3
Get One Time Fo Eryting
1 Get one time fo eryting
Da peopo do unda da sun.
2 One time fo born
An one time fo mahke.
One time fo plant
An one time fo pull up wat you plant.
3 One time fo kill peopo
An one time fo make peopo come good.
One time fo bus up
An one time fo build.
4 One time fo cry
An one time fo laugh,
One time fo stay sad inside
An one time fo dance.
5 One time fo scatta stones
An one time fo bring um in.
One time fo hug
An one time fo no hug.
6 One time fo look fo someting
An one time fo give up look fo someting.
One time fo keep
An one time fo throw way.
7 One time fo broke someting
An one time fo sew um togedda.
One time fo no talk
An one time fo talk.
8 One time fo love
An one time fo hate.
One time fo make war
An one time fo make eryting pono.
9 So den, wat da worka guys goin get fo da work dey do? You tink dat goin stay long time, o wat?! 10 I see wat God give peopo fo do. 11 He make eryting happen jalike suppose to happen, fo da time wen suppose to happen. He make peopo tink bout wat maybe goin happen bumbye, but dey no can undastan eryting dat God stay do from da start till da end. 12 I know fo shua no mo notting mo betta fo peopo den fo stay good inside an do good kine stuff all da time dey stay alive. 13 Wen erybody eat an drink an stay good inside bout dea work, az one present from God. 14 I know fo shua eryting God do goin stay foeva. No mo nobody can add notting to um, an no mo nobody can take notting away from um. God do dis fo peopo show respeck fo him.
15 Wateva stay, awready wen stay.
Wateva goin stay, awready wen stay befo time.
An God make happen tings dat wen happen befo time, ova an ova.
16 An I see anodda ting unda da sun.
Get judge guys dat tell wat stay right an wat stay wrong,
Even dea, get bad kine stuff dat happen!
Get peopo dat stay do wass right,
Even dea, get bad kine stuff dat happen!
17 I wen tink lidis:
“God goin judge da peopo dat do wass right, an da peopo dat do wass wrong.
Cuz get one bestes time fo do eryting,
One time fo eryting dat happen.”
18 Az why I tink lidis too: “God tes peopo, fo show um dat dey stay jalike da animals. 19 Wat goin happen to da peopo an da animals, same ting! Jalike peopo mahke, da animals mahke. Dey all breave da same. Peopo not mo betta den da animals! All dat no mean notting. An no make sense! 20 Dey all go da same place. All a dem come from da dirt, an all a dem go back to da dirt. 21 You tink da peopo spirit go up, an da animal spirit go down inside da earth, o wat?!
22 “Az why no mo notting mo betta, den fo peopo do dea work an stay good inside, cuz az why dey stay hea. No mo nobody can make dem see wat goin happen to dem bumbye!”