Yuhanis dul deng, mam asa man daid se leol kiamat tia
Apan-kloma Hnika Balu
1
1-2 Boa-blingin deng au Yuhanis, Yesus Kristus atulin in loka-loka ka.
Se in dula nia, auk dul deng asa man mam le dadi. Auk taan haup dais nias elia: Ama Lamtua Allah esa man tek puting dais nias meman son bel Yesus Kristus. Hidim Un lok Yesus Kristus le tek Ama Lamtua atulin in loka-loka ngas. Kon Yesus lok Un ima-ii mes deng sorga, le laok sai totoang dais nias bel aus, halin nam auk dulas meman. Ta nesang lo ka kam, taon elola ko dais nias totoang dadis. Tiata mi musti hii babanan Ama Lamtua Allah in Teka-teka, man Yesus in tek son nias.
3 Ulat bating asii tukun man les in dulang nias didiin atuil didang kon ming hapu. Nol atuil man hii-ming in dulang nias isin nas le lako-daek mudis sas kon, ulat. Ta un dedeng nga, mana le maa lius son.
Yuhanis tunang boa-blingin bel jemaat iut se propinsi Asia
4 Boa-blingin deng au, bel Ama Lamtua jemaat itu, se propinsi Asia.
Auk nodan le Ama Lamtua Allah tulu bel mi un dalen banan na, le halin mi nuil babanan, titu-tema nol dame. Ama Lamtua Allah na mo muik meman lo-lolo hmunan nua, halas nia, nol muik napiut didiin hidi nutus taan lo. Auk kon nodan le Un Koo la tulu bel mi Un dalen banan na, le halin mi nuil babanan, titu-tema nol dame. Auk ngat net Un Koo la, banansila el hngasa iut man saol Ama Lamtua Allah del in prenta ka.* In dula dais Yunanin in mo nia ki dul noan, “Koo iut man dil saol Ama Lamtua del in prenta ka”. Muding atuil in taan Alkitab pas sam, nomer itu la nahin na nola, inu, nol titu-tema. Undeng na, le atuil in tana ngas teng tek noan, koo iut in mo nia ngias nahin na, Ama Lamtua Koo Niu ka. Nini ela lam, se bango 4 lako pes bango 5 la, Yuhanis aa deng hangun banan, deng 1) Ama Lamtua Allah, 2) Un Koo la, nol 3) Yesus Kristus. ✡ Dehet in Puit deng Dale Mesir 3:14; Apan-kloma Hnika Balu 4:5 5 Auk kon nodan le Yesus Kristus tulu-balang bel mi Un dalen banan na, halin mi nuil babanan, titu-tema nol dame. Un aa langa-langa tutungus deng asa man Ama Lamtua Allah in tek Una ngas. Hmunan nu Un mate, mo Ama Lamtua belen nuli pait, le halin Un man daid atuil hmunan, man nuli pait deng in mate. Un kon man daid Laih Tuan taung in ator totoang laih in ne apan-kloma ki ngias.
Undeng Lamtua Yesus namnau kita, tiata Un nang dala ka le baa didiin mate taung kita. Nini Un in mate ka, Un sai lalan le sas-loat kit deng in kula-sala kas in kuasa ka.✡ Yesaya 55:4; Buk in Naka-nahalit 89:27 6 Hidim Un nikit kit le daid Un hutun, halin nam kit daek bel Un Ama ka, Ama Lamtua Allah. Yesus Kristus meman muun isi, nol Un in kuasa ka kon hidi nutus taan lo. Baktebes ela!✡ Dehet in Puit deng Dale Mesir 19:6; Apan-kloma Hnika Balu 5:10
7 Tiata, bela matan le tinang babanan! Halas ni Yesus nol Un Ama ka ne sorga. Mo nesang lo ka kam, Un niu maa se nopen dalen. Mam totoang atuil in ne apan-kloma ki ngias ngat net Una. Ela kon nol atuil man hmunan nu hai Un se Un blapas sa ngas. Mam totoang bangsa in se apan-kloma ki ngias sabail apan le lilu mumuun undeng oen taan Una. Taon elola ko nias totoang dadis. Baktebes ela.✡ Danial 7:13; Matius 24:30; Markus 13:26; Lukas 21:27; Tesalonika mesa la 4:17; Sakarias 12:10; Yuhanis 19:34, 37
8 Ama Lamtua Allah tek noan,
“Auk niam,
Alfa lako pes Omega. (Laih hmunan lako lius in puis)† Muding abjat Yunani, Alfa lam huruf partama, mo Omega lam huruf puis.
Auk niam,
A lako pes Z.
Totoang daid deng Au,
ninin deng hmunan nu lako lius in puis.
Auk man muik meman son deng hmunan nua.
Auk man muik hahalas ni kon.
Nol Auk man muik tutungus didiin hidi nutus taan lo.
Ta Auk siing man kuasa dudui!”✡ Apan-kloma Hnika Balu 22:13; Dehet in Puit deng Dale Mesir 3:14
Yuhanis ngat net Atuling Baktetebes sa
9 Undeng kit totoang parsai leo-leo noan, Yesus na mo kit Lahin, tiata auk daid mi kaka-palin son. Muik atuli teng koon-mali nol tao susa-daat saol kit totoang, undeng kit in muid Yesus sa. Mo Yesus bel teken kit dalen nias son, le halin kit tahang nal napiut. Undeng auk tek atuli li son deng Ama Lamtua Allah in Teka-teka ngas, nol tui oen deng Yesus, tiata muik atuli teng kaen nol na. Ta oen daek auk le soleng auk maang mo nusa nia, man ngala Patmos. 10 Ela kon oe mesan na, se nol leol in kohe-kanas, auk tom Ama Lamtua Allah Koo Niu ka. Nahkitu lam, auk ming fala mes aa mumuun se auk klupung nga. Un lin na banansila el klingu ka. 11 Faal na tadu auk noan, “Yuhanis! Auk le tulu-balang bel ku dasi mesa. Totoang man ku in neta nias, ku musti dulas. Hidi na lam, ku musti tunang lako se jemaat itu, nas jemaat in se kota Efesus, kota Smirna, kota Pergamus, kota Tiatira, kota Sardis, kota Filadelfia nol kota Laodikia.”
12 Ming ela kon auk bali, le ngat asii man in aa na. Molam auk ngat net hadut itu, se maan in daken deng lil-mea le taung in todo hadut ta. 13 Nol muik Atuli mes dil se hadut tas hlala. Un sila ka banansila el Atuling Baktetebes sa. Un pake kaod blatas mesa, man blatas sa lako pes se leha ka, nol nekong hlimut lil-mea mes se Un kalas sa.✡ Danial 7:13; 10:5 14 Un klanga ka muti niu-hilin el bung bubu ka. Un mata ka kaloe banansila el ai ka.‡ In dula dais Yunanin na dul noan, “Un bon na nol Un klanga ka muti na el lae-blai bulu muti ka, tamlom el salju ka.” Dais dua nas tulu deng sa-saa man in muti niu-hilin. ✡ Danial 7:9 15 Un iin nas, mea kaloe el bis-muti man atuli hopong laok se ai dalen na. Un fala ka, tenen na el ui in baa naih hdoan na.✡ Danial 10:6✡ Yeskial 1:24; 43:2 16 Un kil duun iut se ima kanan na. Hidim suli mes nakan halin-halin puti deng Un baha ka. Un sila ka langa kaloe banansila el lelo ditu ka.
17 Nikit auk ngat net Atuling na kon, auk leang se Un iin na, banansila el atuil hmate ka. Mo Un depen auk nini Un ima kanan na, hidim tek auk noan, “Lii deken! Ta totoang daid deng Au, kilan deng laih hmunan na lako pes puis.✡ Yesaya 44:6; 48:12; Apan-kloma Hnika Balu 2:8; 22:13 18 Hmunan nu Auk mateng, mo halas ni ku ngat le, Auk nuling pait son! Nol mam Auk nuling napiut didiin hidi nutus taan lo. Auk kon man kil kunci in sai atuil hmate kas mana la, le beles nulis pait. 19 Ku musti dul totoang asa man ku in net hahalas nia ngas, nol dul totoang asa man in le dadi ngas. 20 Auk tek napat ku un nahin na le, elia: hadut lil-mea iut nas nahin na mo jemaat itu las. Nol duun iut man ku in ngat net se Auk imang kanan na ka, ima-ii at iut man kil in hida deng Ama Lamtua bel jemaat itu la ngas.”
*1:4 In dula dais Yunanin in mo nia ki dul noan, “Koo iut man dil saol Ama Lamtua del in prenta ka”. Muding atuil in taan Alkitab pas sam, nomer itu la nahin na nola, inu, nol titu-tema. Undeng na, le atuil in tana ngas teng tek noan, koo iut in mo nia ngias nahin na, Ama Lamtua Koo Niu ka. Nini ela lam, se bango 4 lako pes bango 5 la, Yuhanis aa deng hangun banan, deng 1) Ama Lamtua Allah, 2) Un Koo la, nol 3) Yesus Kristus.
✡1:4 Dehet in Puit deng Dale Mesir 3:14; Apan-kloma Hnika Balu 4:5
✡1:5 Yesaya 55:4; Buk in Naka-nahalit 89:27
✡1:6 Dehet in Puit deng Dale Mesir 19:6; Apan-kloma Hnika Balu 5:10
✡1:7 Danial 7:13; Matius 24:30; Markus 13:26; Lukas 21:27; Tesalonika mesa la 4:17; Sakarias 12:10; Yuhanis 19:34, 37
†1:8 Muding abjat Yunani, Alfa lam huruf partama, mo Omega lam huruf puis.
✡1:8 Apan-kloma Hnika Balu 22:13; Dehet in Puit deng Dale Mesir 3:14
✡1:13 Danial 7:13; 10:5
‡1:14 In dula dais Yunanin na dul noan, “Un bon na nol Un klanga ka muti na el lae-blai bulu muti ka, tamlom el salju ka.” Dais dua nas tulu deng sa-saa man in muti niu-hilin.
✡1:14 Danial 7:9
✡1:15 Danial 10:6
✡1:15 Yeskial 1:24; 43:2
✡1:17 Yesaya 44:6; 48:12; Apan-kloma Hnika Balu 2:8; 22:13