1 पया येसु तनाङ कग़यवालोरिन दिनम पार्तना कीसोर मनदना, ओसो अमेसा पार्तना कीयलाह बेस्केन आरेम आयना आयो, इनजोर उंद पीटो इद्रम वेहतोग़. 2 “उंद नाटेनगा ओर्वोग़ गाय्ताल मतोग़. ओग़ लोकुरा नेयम कीसीन्दोग़. मति ओग़ मन्कल मात्रम देवुळतुन बह रेयवाल आयोग़, ओसो लोकुरा वन पर्वा केवाल आयोग़. 3 अदे नाटेनगा उंदि रांडे आंचाळ मता. अद ओनगा दिनमे वासि, ‘गाय्ता, नावा विरुदतोना संगे मनदनद कट्‌लातुन नेयम कीस देहचीम,’ इनजोर वेहन्दु. 4 वेल्‍लाङे दियाङ आनाह ओग़ ताना नेयमतुन पर्वा केवालेवा केमेन मतोग़. मति उंद दिया ओग़ तनतनाय विचर कीतोग़, ‘नना देवुळतुह्‌के बह रेयोन, ओसो मन्कह्‌के बह रेयवानन आयोन. 5 तेला मति इद रांडे आंचाळि दिनमे नयग वासि कयर कीस्ता. अदिह्‌क इंजेक तेना नेयम कीसि, देहचीतेकेन बेस आयग़ा. इलवेके इद दिनमे कयर कीसोरेन मनदग़ा,’ इतोग़.”

6 पया ओसो येसुसामि इतोग़, “नेयम कीसेवाल लाग्वोग़ मन्कल बाताल इतोग़, अद पोल्‍लोतुन सीता कीम्ह्‌टु. 7 देवुळ आचतोर लोकुर, देवुळतुन नग़्का-पियलि कोळ्व कीसोर मन्ह्‌तोर, ओरा नेयम आयना इनजि ओरिह्‌क तोळ ईयलाहि देवुळि आल्सेम कीयग़ाया? 8 नना मीक वेहतह्‌नन, देवुळि ओरा नेयम चट्‌पिट कीसीयग़ा. तेला मति माने-मन्कना नडुम पुटटोनन नना बेस्के मल्स वायकन, अस्के इद बूमतगा विस्वसतुन विळ्सवा पार्तना केवालोर दोर्कनुरा?” इनजोर वेहतोग़.

9 ओसो उय्तुर मन्कलोरु माटे देवुळतुह्‌क विचर वानाह पिसिह्‌नोम इनजोर दुस्रोरिन पास्किन्दुर. ओरेनाह्‌क वने येसु उंद पीटो वेहतोग़. 10 “इर्वुर मन्कलोर देवुळतुन पार्तना कीयलाहि मंदिरतगा अतोर. ओरग्डाह ओर्वोग़ बार परुसि, ओर्वोग़ बार नाकातगा सिद्‌वा एनवाल. 11 परुसि बाताल कीतोग़ इतेके, ओग़ सिद्‌वा एनवानग्डाह जेक निचि, इद्रम पार्तना कीतोग़, ‘ए देवुळतिन! नना दुस्रोरा लेह्‌का कलेनन आयोन, ओसो नाळेह केवानन वने आयोन, साट्या कबळ केवोन. ओसो नियोग़ सिद्‌वा एनवाना लेह्‌का वने नना लोकुरिन मुळ्हवानन आयोन. अदिनेनाह्‌कु नना नीक जोहर कीय्ह्‌नन. 12 वारममेटुह्‌क रेंड मल्काङ उपस कीय्ह्‌नन. नावा कमयता दहा तूस्कनग्डाहि उंद तूस नियेनाह्‌क दान वने ईय्ह्‌नन,’ इनजोर इतोग़.

13 “मति सिद्‌वा एनवाल मन्कल जेक नितोग़. ओन्क पोग़ोन ऊळलाह वने दीरा वावो. ओग़ तना पापमतुन आलिह कीसि,* 18:13 सिद्‌वा एनवालोर रोम सर्करतुह्‌क सिद्‌वा एन्दुर, एनेके बेचोक एतना मंदु तान्काय वीळिस कोताङ एन्दुर. अदिनेनाह्‌क यहुदि लोकुर वेरिन पाप्यह्‌लोर इन्दुर. अर्युल पासोर इद्रम पार्तना कीतोग़, ‘ए देवुळबाबा! नना बेरा पापि मन्कनन आंदन. नावा पोग़ोन जीवा लोपा,’ इनजोर इतोग़. 14 पया ओर इर्वुरग्डाहि सिद्‌वा एनवाले देवुळता मुनेह सेतेमतोग़ आसि लोन अतोग़. मति परुसि सेतेमतोग़ आयोग़. बाराह्‌क इतेके, बोग़ तन्क बेरोनन इद्रम विचर कीस्तोग़, देवुळि ओन उड्‌लोग़ कीस्ता. मति बोग़ तन्क उड्‌लोनन इद्रम विचर कीस्तोग़, देवुळि ओन बेरोग़ कीस्ता,” इद्रम वेहचि पीटोतुन येसुसामि मारिह कीतोग़.

15 उंद दिया तमाङ पेकोरा पोग़ोन कय तासिसि, ओरिह्‌क बर्कत ईयेग़, इनजोर लोकुर येसुनगा बाला पेकोरिन तचोर मतोर. मति इके येसुना एरे पेकोरिन तमाट, इनजोर कग़यवालोर ओराङ तलिस्क-तपेरिन तेर्हतोर. 16 मति येसु पेकोरिन तनगा केयिसि, कग़यवालोरिन इतोग़, “पिलाङ-पेकोरिन नयग वायलाह ईम्ह्‌ट, ओरिन रोमिह केमाटु. बाराह्‌क इतेके देवुळता राजेम वेरा लेह्‌का कुलुल बुदतोरिह्‌के आस्‍ता. 17 नना मीक सेतेम वेहतलाह आतन, बोरु वेर उड्‌लोर पेकोरा बुदता लेह्‌का आसि देवुळतुन तमा जीवातगा राजेम कीयलाह एवोर, ओरु ताना राजेमतगा बेस्केन ओळिय पग़वोर,” इनजोर वेहतोग़.

18 पया ओर्वोग़ यहुदि मुक्याल येसुन इद्रम ताल्ह्‌कतोग़, “गूरु! निमा पका सेतेमतोनिन आंदिन. नाक वेहा, देवुळता संगे अमेसाता पिसमुळ दोर्किह कीयलाहि नना बाताल कीकन?” इतोग़. 19 इतस्के येसु ओन इतोग़, “निमा नाक सेतेमतोनिन इनजोर बाराह्‌क इह्‌निन? देवुळतुन विळ्सिस बोग़े सेतेमतोग़ इलेग़. 20 निमा मोसानाङ अडोङ इतेके पुह्‌निने: साट्या कबळ केमा, बोन हव्कमा, बोनाङ कलमा, जोलता साक्सि एमा, आपुना तलोग़-तपेरा पोल्‍लो केंजना✡ 18:20 निर्गमन 20:12-16; व्यवस्थाविवरण 5:16-20,” इनजोर वेहतोग़. 21 ओग़ मुक्याल, “इव सबे पोल्‍लोन उड्‌लस्केडाहिये माळसोर वायलाह आतन गूरु!” इतोग़. 22 ओना पोल्‍लोतुन केंजिसि येसु इतोग़, “इंगो निटमे निमा उड्‌लग्डाहि अव अडोन माळसोर वातिन, मति नियगा इंका ओसो उंद पोल्‍लोता कमि मन्ह्‌ता. अन! नियगा मनदनद सबे मालसोमतुन वमिसि, लेवोरिह्‌क तूसिसीम, अद्रम कीतिन इतेके पोग़ोन देवुळता जागातगा नियेनाह्‌क मालसोम दोर्कग़ा. अद्रम कीसि, निमा नावा संगे मनजि नावाङ कग़या,” इनजोर इतोग़. 23 येसुना इद पोल्‍लोतुन केंजिसि, ओग़ मुक्याल ओसोय मेसेह्‌ने आतोग़. बाराह्‌क इतेके, ओग़ पका साव्कर मतोग़. 24 ओग़ मेसेह्‌ने आतदिन ऊळिसि येसु इतोग़, “साव्कर लोकुर, देवुळतुन तमा जीवातगा राजेम कीयलाह ईयना इतेके ओरिह्‌क पका तिपल आस्ता. 25 ओकावेला ऊज-बूकातुह्‌क रूटुम पेसिस दाया पग़यग़ा, मति देवुळतुह्‌क तमा जीवातगा राजेम कीयलाह ईयना इतेके, मता मन्कलोरिह्‌क तिपल मन्ह्‌ता,” इनजोर वेहतोग़.

26 अस्के येसुना पोल्‍लोतुन केंजवालोर ताल्ह्‌कतोर. “अह इतेके अमेसाता पिसमुळ पया बोन्क दोर्कग़ा सामि?” (पका मालसोम इतेके देवुळता देय्वाता सीना आंदु इनजोर विचर कीताह्‌कु ओर इद्रम इतोर). 27 इतस्के येसु इतोग़, “इव पोल्‍लोङ मन्‍कना कयदे आया पग़वोङ, मति देवुळताये कयदे इव सबे आया पग़यह्‌ताङ.” 28 इनजोर इतस्के पत्रु इतोग़, “ऊळा सामि, माट इतेके मावा लोन-दुवर विळ्सिस नीवा पेग़्के वातोम.” 29 इतस्के येसु इतोग़, “नना मीकु सेतेम वेहतह्‌नन, बोग़ आयि देवुळि नावा जीवातगा राजेम कीयि इनजोर तना लोन-दुवरतुन, मुतेनु, पिलाङ-पेकोरिन, तलोग़-तपेनु, दादाल-तमोनु विळ्सनोग़, 30 ओन्क इद कालमते लेकालेवा सम्सरम ओसो एळ्म-दळ्मतोर दोर्कनुर, अचोने आयो मति ओसो वायना कालमते अमेसाता पिसमुळ वने दोर्कग़ा,” इनजोर वेहतोग़.

31 पया येसु तनाङ बारा कग़यवालोरिन बेदो उंद जागातगा केयिस इतोग़, “इद ऊळाट! माट येरुसलेम दायलाह आतल. माने-मन्कना नडुम पुटटोनन नावा लोप्पा वेल्‍लाय मुने देवुळता कबुरतोर बाताल रासिस तासतोर, अद सबे करल आयग़ा. 32 रासतप लेह्‌का नाकु यहुदि आयवोरा कयदे पोस ईयनुर. नावा पोग़ोन उस्कनुर, पास्कनुर, नावा कदर रेहतनुर. 33 जेट्‌लाते नल्हतनुर, अह कीसि नाक हव्कनुर. मति नना मूंड दियाने जीवा अरयकन,” इनजोर वेहतोग़.

34 मति ओग़ वेहतव पोल्‍लोनग्डाहि कग़यवालोरिह्‌क उंद पोल्‍लोवन तेळियो. अव पोल्‍लोना अर्तम ओरग्डाह मकिह कीतद मता. अदिह्‌क ओग़ वेहतव पोल्‍लोङ कग़ियवालोरिह्‌क मुर्तिय तेळियोङ.

35 पया येसु यरिग़ो नाटेना एरे एवतोग़. अस्के नाटेना लोप्पा ओळियह्‌पा अग़दा कचुल ओर्वोग़ तोववोग़ गुडि उदिस बिचेम ताल्ह्‌कसोर मतोग़. 36 अस्के लोकुरा लेङतुन केंजिसि, “अले बोग़ाय नाक वेहाट रा! इगा बाताल आस्ता?” इनजोर ताल्ह्‌क बोटटोग़. 37 पया बोरो ओनु, “नासरेत नाटेनोग़ येसु दायलाह आतोग़ रा,” इनजोर वेहतोर. 38 वेहतस्के ओग़ गुडि, “ए येसु! दाविद राजाना कूळतोनिन! नावा पोग़ोन दया कीमु,” इनजोर केयतोग़. 39 केयतस्के मुडा मुनेह मतोरु, “निमा केयमा रा, केमेन मन,” इनजोर ओन तेर्हतोर. तेला मति ओग़ ओसोवन पका जोरते केयलाह आतोग़. “ए दाविद राजाना कूळतोनिन! नावा पोग़ोन दया कीम!” इतोग़. 40 इतस्के येसु ओना लेङतुन केंजिसि नितोग़. निचि “अले ओन नयगा ताट रा,” इतोग़. पया ओन येसुनगा ततोर. ततस्के येसु ओन ताल्ह्‌कतोग़, 41 “नना नियेनाह्‌क बाताल कीकन इनजि नीवा विचर मन्ह्‌ता?” इतस्के ओग़ु, “नाक तोवनाह कीसीम सामि,” इनजोर इतोग़. 42 पया येसु, “अले! अह इतेके नावा पोग़ोन विस्वस कीतिन, अदिह्‌क तोव्म,” इनजोर इतोग़. 43 अस्के ओग़ तोप्नेन तोवतोग़. तोवतस्के देवुळतुन जोहर कीसोर-कीसोर येसुना संगे अतोग़. अगा मतोर सबेटोर ओग़ गुडि बेस आतदिन ऊळिसि, देवुळतुन जोहर कीतोर.