सेतेमतोनिन आंदिन. नाक वेहा, देवुळता संगे अमेसाता पिसमुळ दोर्किह कीयलाहि नना बाताल कीकन?” इतोग़. 18 इतस्‍के येसु ओन इतोग़, “निमा नाक सेतेमतोनिन इनजोर बाराह्‌क इह्‌निन? देवुळतुन विळ्‍सिसि बोग़े सेतेमतोग़ इलेग़. 19 निमा मोस‍नाङ अडोङ इतेके पुह्‌निने: बोन हव्‍कमा, साट्या कबळ केमा, बोनाङ कलमा, जोलता साक्‍सि एमा, बोन नाळेह केमा, आपुना तलोग़-तपेरा पोल्‍लो केंजना,”✡ 10:19 निर्गमन 20:12-16; व्यवस्थाविवरण 5:16-20 इनजोर वेहतोग़. 20 वेहतस्के ओग़ येसुन इतोग़, “इव सबे पोल्‍लोन उड्‌लस्‍केडाहिये माळसोर वायलाह आतन गूरु!” इतोग़. 21 ओना पोल्‍लोतुन केंजिसि येसु ओन जीवा कीस ऊळतोग़, ऊळिस इतोग़, “इंगो निटमे, मति नियगा उंद पोल्‍लोता कमि मन्‍ह्‌ता. अन! नियगा मनदनद सबे मालसोमतुन वमिसि, लेवोरिह्‌क ईम, अद्रम कीतिन इतेके पोग़ोन देवुळता जागातगा नियेनाह्‌क मालसोम दोर्कग़ा. अद्रम कीसि, निमा नावा संगे मनजि नावाङ कग़या,” इनजोर इतोग़. 22 येसुना इद पोल्‍लोतुन केंजिसि ओग़ मन्‍कना मोकम एग़ रेग़ता पया ओग़ ओसोय मेसेह्‌ने आसि अतोग़. बाराह्‌क इतेके, ओग़ पका मालसोम मता मन्‍कल मतोग़.

23 पया येसु सर्ने ऊळिसि तनाङ कग़यवालोरिन इतोग़, “पका मालसोम मता लोकुर, देवुळतुन तमा जीवातगा राजेम कीयलाह ईयना इतेके ओरिह्‌क पका तिपल आस्‍ता. 24 पका मालसोम इतेके देवुळता देय्‍वाता सीना आंदु इनजि यहुदिरा विचर मता. अदिनेनाह्‌क इदिन केंजिसि कग़यवालोर बयल आतोर; मति येसु ओसो ओरिन इतोग़, पेकोरिर! मालसोमतगा बर्वस केवालोर मन्‍कलोरिह्‌क, देवुळतुन तमा जीवातगा राजेम कीयलाह ईयना इतेके ओरिह्‌क पका तिपल आस्‍ता. 25 ओकावेला ऊज-बूकातुह्‌क रूटुम पेसिस दाया पग़यग़ा, मति देवुळतुह्‌क तमा जीवातगा राजेम कीयलाह ईयना इतेके, मता मन्‍कलोरिह्‌क तिपल मन्‍ह्‌ता,” इनजोर वेहतोग़. 26 इतस्‍के कग़यवालोर बयल आसि तम-तमाय इद्रम इतोर, “अह इतेके अमेसाता पिसमुळ पया बोन्‍क दोर्कग़ा?” इतोर. 27 इतस्‍के येसु ओरिन ऊळिस इतोग़, “मन्‍कलोरा लावते देवुळता संगे मनदलाह दोर्को, मति देवुळ इतेके सबे कीया पग़यह्‌ता.” 28 इनजोर इतस्‍के पत्रु येसुन इतोग़, “ऊळा गूरु, माट इतेके कतमे विळ्‍सिसि नीवा पेग़्के वातोम,” इतोग़. 29 अस्‍के येसु इतोग़, “नना मीकु सेतेम वेहतह्‌नन, बोग़ आयि नयेनाह्‌क, नावा बेसता कबुरतुन पोकुर कीयनेनाह्‌क तना लोन-दुवरतुन, दादाल-तमोनु, एलाळ-बायिनु, तलोग़-तपेनु, पिलाङ-पेकोरिन, जागा-बूमतुन विळ्‍सनोग़, 30 ओन्‍क इद कालमते लेकालेवा सम्‍सरम ओसो एळ्म-दळ्मतोर दोर्कनुर. अहे नावा मन्‍कल आतह्‌कु लोकुर ओन तिपल वने कीयनुर. मति वायना कालमते ओन्‍क अमेसाता पिसमुळ वने दोर्कग़ा. 31 मति इंजेके बोर मुनेतोर मन्‍ह्‌तोर, वायनद कालमते आक्रितोर आयनुर, ओसो बोर इंजेके आक्रितोर मन्‍ह्‌तोर, ओरु अस्‍के मुनेतोर आयनुर, इद्रम वेल्‍लाटोरे आयनुर,” इनजोर वेहतोग़.

32 पया ओर येरुसलेम सहरता अग़ पोस अनेके, येरुसलेम दायलाह आतोग़, अगा लोकुर जमा आयनुर इनजोर कग़यवालोर बयल आतोर. पयाह-पयाह अनवालोर मन्‍कलोर बह-बह आयग़ा इनजोर रेयिस मंदुर. अस्‍के येसु बारा कग़यवालोरिन केयिसि येरुसलेम अतस्‍के मन्‍कलोर तन्‍क बह कीस्‍तोर इनजोर वेहता बोटटोग़. 33 येसु ओरिन इतोग़, “केंजाटु, माट येरुसलेम दायनल, अगा अतापया नना माने-मन्‍कना नडुम पुटटोनन मन्‍ज तेला, नाक लोकुर पेर्मालोरा ओसो सास्‍त्रमगूरुरा कयदे पोस ईयनुर. नाक पया वेर पेर्मालोर ओसो सास्‍त्रमगूरुर हव्‍कनद सिक्‍सा कीयलाह वेहचि, देवुळतुन पुनवोर रोम सर्करतोरा कयदे ओसीयनुर. 34 ओर नाक उस्‍कनुर-पास्‍कनुर, जेट्‌लाते नल्‍हतनुर, अह कीसि नाक हव्‍कनुर. मति नना मूंड दियाने जीवा अरयकन,” इनजोर वेहतोग़.

35 तेना पया जेबेदिनाङ मग़्कु याकुबि, योहनि वेर ओनगा वासि, “गूरु, माट बेद नीक ताल्‍ह्‌ककोम अद निमा मयेनाह्‌क कीकिन इनजोर मावा विचर मन्‍ह्‌ता,” इतोर. 36 येसु ओरिन इतोग़, “नना मियेनाह्‌क बाताल कीकन इनजोर मीवा विचर मन्‍ह्‌ता?” इतोग़. 37 ओर इतोर, “निमा नीवा राजगादेतगा उदकिन अस्‍के माक तमोग़ इर्वुरिन, ओर्विन नीवा तिनळ बाजे, ओसो ओर्विन नीवा दावळ बाजे उदलाह ईम,” इनजोर इतोर. 38 इतस्‍के येसु ओरिन इतोग़, “मीट बाताल ताल्‍ह्‌किह्‌निर, अद मीक तेळियिह्‌तया? नना बेद तिपलते अरयकन, अद तिपलते मीट अरया पग़यकिरा? नना बेद सिक्‍सा एतकन, अद सिक्‍सा मीट एता पग़यकिरा?” इतोग़. 39 ओर इतोर, “इंगो! माट तिपल आयलाह तयर मह्‌नोम,” इतस्‍के येसु इतोग़, “नना अरयनद तिपलते मीट अरयकिर, नना एतनद सिक्‍सा मीट एतकिर. 40 मति नावा तिनळ बाजे ओसो दावळ बाजे उदिह कीयनद नावा कबळ आयो. देवुळि अद जागा बोरेनाह्‌क ओपे कीस तासता, ओरे अगा उदनुर,” इनजि इतोग़. 41 इदिन केंजिसि दहा मुल कग़यवालोर वेर इर्वुरा पोग़ोन ओङ आतोर. 42 पया येसु सबेटोर कग़यवालोरिन तना एरे केयिस इद्रम इतोग़, “इद दुनियातोर राजालोर तमा रय्ततुन कय इळ्‍न तासिह्‌तोर, अहे दुनियातोरा बेरा मन्‍कलोर उड्‌ला मन्‍कलोरगा तमा अदिकर ताकिह कीस्‍तोर, इद इतेक मीक एर्काये. 43 मति मीट मात्रम अद्रम कीयनद आयो. मियग्डाहि बोग़ देवुळता मुनेह बेरोग़ आयलाह ऊळिह्‌तोग़, ओग़ मीवा सेवा केवाल आयेग़. 44 अहे बोग़ मियग्डाहि देवुळता मुनेह सबेट्‌क बेरोग़ आयलाह ऊळिह्‌तोग़, ओग़ मीवा साकुर केवाल आयेग़. 45 माने-मन्‍कना नडुम पुटटोनन, नना वने दुस्रोरिन नावा सेवा कीया वेहतलाह इद बूमते वायोन. मति दुस्रोरा सेवा कीयलाहि, ओसो वेल्‍लाटोरा पापमता दांड निहतलाह, नना नावा जीवा ईयलाह वातन. अहलेह्‌का मीट वने मन्‍ह्‌टु,” इनजि येसु इतोग़.

46 अद्रमे पया येसु ओसो ओनाङ कग़यवालोर यरिग़ो नाटे वातोर, वासि नाटेनाहि पेसिस अनेके, ओरा पयाह वेल्‍लाय मुल मतोर. अस्‍के तिमाय इनवाना मग़ि बरतिमाय इनवाल गुडि मतोग़, ओग़ गुडि अग़दा कचुल उदिसि बिचेम ताल्‍ह्‌किंदोग़. 47 पया ओग़ु नासरेत नाटेनोग़ येसु इद अग़दुह्‌क दायलाह आतोग़ इनजोर केंजिसि, “ए येसु! दाविद राजाना कूळतोनिन! नावा पोग़ोन दया कीमु,” इनजोर केयतोग़. 48 केयतस्‍के अगा मतोर वेल्‍लाटोर मन्‍कलोरु, “निमा केमेन मन रा,” इनजोर ओन तेर्हतोर. तेला मति ओग़ इंका ओसो पका केयलाह आतोग़. “ए दाविद राजाना कूळतोनिन! नावा पोग़ोन दया कीम!” इतोग़. 49 इतस्‍के येसु ओना लेंङतुन केंजिसि अगान नितोग़. निचि, “अले ओन केयाट” इतोग़. इतस्‍के अग्डोर ओन, “तेदा! दीरा पोय्म! येसु नीक केयलाह आतोग़,” इतोर. 50 इतस्‍के ओग़ तना मुचिस मतद गेंदेतुन जेग़कतोग़, जेग़्किसि पोर्क तेदिसि येसुनगा वातोग़. 51 पया येसु ओन इतोग़, “नना नियेनाह्‌क बाताल कीकन इनजि नीवा विचर मन्‍ह्‌ता?” इतस्‍के ओग़ गुडि, “नाक तोवनाह कीसीम गूरु,” इनजोर इतोग़. 52 इतस्‍के येसु इतोग़, “अले! अह इतेके नावा पोग़ोन विस्वस कीतिन, अदिह्‌क तोवयकिन,” इतोग़. इताहे ओग़ तोप्नेन तोवतोग़. तोवतस्‍के येसुना संगे अतोग़.