1 इव सबे पोल्‍लोन सीता कीसि, नना पोलुनन मियेनाह्‌क पार्तना कीय्ह्‌नन. नना मीट यहुदि आयवोरगाकिर्स्तु येसुना कबळ कीताह्‌के जेलते मह्‌नन. 2 मियेनाह्‌क इद कबळ कीयलाहि देवुळि नाक देय्वा ईता, इद पोल्‍लोतुन वने मीट केंजिस मनदकिर. 3 देवुळि तना मकिस मतद पोल्‍लोतुन नाक तोहचीता, अद पोल्‍लोता लोप्पा नना पोग़ोन उचुन-उचुन रासतन. 4 नना रासतन अव पोल्‍लोन मीट अर्वतस्के, किर्स्तुना लोप्पा मकिस मतद पोल्‍लो नाक बेद्रम तेळियता इनजोर मीट पुनदकिर. 5-6 अद पोल्‍लो इद्रम मन्ह्‌ता: यहुदि आयवोर बेसता कबुरतुन विस्वस कीतोर, कीताह्‌कु देवुळता बर्कत किर्स्तुन विस्वस कीतोर यहुदिरा संगे ओरिह्‌क वने दोर्किह्‌ता. ओर ओसो यहुदि विस्वसिर उंदिय मेंदुलतोर आतोर. अदिनेनाह्‌क किर्स्तु येसुनोरेनाह्‌क देवुळि करल कीस मतविन पूरा दोर्किह कीतोर. देवुळि तासिस मतद इद पोल्‍लोतुन मुनेटा कालमतोर मन्कलोरिह्‌क तोहवा मता, मति इंजेके किर्स्तुना पवित्र बळयिरिह्‌क ओसो देवुळता कबुरतोरिह्‌क तना जीवाता मेटे तोहचीता.

7 देवुळि नयगा तना लावतुन पका ताकिह कीताह्‌कु, नाक इद बेसता कबुरतुन पोकुर कीयनद सेवाता देय्वा दोर्कता. 8 देवुळता मन्कलोर सबेटोरिह्‌काय ननाय ओसोय उड्लोनन. तेला मति देवुळि नाक इद देय्वा ईता: इतेके किर्स्तुनगा बेचोन लेकालेवा बर्कत दोर्किह्‌ता इनजोर यहुदि आयवोरगा अनजि कबुर वेहतनद सेवा नावा कयदे ईता. 9 सबेटविन पुटिह कीतद देवुळि इद पोल्‍लोतुन मुने वेल्‍लाय जोम आनाह पुन्पिह केवा तासिस मता. मति इंजेके अद पोल्‍लोतुन सबेटोर मन्कलोरिह्‌क तोहतनद कबळतुन वने नाक देय्वा कीसि ईता. 10 इद्रम आसि विस्वसिरा मुडा मेटे पोग़ोटा बूमतगा मनजि अदिकर ताकिह कीयनव देवतुल्किन, देयह्‌किन देवुळि उंद पोल्‍लो तोहतना मता. अद बेद इतेके सबे पोल्‍लोने ताना बुदि बेचोटा बेरा मन्ह्‌ता इनजि अव पुनिङ इनजोरे. 11 सुरुमुनेताहि देवुळि इद्रम कीयलाहि विचर कीस मता. इंजेके मावा सामि किर्स्तु येसुना कयदे तान पूरा कीता. 12 येसु किर्स्तुना संगे माट जोळेम आताह्‌कु, ओन विस्वस कीताह्‌कु, इंजेके रेयवालेवा, दीराते, बर्वसते देवुळता एरे माट दाया पग़यह्‌नल. 13 अदिनेनाह्‌क नना जेलतगा मियेनाह्‌क सिक्सा आयनदिन ऊळिस मीट आरेम आयमाटु इनजोर मीक वेहतह्‌नन. किर्स्तुनगा मनदनद बर्कततुन मियगा यहुदि आयवोरगा एवसिह कीताह्‌के नाक इद्रम आता इतेके, नावा तिपलतेनाह्‌क वने मीवाय पाय्दा आस्ता.

14 अद्रमलेह्‌काने देवुळि मीट यहुदि आयवोरिह्‌क कीतव सबेटविन सीता कीसि, नना मिंडाङ कोटिस मियेनाह्‌क पोग़ोटोग़ देवुळबाबान पार्तना कीय्ह्‌नन: 15 पोग़ोटाङ आयिङ, बूमतोर आयिर, सबेटोराङ लोह्‌कना पेदाल पोग़ोटोग़ देवुळबाबाले. 16 ओन इद्रम पार्तना कीय्ह्‌नन: ओना पका बेरा डीसाता इसबते मीवा जीवातुह्‌क, तना जीवाता मेटे पका लाव ईयेग़. 17 ओसो मीट किर्स्तुन विस्वस कीताह्‌कु, मीट ओना गूनमते ऊटिस, मेग़्किस मनदना इनजि, ओग़ मीवा जीवातगा जागा आयेग़. 18-19 अह मतेके वेहता वावप अचोन लेकालेवा किर्स्तु माक जीवा कीस्तोग़ इनजोर, मीटु ओसो देवुळता मन्कलोर सबेटोर पुनजोर अनेरिर. अद्रम आसोर मीवा गून देवुळता गूनता लेह्‌का बाताले कमि लेवा मनि.

20 इंजेके देवुळि मावा जीवातगा तना लावते कबळ कीसोरेन मन्ह्‌ता. माट बेचोन ताल्ह्‌किह्‌नल, विचर कीय्ह्‌नल, तान्काय वीळिस-वीळिसि कबळ कीसीया पग़यह्‌ता. 21 विस्वसिरा मुडगा ओसो किर्स्तु येसुनगा तान्क अमेसा- अमेसातुह्‌क मान दोर्कसोरेन मनि. आमेन.