1 परुसिर इतेके माटे यहुदिरा मुक्यालोरोम आंदोम, इह इंदुर अदिह्‌के येसु ओरा लोप्पा लोकुरिन इतोग़, “इह केंजाट, नना वेहतह्‌नन, बोग़ गोरे-गोवुळतगा अग़देनाहि लोप्पा नेङवा, दुस्रा बाजेताह तग़्‍ङिस दास्‍तोग़, ओग़ु कले, बेरा डाकु आंदोग़. 2 मति बोग़ अग़देनाहि लोप्पा नेङिह्‌तोग़, ओग़े गोरे-कोपाल आंदोग़. 3 ओनेनाह्‌के राका केवाल अग़दुन तेग़यिह्‌तोग़. ओनाय आल्का गोरेङ केंजिह्‌ताङ. ओग़ तनाङ गोरेनु उंद-उंदता पेदिर पोस केयिह्‌तोग़, केयिसि अविन पलत पेहच ओस्‍तोग़. 4 तनाङ कतम गोरेङ पलत पेहतस्‍के, ओग़ अविस्‍कना मुनेह दास्‍तोग़. गोरेङवने ओना पयाह-पयाह दास्‍ताङ, बाराह्‌क इतेके अवु ओना आल्‍कातुन पुन्ह्‌ताङ. 5 पुनवोना पेग़्‍के अव बेस्‍केन अनोङ आयनुङ, मति ओनग्‍डाहि वितनुङ, बाराह्‌क इतेके अवु पुनवोराङ आल्‍कान मर्सोेङ इनजोरे.” 6 नना मीवाङ पेदल्‍कना लेह्‌का इलेन, इदिन तोहतलाह, इद्रमता पुन्‍पिह कीयनद पोल्‍लोतुन येसु अगा केंजवालोरिह्‌क वेहतोग़. मति इव बेद्रमताङ इनजोरे, इदिना अर्तम ओरिह्‌क तेळियो.

7 अस्‍के येसु ओरिन ओसो इतोग़, “इह केंजाट, नना वेहतह्‌नन, गोरेना अग़ि ननाने आंदन. 8 नाकाय मुने वातोर जोल काग़्हवालोर कतमतोर कलेर, डाकुर आंदुर. मति नावाङ गोरेङ ओराङ केंजोङ आंदुङ. 9 देवुळतके दायनद गोरेना अग़ि ननान आंदन. नयेनाहि बोर लोप्पा नेङनुर, ओरिन नना पिसिह कीकन. ओरु लोप्पा-पलत ओळियना-पेसना कीयनुर, ओरिह्‌क तिंड-बंडवने दोर्कग़ा. 10 देवुळ लोहवोर कलेर वास्‍तोर सिरपि कललाह, हव्‍कलाह, बूळे कीयलाह, इद विचरते ओर वास्‍तोर. मति नना बाराह्‌क वातन इतेके नावा लोकुरिह्‌कु लद्बदता जीवा दोर्कना इनजि. 11 नेह्‌नोग़ गोरे-कोपानन ननान आंदन. नेह्‌नोग़ कोपाल तनाङ गोरेनेनाह्‌कु तना जीवा ईयलाह तयर आस्‍तोग़. 12 मति ओर्युलतोग़ इतेके, वेग़ कोपाल आयवाह्‌कु लोळ्‍ङाङ वायनदिन ऊळिसि, गोरेन अगान विळ्‍सिस वितिह्‌तोग़, बाराह्‌क इतेके गोरेङ ओनाङ आयोङ इनजोरे. पया लोळ्‍ङाङ वासि उचुकिन पोयह्‌पा गोरेङ कतम बिरोबटो आस्‍ताङ. 13 ओग़ ओर्युलतोग़ आंदोग़ अदिह्‌क गोरेना पर्वा केवोग़, ओग़ वितिह्‌तोग़. 14-15 मति नना नेह्‌ना कोपानन. बहलेह्‌का बाबाल नाक पुन्ह्‌तोग़ ओसो नना बाबान पुह्‌नन, अद्रमे नावाङ गोरेन नना पुह्‌नन, अहे अववने नाक पुन्ह्‌ताङ. ओसो गोरेनेनाह्‌क नना नावा जीवातुन ईयलाह तयर मह्‌नन. 16 ओसो बेव गोरेङ मन्ह्‌ताङ (इतेके दुस्रा जाततोर नाक नमवालोरु), अव इद गोह्‌डटग्‍डाङ (इतेके यहुदि जातता गोह्‌डटग्‍डाङ) आयोङ. अविस्‍किन वने नाक नावा गोह्‌डटे काल्‍प पोयतग़ा, अस्‍के अव नावा आल्‍कातुन केंजनुङ. पया उंदिय गोह्‌डि आयग़ा, अस्‍के नना ओरा वग़ोनन मेहवानन-कोपानन आयकन. 17 नना ओसो जीवा अरयकन इनजोरे नावा जीवातुन नना ईय्ह्‌नन, अदिह्‌क बाबाल नाक जीवा कीस्‍तोग़. 18 अद जीवातुन नयग्डाहि बोग़े ओया पग़वोग़, मति नावाय विचरते नना ईय्ह्‌नन. नाक अदिन ईयनद अदिकर मन्ह्‌ता, ओसो मल्‍स जीवा अरयनद वने अदिकर मन्ह्‌ता. इहे कीयनद उकुमि नावा बाबाल नाक ईतोग़,” इनजि येसु इतोग़.

19 इव गोटिनेनाह्‌क यहुदिर ओसो उंद देबा पका जेटामारा आसि रेंड तुंगानोर आतोर. 20 ओरग्‍डाहि वेल्‍लाटोर इतोर, “वेग़ पिसाङ आतोग़, रा! वेन देयम पोयता. वेनाङ मीट बाराह्‌क केंजिह्‌‍निर?” 21 मति उय्‍तुर इतोर, “इव इद्रमताङ गोटिङ देयम पोयतोनाङ आयोङ, डा! वेग़ गुडिन तोवनाह कीतोग़, देयमतुह्‌क बार अह कीया वास्‍ताया?” इतोर.

22  येरुसलेम सहरते ईङमतस्‍के मंदिरतुन सला (सिर्तम) ईयनद पंडुम वाता.* 10:22 येसु पुटना डेडा नूर वर्साङ मुने इस्रयेलतोरा बूमतगा युनानि जाततोर राजालोर राजेम कींदुर. ओरगा ओर्वोग़ मतोग़, अंताकियास एपिपनिस इनवाल, ओग़ पका लाग्‍वोग़ु. ओग़ येरुसलेम सहरता मंदिरतुन लूटे कीसि, अगा मतोर वेल्‍लाटोर यहुदिरिन हव्‍कतोग़. ओर युनानि जाततोर मावा पवित्र मंदिरतुन कळ्‍वोग़ कीतोर इनजि उय्‍तुर यहुदि पळयोर ओङ आसि, ओग़ राजाना अडम लळय कीतोर. वेरा मुक्याल यहुदा मकबियाल इनवाल मतोग़. 24 वर्साना पया वेर यहुदिर गेल्‍सतोर, गेल्‍सिसि तमा कळ्‍वोग़ आता मंदिरतुन सला (सिर्तम) ईया बोटटोर. मंदिरतुन सला (सिर्तम) ईतापया यहुदिर गिर्दाते उंद पंडुम कीतोर, इद वर्सामेटा पंडुमतुन नेंडवने यहुदिर ईङमतस्‍के नोमिह्‌तोर. 23 अस्‍के मंदिरतगा बेद मंडातुन साल्‍मोन राजाना मंडा इंदुर, अदे मंडातगा येसु तिरियलाह आस मतोग़. 24 अस्‍के यहुदिर कोंटेतोर ओन सर्ने आस इतोर, “निमा मावा जीवातुन बेचानाह तेळियवाह कीस तासकिन? निमा देवुळ लोहवाल पिसिह केवानिन इतेके माक पङ्ने वेहा!” 25 येसु ओरिन इतोग़, “नना मीकु मुनेताहि वेहतेकाय मीट नमविर! बेव डीसाताङ कबस्‍क नना नावा बाबाना अदिकरते कीय्ह्‌नन, अवे नावा लोप्पा वेहतह्‌ताङ. 26 तेला मति मीट नावाङ गोरेना गोह्‌डटग्‍डोरिर आयवाह्‌कु मीट नमविर. 27 बेद्रम गोरेङ कोपाना आल्‍कातुन केंजिह्‌ताङ, अद्रमे नाक नमवालोर नावा आल्‍कातुन केंजिह्‌तोर ओसो नाक पुन्ह्‌तोर, ओरिन नना पुह्‌नन ओसो ओरु नावाङ कग़यलाह वास्‍तोर. 28 नना ओरिह्‌कु अमेसाता पिसमुळि ईय्ह्‌नन, ओर बेस्‍केन बूळेम आयोर आयनुर, ओसो ओरिन नयग्डाहि बोरे ऊंदोर आयनुर. 29 बोग़ नाक ओरिन ईतोग़, ओग़ नावा बाबाल सबेट्काय बेह्‌रोग़ मन्ह्‌तोग़, मनाह्‌कु ओना कयदाहि बोग़े ओरिन मुर्तिय ऊंदलाह पग़वोग़. 30 बाबाल, नना, माट उंदिये मह्‌नोम,” इनजि येसु वेहतोग़.

31 येसु अह इतस्‍के यहुदिराङ पेदल्‍क बंडाङ उकिस ओन हव्‍कलाह ऊळिंदुर. 32 “नाक बाबाल वेहतवु वेल्‍लाङे बेसताङ कबस्‍क नना मीक कीस तोहतन इतेके, अग्‍डाहि बेद कबळतेनाह्‌क नाकु बंडाङ उकिस हव्कलाहि ऊळिह्‌‍निर?” इनजि येसु ओरिन ताल्ह्‌कतोग़. 33 “आयो, बेसता कबळतेनाह्‌क नीक माटु बंडाङ उकिस हव्‍कोम, मति निमा मन्‍कल आसि ननान देवुळतन! इतपु देवुळतुन उस्‍किस-पास्‍किस वळ्ह्‌कतिन, अदिह्‌क नीकु माट हव्‍ककोम,” इनजोर यहुदिराङ पेदल्‍क इतोर. 34 अस्‍के येसु ओरिन इतोग़, “ ‘मीट देवुळ्‍कनिर आंदिर,’ इनजोर देवुळबाबाल अस्‍केडोर राजेम केवालोरिन इनजि, इद्रम मीवा सास्‍त्रमते रासतद इलेया? अस्‍के इद पोल्‍लोता लोप्पा कट्ला केवाल बोग़े इलेग़. 35-36 ओसो देवुळता सास्‍त्रम बेस्‍केन जोल आयो इनजि माट पुह्‌नल. अद कालमते नेयम कीयलाह बोरिह्‌क देवुळताङ पोल्‍लोङ दोर्कताङ, ओरिन देवुळबाबाल ‘देवुळ्‍कनिर’ इनजोर इतोग़. इतेके बोनु बाबाल पवित्र कबळतेनाह्‌क आचिस इद दुनियाते लोहतोग़, ओनन नना देवुळता मग़नन इनजि इतेके, अद बाता गल्‍ति? पया मीट नाकु ‘देवुळतुन पास्‍किह्‌‍निन,’ इनजोर बाराह्‌कु कसुर तोहतह्‌निर? 37 नना नावा बाबाल वेहतनव कबस्‍क केवेके, नाक नममाट. 38 मति नना अव कबस्‍किन कीय्ह्‌नन इतेके, नाक नमवेकाय, अव कबस्‍किन ऊळिस तेला, देवुळ नाक लोहता इनजि नमाटु. इद्रमलेह्‌का मीट नमतेके, बाबाल नयगा जोळेम आस मन्ह्‌तोग़, ओसो नना बाबानगा जोळेम आस मह्‌नन, इनजि मीक तेळियग़ा ओसो पुनजोर मनदकिर,” इनजि येसु ओरिन इतोग़. 39 देवुळतन इतप येसु वळ्ह्‌कताह्‌कु, ओर ओन ओसो पोयतलाह ऊळिंदुर, मति ओग़ु ओरा कयदाहि बुस्‍कतोग़.

40 योर्दन बेरेटा अबरि मुने योहन देवुळता पेदिरते एग़ मिहन्‍दोग़, अगा येसु अतोग़, अनजि अगान मतोग़. 41-42 अस्‍के ओनके वेल्‍लाय मुल वातोर, वासि इतोर, “योहन वेना लेह्‌का बातय बामिह कीयना सीना तोहोग़, निटमे! तेला मति योहन वेना लोप्पा बेव गोटिङ वेहच मतोग़, अव सबे करलताङे आंदुङ, इनजोर वेग़ु देवुळ लोहतोग़ पिसिह केवाल राजले मंदनोग़!” इनजि अग्‍डोर वेल्‍लाटोरे येसुन नमतोर.