Joel
Talk Fo God
1
Da Locust Kine Grasshoppas Go Afta Israel
1 Da message from Da One In Charge dat come fo Joel, Petuel boy:
2 Lissen dis, you older peopo!
Lissen good, erybody dat live inside oua land!
No mo notting lidis eva happen befo time wen you guys stay alive, aah?
O wen yoa ancesta guys stay alive.
3 Tell yoa kids bout dis,
Fo dem tell dea kids,
An tell dose kids fo tell dea kids,
Fo dem tell odda generations afta dat!
4 Ova an ova, da locust kine grasshoppas come,
An eat up eryting!
5 Wake up, you piloot guys, an cry!
All you guys dat suck up da wine, cry loud!
Cry bout da juice fo make da wine,
Cuz da locus, dey no let da wine reach yoa mout!
6 ✡ 1:6: JShow 9:8Da grasshoppa army wen attack my land.
Dey strong an dey plenny.
Dey get teets jalike one lion,
Dea big teets, jalike one wahine lion.
7 Dey wase my grape plants.
Dey wipe out my fig trees.
Dey rip da bark an throw um away.
Dey leave da branches all white.
8 Cry cuz you stay sad inside,
Jalike one bride,
Dat gotta put on burmbag clotheses
Fo show she stay sad inside,
Cuz da guy she goin marry, he mahke.
9 Da wheat an barley sacrifices an da drink sacrifices,
No mo inside da Temple Fo Da One In Charge.
Da pries guys dat work in front Da One In Charge,
Dey stay sad inside, cuz
10 Wasted da fields,
An poho da groun.
Da wheat an barley stay all wasted.
Da juice fo make wine all dry up.
No good, da olive oil.
11 Eh you farma guys! Bum out!
You guys dat grow da grapes, cry loud!
Stay sore inside bout da wheat an barley,
Cuz da food fo harves come all wipe out!
12 Da grape plant stay all dry.
Da fig tree stay all any kine.
Da pomagram tree, da date palm tree, da apple tree,
All da trees in da field stay all dry.
Fo shua da peopo no stay good inside
Cuz dey all hamajang inside.
Joel Tell Da Peopo Fo Come Sorry
13 You pries guys, put on burmbag clotheses
Fo show you stay sad inside.
Cry loud, you guys dat work in front da altar.
Wear burmbag clotheses all nite,
You guys dat work in front my God.
Cuz no mo da wheat an barley sacrifices an da drink sacrifices,
No mo notting fo bring inside da Temple Fo Yoa God.
14 Tell da peopo fo no eat,
So dey can pray spesho kine to Da One In Charge.
Call dem fo come togedda
Spesho kine fo Da One In Charge.
Call da older leadas
An erybody dat live inside da land.
Call dem fo come togedda to da Temple Fo Yoa God Da One In Charge,
Fo dem yell to Da One In Charge fo help.
15 ✡ 1:15: Isa 13:6Bummahs, dat time!
Cuz pretty soon, Da One In Charge goin come.
Dat time, Da God Dat Get All Da Powa
Goin wipe out peopo.
16 We can see dat da food stay cut off!
Da peopo inside da Temple Fo Oua God no stay good inside.
17 Da seeds stay all dry up unda da dirt.
Da wheat an barley plants stay all dry up.
Da storage places fo food,
An fo da wheat an barley, stay all bus up.
18 Da cows moan,
Dey donno wea dey stay going,
Cuz dey no mo grass.
Even da sheeps stay suffa.
19 Da One In Charge, you da one I yell to fo help!
Cuz da fire wen burn up da grass inside da boonies,
An burn all da trees country side.
20 Even da wild animals like fo you help um.
Da mos deep streams fo watta stay all dry up.
Da fire burn up all da place dat get grass inside da boonies.