1 पोलु इद्रम वेहतोग़, “मावोरिर! नावा साक्सितुन मीवा मुनेह नना इंजेक वेहतह्‌नन, इदिन केंजाटु.” 2 इनजोर तमाये इब्रि पोल्‍लोते पोलु वळ्ह्‌कतस्के, लोकुर पूराय मेर्क्ने आतोर.

3 अस्के पोलु वेहता बोटटोग़, “नना यहुदि मन्कनन, किलिकिया पटटा तरसुस सहरते पुटटोनन, मति इदे येरुसलेम सहरतगान बेर्सतन. इगा गमलियेल गूरुनगा मनजि कग़यतन. मावा तादोर-बाबोराङ अडोङ उतुर्कना उंद पोल्‍लो वने तपवा, ओग़ नाक काग़्हतोग़. इंजेके मीट सबेटोरिर कीयना लेह्‌का नना वने देवुळतुन माळलाह पका जिदतोनन मतन. 4 अदिह्‌क येसुसामिना अग़दे ताकवालोर आस्क-कोय्तोरिन दोहच जेलतगा वाटिंदन. ओरिन हव्कनाह तिपल कीसोर मतन. 5 नना इद्रम कींदन इनजोर मोदुल पेर्माल ओसो तग्वाङ केवालोर मीवा मुनेह साक्सि मन्ह्‌तोर. वेरग्डाहे नना दमिस्‍क सहरतोर मावोर यहुदिरिह्‌क रासतद सीटि ताल्ह्‌किस अगा दायलाह पेसिस मतन. अगा येसुना अग़दे अतोर यहुदिरिह्‌क सिक्सा ईयलाहि, ओरिन दोहचि येरुसलेम ततलाह अनजोर मतन.

6 “अनेके नेक निच मता, अस्के नना दमिस्‍क सहरता एरे-एरे एव्स मतन, अचोटेन दोम्ह्‌क्नेन कोंडाङ नाह्‌क पग़वाह पोग़ोटाहि नावा सर्ने बेरा उंद वेह्‌च आता. 7 अस्के नना नेल अरतन, नेल अरतस्के ‘ए सोलु, ए सोलु, नाक बाराह्‌क तिपल कीया बोटटिन?’ इनजोर इतद आल्का केंतन. 8 केंतस्के ‘निमा बोनिन आंदिन, सामि?’ इनजोर इतन. अस्के ‘निमा बोन तिपल कीयलाह आतिन, ओग़ नासरेत नाटेनोग़ येसुनन आंदन,’ इतोग़. 9 नावा तोळतोर सिरप वेह्‌चतुन ऊळतोर, मति नावा संगे वळ्ह्‌कतद पोल्‍लो ओरिह्‌क तेळियो. 10 पया नना ‘बाताल कीकन सामि?’ इनजि ताल्ह्‌कतन. अस्के ओग़ नाक, ‘इंजेके तेदिस दमिस्‍क सहरते अन, देवुळि नीक बेद सेवातेनाह्‌क निल्पिह कीता, अव सबे कबस्कना कबुर नीक अगा दोर्कग़ा,’ इनजोर इतोग़. 11 पका वेह्‌च आस मताह्‌कु नना तोवोन आस मतन. पया नावा तोळतोर नावा कयदुन पोस दमिस्‍क सहरतगा ओतोर.

12 “अद सहरतगा ओर्वोग़ अनन्या पेदिरतोग़ मन्कल मतोग़. ओग़ मोसानाङ अडोने ताकसोर देवुळतुन बेस मोळ्कवाल मन्कल मतोग़. दमिस्‍क सहरतोर सबेटोर यहुदिर ओन्क पका कदर ईन्दुर. 13 ओग़ नयग वास निचि ‘सोलु तमो, निमा तोव्‍म,’ इनजोर इतोग़. ओग़ इताहे नना तोव्स ओन ऊळतन. 14 अस्के ओग़ नाक इद्रम इतोग़, ‘मावा तादोर-बाबोरा देवुळता विचर बाताल मन्ह्‌ता अद नीक एर्का आयना, ताना सेतेमतोग़ मग़िन ऊळना, ओसो ओग़े मग़ना तोडटे वेहतनद पोल्‍लो नीक केंजलाह दोर्कना, इदिनेनाह्‌के देवुळ नीक आचता. 15 इतेके निमा अनेटस्के ऊळतद, केंतद पोल्‍लोता वेल्‍लाटोर लोकुरिह्‌क देवुळतेनाह्‌क साक्सि मनदकिन. 16 इंजेके निमा आल्सेम केमा, अले तेदिसि येसुना पेदिरते एग़ मीयना रिवज कीम, ओना पेदिर पोस केयिस पार्तना कीम. अस्के ओग़ नीवा पापमतुन नोग़यनोग़,’ इनजोर इतोग़. अस्के नना येसुना पेदिरते एग़ मीतन.

17 “पया नना येरुसलेम सहरतगा मलसि, मंदिरतगापार्तना कीसोर मतन, अस्के देवुळ तोहतना लेकातुन ऊळतन. 18 अद लेकाते येसु नावा मुनेह निचि, ‘अले आल्सेम केवा चट्‌पिट येरुसलेमताहि पेसिस अन. ऊळा, निमा नावा लोप्पा बेद साक्सि ईय्ह्‌निन अदिन वेर यहुदिर केंजोर,’ इतोग़. 19 अस्के नना इतन, ‘केंजनुर बहे सामि, बाराह्‌क इतेके नना यहुदिरा वेल्‍लाङे पार्तनाताङ लोह्‌कनगा अनजि नीक विस्वस कीतोरिन जेलतगा वाटिस नल्हता वेहन्दन. 20 ओसो नीवा लोप्पा साक्सि ईतोग़ु, इस्तिपनिन लोकुर बंडाङ उकिस हव्किह्‌पा, नना वने ओरा तोळ आसि, ओन हव्कवालोराङ जगाना राका कीसोर मतन, इनजोर वेर यहुदिर बेस पुतोर,’ इतन. 21 मति येसु इतोग़, ‘आयो, यहुदि आयवोरिन नावा पोल्‍लोतुन वेहतलाह नना नीक जेक-जेक लोहतह्‌नन, इग्डाहि अन,’ इतोग़.”

22 इद पोल्‍लो एवनाह लोकुर ओनाङ केंतोर. मति यहुदि आयवोरा पोल्‍लो इताह्‌कु, “इद्रमतोग़ मन्कल जीवाते मनमाकेग़, वेन हव्काट!” इनजोर पका केयतोर.* 22:22 यहुदिर बेद्रम मोळ्किह्‌तोर, अद्रम दुस्रा जाततोर वने देवुळता मुनेह निचि मोळ्कना इनजोर यहुदिरिह्‌क विचर वावो. अदिह्‌क वेर यहुदिर पोलु इतद पोल्‍लोतुह्‌क पका ओङ आतोर. 23 पका केयसोर तमा केग़्स मतव जगान तेंडिस अग़्सिस ईन्दुर, ओसो दुरातुन पोग़ोन तूळ्हन्दुर. 24 इदिन ऊळिस, लळयमुडा मुक्याल पोलुन सीपय्कना किलेता लोप्पा तता वेहतोग़, वेहचि “वेन जूताने पका नल्हचि ताल्ह्‌काटु, बाराह्‌क लोकुर इद्रम ओना अडम केयिह्‌तोर,” इनजोर उकुम ईतोग़. 25 पया सीपय्क ओन जूताते नल्हतलाह दोहच मतोर, अस्के पोलु तना एरे निच मतोग़ दरोगान इतोग़, “साय्ब, नना रोमि मन्कनन आंदन, नावा नेयमता पय्सल आयवा इद्रम जूताते नल्हतनद बेसेया?” इतोग़.

26 इदिन केंजिसि, ओग़ दरोगाल सीपय्कना मुक्यानगा अनजि, “निमा बह कीयलाहि आय्ह्‌निन? वेग़ इतेक रोमि मन्कल आंदोग़,” इतोग़.

27 पया सीपय्कना मुक्याल पोलुनगा वासि, “बह निमा रोमि मन्कनिन रा?” इनजोर इतस्के “इंगो साय्ब” इनजोर पोलु इतोग़.

28 इतस्के सीपय्कना मुक्याल इतोग़, “नना रोमि मन्कल आयलाह वेल्‍लाङे कोताङ ईतन,” इतोग़. इतस्के पोलु इतोग़, “मति नना इतेके पुटटग्डाहि रोमि मन्कनन आंदन,” इनजोर इतोग़.

29 इदिन केंजिसि, ओन ताल्ह्‌कवालोर सीपय्क चट्‌ने जूतान नेल विळ्सिसीतोर, पया पोलुन इटोर. ओर्वोग़ रोमि मन्कन नना दोहता वेहतन, इनजोर सीपय्कना मुक्याल रेयतोग़.

30 पया इमा दिया यहुदिर पोलुन बाराह्‌क कसुर ओपतोर इनजोर निटम पुनदलाह सीपय्कना मुक्याल पेर्मालोरिन, यहुदिराङ तग्वाङ केवालोरिन जमा आयलाह कबुर लोहतोग़. ओर जमा आतस्के पोलुन तचि पंचता मुनेह निल्पिह कीतोग़.