1 मावोर विस्वसिरिर! माट मियगा वास मतद उगसिन आयो इनजोर मीट वने पुतिरे. 2 मीवा सहरते वावस्के, पिलिपि सहरतगा पकाय तिपल आतोम, अग्डोर मन्कलोर माक बेद्रम उस्‍कतोर-पास्कतोर, इद मीट पुतिरे. अद्रमलेह्‌का मियग्डा लोकुर वने माक पकाय विरुद कीसाय मति, देवुळता बेसता कबुरतुन मीक वेहतलाहि दीरा पोस मतोम, मावा देवुळि माक दीरा ईस मता. 3 मीक विस्वस कीया वेहतोम, अद वेलाते माट लेसिस मतोम इनजि आयो, अहे लाग्वा विचरते कीतोम इनजि वने आयो, ओसो मीक नाळेह कीयलाह इनजि वने अद्रम वेहोम. 4 मति देवुळि माक सेतेम ऊळिस आचता, ओसो बेसता कबुरतुन मावा कयदे ईता, अदिह्‌क वेहतह्‌नोम. माट मन्कलोरिह्‌क गिर्दा वानाह वेहोम, मति मावा विचरतुन पर्ह्‌किस ऊळनद देवुळतुह्‌क गिर्दा वानाह वेहतह्‌नोम. 5 मीक गिर्दा वानाह वेहचि नाळेह कीयलाहि मियगा वावोम, मावा लालुसतुन मकिह कीसि मीक नाळेह कीयलाहि वने वावोम, देवुळिये मावा साक्सि मन्ह्‌ता. इदिन मीट वने पुतिर. 6-7 मियगा मनदह्‌पा, “माट येसु किर्स्तुनाबळयिरोम, अदिनेनाह्‌क मीट माक मान ईयना” इनजोर वेहतलाह माक अदिकर मताये. मति मीट आयि, बोर दुस्रोर आयि, इद्रम मन्कलोर माक मान ईयिर इनजोर माट विचर केवोम. मति पाल उहतनद तलोग़ तनाङ पिलाङ-पेकोरिन बेद्रम बेस-नेह्‌ना अय कीस्ता, अद्रम माट वने मीवा संगे उड्लोरा लेह्‌का कुलुल बुदते मतोम. 8 मीक पकाय जीवा कीस मताह्‌कु, देवुळता बेसता कबुरतुन मीक गिर्दाते काग़्हतोम. अचोने आयो मति मीवा पाय्दातेनाह्‌क मीवा संगे पोत्ला आयलाह ऊळिंदोम, अचोन मीक जीवा कीतोम.

9 मावोर विस्वसिरिर! मियगा मनदह्‌पा, माट बेद्रम एपुर पेसनाह कह्‌टेम कीतोम इदिन मीट सीता कीय्ह्‌निर! मियग्डाहि बोनगाने माट ताल्ह्‌किस तिनदनद आयो इनजि नग़्का-पिळ्‍विळ पियल-पोळ्‍द कबळ कीस तितोम,* 2:9 बळयिराङ कबस्क 18:3 वचनतगा रासतपु, पोलुर अगा टमिङ पंडनद दंदा कींदुर. अद्रम मनजोरे मीक देवुळता बेसता कबुरतुन पोकुर कीतोम.

10 मीट विस्वसिरिर पुतप लेह्‌का, माट मीवा संगे मनदह्‌पा मावा ताकमुळ पवित्र, सेतेमता ओसो कसुरलेवा मता, इदिना मीट साक्सि मह्‌निर ओसो देवुळ वने साक्सि मन्ह्‌ता. 11-12 देवुळि मीकु तना राजेमतोर मन्कलोर कीयलाहि, तना डीसातगा काल्पलाहि केयलाह आता. अदिनेनाह्‌क तान्क विचर वानाह ताकाट इनजोर वेहतोम. वेहचि, तपे तनाङ पिलाङ-पेकोरिन कीयना लेह्‌कान, मीवा ओर्वोग़-ओर्वोग़ मन्कना जीवातुह्‌क दीरा ईसोर, बुद काग़्हचोर, तेळियिह कीसोर मतोम, इदिन मीट पुतिरे.

13 माट मीक देवुळता पोल्‍लोतुन वेहतोम अस्के, मीट तान मन्कलोरा आयो, मति देवुळता पोल्‍लो इनजोर केंजतिर. अदिनेनाह्‌क वने माट अमेसा देवुळतुन जोहर कीय्ह्‌नोम, अद निटम देवुळता पोल्‍लोये! अद पोल्‍लो इंजेके मीक विस्वस कीतोरिन देवुळतुह्‌क विचर वानाह पिसलाह बद्ले कीयलाह आता. 14 इतेके बेद्रम यहुदा पटटगा, किर्स्तु येसुना विस्वसिरा मुडुन तमाय यहुदि मन्कलोर पकाय तिपल कीतोर, अद्रमे मीवा देसेमतोर वने मीक तिपल कीतोर. अदिनेनाह्‌क यहुदि विस्वसिरिह्‌क आतप लेह्‌कान मीक वने आता. 15 यहुदिरे देवुळता कबुरतोर उय्तुरिन हव्कतोर ओसो येसुसामिन वने हव्कतोर, ओसो माट बेगा-बेगा सामिना कबुर पोकुर कीतोम, अव नाह्‌कनाहि ओर माक पूंडटोर. इद्रम कीस मनजि ओर देवुळतुह्‌क विचर वावोर. ओर सबे जातिनोर मन्कलोरिन वने कोटुल कीस्तोर. 16 बेद्रम इतेके, यहुदि आयवोर पिसनासाटि ओरिन देवुळता पोल्‍लो वेहतकोम इह्‌नोम, मति यहुदिर माक वेहतलाह एवोर. इद्रम कीसि ओरा पापम वीळसोर दास्ता, इंजेक देवुळि ओङ आता. अद ओरिह्‌क सिक्सा ईयग़ाये.

17-18 मावोर विस्वसिरिर! नना पोग़ोन रासतपु† 2:17-18 वचन 2 ऊळाट. गळ्किह्‌क मन्कलोर मियग्डाहि माक एग़िह कीस मतोर, अस्के ओर्विह्‌क-ओर्वोग़ सिरप मोकम ऊळवा मतल, मति मावा सीता मीवाय संगे मंदु. अदिह्‌क ओसोवने मीवा मोकम ऊळलाह पकाय मावा जीवा पर्ह्‌किंदु, मियगा वायलाह अग़ ऊळसोरेन मंदोम. नना पोलुनन रेंड-मूंड मल्काङ वायलाह ऊळतन, मति देयह्‌कना मुक्याल अडम आस मता.‡ 2:17-18 पोलु मुने तिसलुनि सहरते येसुना कबुरतुन पोकुर कीतस्के, वेल्‍लाटोर येसुन विस्वस कीतोर. इदिन ऊळिसि अग्डा यहुदिरा जीवा कर्वता, अदिह्‌क ओर पोलुना विरुदते लोकुरिन तेग़्हचि सहरते कट्ला पुटिह कीतोर. कीसि पोलुन पंचतगा ततलाह ऊळतोर, मति पोलु ओरिह्‌क दोर्कोग़. दोर्कवाह्‌कु विस्वसिरिन पंचतगा ततोर, पया मुक्यालोर विस्वसिरग्डाह जमानत एचि ओरिन विळ्सतोर. पोलु अदे नग़्का सहरताहि पेसिस अतोग़. अदिनेनाह्‌क पया पोलुह्‌क अगा ओसो दायलाह एग़्कुळ आंदु. बळयिर 17:1-10 ऊळाट. 19 मीक पकाय ऊळ वसिस मता. बाराह्‌क इतेके मावा येसुसामि वायनोग़ अस्के, ओना मुनेह मीट वने मावा संगे मनदकिर इनजोर माक आसा तासनाह कीतिर, अस्के मीटे माक गिर्दा आनाह कीकिर. माट मावा कबळतुन बेस-नेह्‌ना मारिह कीतोम इनजोर पोंगनाह केवालोरिर मीटे! 20 इंगो! माक पोंगनाह केवालोरिर, माक गिर्दा आनाह केवालोरिर मीटे!