7
मेल्किसेदेक बूमयाल वने मतोग़; राजाल वने मतोग़
1-3 वेग़ मेल्किसेदेक इनवाल इतेके सालेम सहरता राजाल मतोग़. ओसो सबेट्क बेरा डीसाता देवुळता बूमयाल मतोग़. ओना पेदिरता अर्तम इतेके “सेतेमता राजाल,” ओसो इब्रि पोल्लोते सालेमता अर्तम “सुकम” आंदु. इतेके ओन सुकमता राजाल वने इनदा पग़यह्नल. मेल्किसेदेकना तलोग़-तपे बोर आंदुर, ओनाङ तादोर-बाबोर बोर आंदुर, ओना पुटटद ओसो डोलतदिना लोप्पा वने देवुळता सास्त्रमतगा बाताले रासतद इले. ओग़ देवुळता मग़ना लेह्कान अमेसा बूमयाल मन्ह्तोग़. अब्रहम मुय्तोग़ नाल्वुर राजालोरा संगे लळय आसि, ओरिन आरे कीस मल्स वायह्पा, वेग़ मेल्किसेदेक ओन कलियतोग़ ओसो बर्कत ईतोग़. अस्के अब्रहम तना आरे कीतोरग्डाहि ततद सबे मादुन दहा तूस्क कीसि, अग्डाह उंद तूस ओन्क ईतोग़.✡ 7:1-3 पुटमुळि 14:17-20
4 अदिनेनाह्क मेल्किसेदेक बेचोन बेरोग़ मन्कल मतोग़, विचर कीस ऊळिङ अले: मावा पेदामुय्तोग़ अब्रहम इंका लळयते गेल्सतद बेसतल मादा तूस ओन्क ईतोग़. 5 मोसानाङ अडोनगा उंद उकुम मन्ह्ता: बूमयालोर आयवालोर लेवि तेग़दोरग्डाहे वायनदु;* 7:5 लेविना तपे याकुब मुय्तोग़ आंदोग़, ओनग्डाहे सबेटोर इस्रयेलतोर पुटटोर. अब्रहम इतेके याकुबना तादो आंदोग़. दुस्रोर इस्रयेलतोर, तमा कमयता दहा तूस्कनाहि उंद तूस बूमयालोर आतोरिह्क कोड ईयनदे.✡ 7:5 गिनती 18:21-28 ओर सबेटोरु, लेवि तेग़दोर इंका अब्रहमना कूळतोरे आंदुर. आतेक तेला कोड ईयनदे.
6 मति मेल्किसेदेक इतेके लेविना कूळतोग़ आयोग़.† 7:6 मेल्किसेदेकना कालमते लेवि पुटवाय मतोग़. आयवेक वने अब्रहम ओन्क दहा तूस्कनाहि उंद तूस ईतोग़. इतेके मेल्किसेदेक अब्रहमिह्क बेरोग़. दुस्रा पोल्लो: अब्रहमिने देवुळि मुनेन पोल्लो विळ्सिस मता; मति मेल्किसेदेक अब्रहमिन वने बर्कतताङ पोल्लोङ इतोग़.✡ 7:6 पुटमुळि 14:19-20 7 इंजेके बेरोग़ उड्लोन्क बर्कतताङ पोल्लोङ इन्ह्तोग़ इनजि माट पुतले, इतेके मेल्किसेदेक अब्रहमिह्काय बेरोग़.
8 ओसो उंद पोल्लो: इंजेक मावोर यहुदिर मावा बूमयालोरिह्क कोड ईस्तोर; ओर बूमयालोर आक्रि डोलवालोरे मन्ह्तोर. मति मेल्किसेदेक बार डोलतोग़ इनजोर देवुळता सास्त्रमतगा रासतद इले.
9-10 ओसो उंद पोल्लो: लेविना तेग़दोर बूमयालोर कोड एतह्तोर. अब्रहम इतेके लेविना तादोना तपे. अदिनेनाह्क ओना मेंदुलतगा लेविना विजा मता. इतेके अब्रहम मेल्किसेदेकिह्क कोड वाटिह्पा, लेवि वने तम पेपिना मेटे मेल्किसेदेकिह्क कोड वाटटोग़ इतप आता. कोड एनवाल तनाय कोड वाटटोग़; इतेके मेल्किसेदेक लेविह्काय बेरोग़ बूमयाल.
मेल्किसेदेकना लेह्कान ओसो ओर्वोग़ बूमयाल, येसुसामि
11 लेवि तेग़दोरग्डाहि देवुळि आरुन मुय्तोन आचता. आचिसि आरुनना तेग़दोरिन बूमयालोर आयलाहि निल्पिह कीता. ओराय सेवाता जोतातगा मोसानाङ अडोङ नितह्ताङ. अस्के वने ओरा सेवा मोळ्कवालोरिन पूरा सला (सिर्तम) ईया पग़वो. अदिनेनाह्क आरुनना लेह्कान आयवा, मेल्किसेदेकना लेह्कान ओर्वोग़ बूमयाना गर्ज अरयह्ता. 12 बूमयालोरिन निल्पिह कीयनद अडो मिळ्न्दतेके, सबे अडोङ वने मिळ्न्दना गावले. 13-14 अदिनेनाह्क इंजेके मेल्किसेदेकना लेह्कान, दुस्रोग़ बूमयाल मावा येसुसामि वातोग़. ओनाय लोप्पा माट वळ्ह्किह्नोम; येसु इतेके लेविना कूळतोग़ आयोग़, ओग़ यहुदाना कूळते पुट वातोग़.‡ 7:13-14 यहुदाल, लेविना तमोग़ मतोग़. पुटमुळि 29:34-35 ऊळाट. यहुदाना कूळतोर बूमयालोर आयनदिना लोप्पा मोसाल बाताले इनोग़. ओसो अद कूळतोग़ बोग़े बेस्केन वने बूमयाल मनोग़.
15 मति मेल्किसेदेकना लेह्कान ओर्वोग़ बूमयाल वातस्के, अडोनाङ पोल्लोङ बद्लेम आताङ इनजोर इंजेक माक पोळ्क्ने दिसिह्ताङ. 16 पलाना कूळतोग़ बूमयाल मनदना इनजोर मोसानाङ अडोनगा रासतद मन्ह्ता; येसु अद इसबते बूमयाल आयोग़; मति ओनगा अमेसा पिसनद लाव मन्ह्ता, अद इसबते बूमयाल आतोग़. 17 ओना लोप्पा देवुळता सास्त्रम इह वेहतह्ता:
“निमा मेल्किसेदेकना लेह्कान अमेसातुह्क बूमयाल मनदकिन,”✡ 7:17 देवुळताङ पाटाङ 110:4
इनजोर सास्त्रमतगा रासतद मन्ह्ता.
18-19 इद्रमलेह्का मुनेता अडो मोळ्कवालोरिन पूरा सला (सिर्तम) ईया पग़वाह्कु, अद कबळतुह्क अरवो; अदिनेनाह्क अद इंजेक ताको. मति ताना बद्लाते माकु तान्काय एक्वा बेसतल आसा दोर्कता. इंजेके माट येसुन आसा कीसि देवुळता एरे दाया पग़यह्नल.
20-21 ओसो उंद पोल्लो मन्ह्ता: आरुनना कूळतोर बेदे किरियालेवा बूमयालोर आतोर; मति येसु बूमयाल आयह्पा, सामि ओन इद्रम इता:
“निमा अमेसातुह्क बूमयाल मनदकिन इनजोर सामि किरिया कीता,
अद तना पोल्लोतुन बेस्केन मिळ्हो,”✡ 7:20-21 देवुळताङ पाटाङ 110:4
इनजोर रासतद मन्ह्ता. अद्रम देवुळि किरिया कीताह्कु ओग़ बूमयाल आतोग़. 22 अदिनेनाह्क इंजेके देवुळता पूना करल, मुनेता करल कीतद पाळ्ना पोल्लोतुह्काय एक्वा बेसतल इनजोर येसु गह्ना ईतप आतोग़.
23 ओसो उंद पोल्लो मन्ह्ता: बूमयालोर अमेसा मनदा पग़वोर, ओर मुय्तोर आसि डोलिह्तोर; अदिनेनाह्क कबळ रोमनद आयो इनजोर वेल्लाटोर बूमयालोर मन्ह्तोर. 24 येसु बार बेस्केन डोलोग़, अदिनेनाह्क ओना बूमयातनम दुस्रोना कयदे अनो. 25 ओसो माट येसुना मेटे देवुळता एरे अनवालोरेनाह्क ओग़ अमेसा देवुळतुन अर्ज कीसोर मन्ह्तोग़. इद्रमलेह्का ओग़ माक पूरा कतम पिसिह कीयलाह पग़यह्तोग़.
26 येसु पवित्र मनवाल, बाताले कसुरलेवोग़, पापमता डागिल आयवोग़, पापि मन्कलोरग्डाहि एग़िस मनजि इंजेके पोग़ोन देवुळदीपतगा सबेट्क बेरा कदरता जागाते उदवाल. इद्रमतोग़ पेर्माल मयेनाह्क बेस ओजिह्तोग़. 27 आरुनना कूळतोर पेर्मालोर मुने तमाय पापमतेनाह्कु मोक ईस्तोर, पेग़्के दुस्रोर मन्कलोरा पापमतेनाह्कु मोक ईस्तोर; अद्रम दिनम कीस्तोर. मति येसु अद्रम आयोग़, ओग़ कतमतोरा पापमतेनाह्कु उंदिय देबा हव्कनागुटातगा तना जीवा ईतोग़. 28 मोसानाङ अडोना इसबते, लावलेवोर मन्कलोर पेर्मालोर आस्तोर; मति मोसानाङ अडोना वेल्लाङे वर्साना पया देवुळि किरिया कीसि, तना मग़िन पेर्माल इनजि निल्पिह कीता. वेग़ मग़ि बाताले कमिलेवोग़ मनजि अमेसातुह्क पेर्माल आंदोग़.
✡7:1-3 7:1-3 पुटमुळि 14:17-20
*7:5 7:5 लेविना तपे याकुब मुय्तोग़ आंदोग़, ओनग्डाहे सबेटोर इस्रयेलतोर पुटटोर. अब्रहम इतेके याकुबना तादो आंदोग़.
✡7:5 7:5 गिनती 18:21-28
†7:6 7:6 मेल्किसेदेकना कालमते लेवि पुटवाय मतोग़.
✡7:6 7:6 पुटमुळि 14:19-20
‡7:13-14 7:13-14 यहुदाल, लेविना तमोग़ मतोग़. पुटमुळि 29:34-35 ऊळाट.
✡7:17 7:17 देवुळताङ पाटाङ 110:4
✡7:20-21 7:20-21 देवुळताङ पाटाङ 110:4