19
1 Ebyo owebyawoire, ni mpulira omwigulu eigono eriri ooti lyʼekiyindi kyʼabantu, nga likoba liti:
“Muwuuje oKibbumba waiswe,
olwakubba niiye alokola, era ekitiisya nʼobwezye bibye!
2 Ensalaye eyʼemisango ntuuce era ya bwenkanya.
Asalire omusango ni gusinga ekibuga ekiri ngʼomalaaya okirifuma,
oyo eyatendeire abantu abʼomu kyalo kyonakyona, okukola obwamalaayabwe obwʼokusinza ebifaananyi.
Omalaaya oyo bamubonerezere olwʼokwita abaweererya ba Kibbumba.” 19:2 Ama 32:43; 2Ba 9:7
3 Era ni bakoba bati:
“Muwuuje oKibbumba!
Ekyo kityo olwakubba, omwosi ogukizwamu guduunya emirembe nʼemirembe!” 19:3 Isa 34:10
4 Abakaire 24, nʼebibbumbe ebyomi ebina, ni bakotama oku mazwi ni basinza oKibbumba atyaime oku ntebe eyʼobwakabaka, nga webakoba bati:
“Amiina. Muwuuje oKibbumba!”
Embaga yʼobugole eya Ntaama wa Kibbumba
5 Era eigono ni lizwa awabbaire entebe eyʼobwakabaka ni likoba liti:
“Muwuuje oKibbumba waiswe inywe nywenanywena abaweereryabe,
na inywe nywenanywena abatobato nʼabakulu abamuwa ekitiisya.” 19:5 Zab 115:13
6 Tete ni mpulira eigono eriri ngʼeryʼekiyindi ekyʼabantu ekinene, era eriri ngʼokuwolomboga kwʼamaizi amangi, kaisi tete ooti kududula kwa ikendi okubitiriri, nga likoba liti:
“Muwuuje oKibbumba,
olwakubba oMusengwa oKibbumba waiswe oWabwezye bwonabwona niiye afuga. 19:6 Zek 1:24; Zab 93:1; 97:1; 99:1
7 Tusangaale, tujaagaane, era tumuwe ekitiisya,
olwakubba ekiseera ekyʼobugole obwa Ntaamawe kituukire,
era omugolewe yeetegekeire obugole.
8 Omugole wa Ntaama oMutomuto bamwikiriirye okuzwala ebizwalo ebisa ebyebbeeyi eino,
era ebimirikiinya.”
Omugole oyo niibo abatuukirirye, nʼebizwalo ebisa ebyʼebbeeyi eino ibyo niibyo ebikole byabwe ebyobutuukirirye.
9 Omalaika nʼankoba ati, “Owandiike oti, ‘Bali nʼenkabi abo abebayetere oku mbaga eyʼobugole eya Ntaama oMutomuto wa Kibbumba.’ ” Era nʼankoba ati, “Ebyo ebibono niibyo ebinanyerenyeere oKibbumba ebiyatumwire.” 19:9 Mat 22:2-3
10 Awo ni ngwa oku mazwi okumpi nʼebigerebye okumusinza. Neye obone, nʼankoba ati, “Bbe, oleke! Ekyo tiwakikola! Osinze Kibbumba. Nze ndi muweererya-buweererya ooti niiwe nʼaboluganda abakaali bakalangukiire oku mazima oYesu ageyatumanyikisirye. Era ago niigo agawa abanaabbi ebibatumula.”
Atyaime oku mbalaasi owʼerangi enjeru
11 Ni mbona eigulu nga libiikukire, ni mbona ombalaasi owʼerangi enjeru. Amutyaimeku nga bamweta bati Mwesigwa era Wʼamazima. Asala emisango era alwana entalo nʼobwenkanya. 19:11 Zek 1:1; Zab 96:13; Isa 11:4 12 Amaisoge gabbaire ooti ndimi gya musyo, era ngʼaliku engule nyingi oku mutwegwe. Bamuwandiikireku eriina, nga mpaawo omuntu kadi moiza amaite amakulu gaalyo okutoolaku iye onyere yenkani. 19:12 Dan 10:6 13 Yabbaire azwaire ekizwalo ekibainikire omwisaaye, era ngʼeriinalye niiye oKibono kya Kibbumba. 14 Awo abʼamaje agʼomwigulu ni bamusengererya, nga batyaime oku mbalaasi enjeru era nga bazwaire ebizwalo ebisa ebyebbeeyi eino era ebyeru. 15 Omu munwagwe ni muzwamu empiima enjogi eyʼokuwangula amawanga. Yaligafuga nʼobwezye bungi ooti muntu akubbisya omwigo ogwʼekyoma, nʼafutyanka ekikunyiro ekyʼomwenge ogwʼobusungu obungi obwa Kibbumba oWabwezye bwonabwona. 19:15 Zab 2:9; Isa 63:3; Yow 3:13; Bil 14:20 16 Oku kizwalokye nʼoku kisambikye, ali nʼeriina eribawandiikireku bati:
OKABAKA WʼABAKABAKA,
ERA OMUSENGWA WʼABASENGWA.
17 Awo ni mbona omalaika ngʼayemereire okwisana. Nʼabbookooka nʼeigono eryaminkirira ngʼakoba enyonyi gyonagyona egigulukira omwibbanga ati, “Mwize mukumbaane oku mbaga enene oKibbumba egyakolere. 18 Mwize mulye emirambo gyʼabakabaka, nʼegyʼabakulu bʼamaje, nʼegyʼabaisukale, nʼegyʼembalaasi, nʼegyʼabagityaimeku, nʼegyʼabantu bonabona abagalama nʼabʼeidembe, abakulu nʼabatobato!” 19:17-18 Zek 39:17-20
19 Awo ni mbona ogusolo, nʼabakabaka bʼoku kyalo nʼamaje gaabwe nga bakumbaine okulwanisya oyo atyaime oku mbalaasi nʼamajeege. 20 Neye ogusolo ni baguwamba aamo nʼonaabbi owʼobubbeyi, oodi eyakolere ebyewunyo okulwagwo. Ebyewunyo ebyo, niibyo ebiyabbeyabbeyerangaku abantu okubateekaku eraama eyʼogusolo, kaisi basinze ekifaananyi kyagwo. Ogusolo ogwo, nʼonaabbi owʼobubbeyi bonabona ni babadyaka omu nyanza eyʼomusyo ogududumuka. 19:20 Bil 13:1-18 21 Badi abasigaire, ni babaita nʼempiima eyazwire omu munwa gwʼoyo atyaime oku mbalaasi. Enyonyi gyonagyona, ni giikuta emirambo gyabwe.