1 Olundi omu naku egyo, abantu ni bakumbaana bangi tete. Owebabbaire nga badamba ekyokulya, oYesu nʼayeta abeegibe, ni baaba egyali, nʼabakoba ati, 2 “Abantu banu bankwatisirye ekisa, olwakubba bamalire na nze enaku isatu nambirira, aate atyanu badambaku ekibalya. 3 Owembaseebula okukangayo e waabwe ngʼenzala ebaluma, bademba babbalikira omu nzira, olwakubba abamo bazwa yala.”

4 Abeegibe ni bamwiramu bati, “Omu kitundu kinu omunambula muntu, omuntu atoola yaina emigaati egyezya okuliisya abantu banu?”

5 Iye nʼababuulya ati, “Muliwo nʼemigaati mimeka!” Ni bamwiramu bati, “Musanvu.”

6 Awo nʼalagira abantu batyame ansi. Era nʼatoola emigaati omusanvu, ni yeebalya oKibbumba, nʼagivunavunamu, nʼagikwatisya abeegibe bagigabire abantu. Ni bagibagabira. 7 Babbairewo nʼobunyanyi bubiri buti. Oweyamalire okwebalya oKibbumba, bwona nʼalagira babubagabire. 8 Abantu ni balya ni baikuta. Era abeegibe ni bakumbaania ebitutundutundu ebyafiikireku, ni biizulya ebiibo musanvu. 9 Abantu babbaire ooti 4,000. 10 Awo oYesu nʼabaseebula. Era oluzwanyuma nʼaniina omu lyato nʼabeegibe, ni baaba omu kitundu ekyʼe Dalumanusa.

11 ABafalisaayo ni baaba egiri oYesu, ni batandiika okwakana naye, ni bamusaba nga bamukema, abawe akamanyiciryo akalaga kati obwezyebwe buzwa giri Kibbumba. 8:11 Mat 12:38; Luk 11:16 12 Awo nʼaica omuyeero, olwʼokulumwa omu mwoyogwe, nʼabakoba ati, “Lwaki abantu bʼomulembe gunu basaba akamanyiciryo? Mbakobera amazima nti abʼomulembe gunu mpaawo kamanyiciryo akenabawa.” 8:12 Mat 12:39; Luk 11:29

13 Awo nʼabazwaku, tete nʼaingira omu lyato ni bagimba, nʼayaba ku lubba lundi olwʼenyanza.

14 Olundi abeegi ba Yesu ni beerabira okwabaku nʼemigaati. Neye ngʼomu lyato balimu nʼomugaati gumo. 15 OYesu nʼabakoba ati, “Mulabuke, mwekuume ekizumbulukuca kyʼenjegesya yʼaBafalisaayo, nʼeya bantu ba Kerode.” 8:15 Luk 12:1

16 Ibo ni beegeyamu bati, “Atukoba atyo olwakubba tudamba migaati?”

17 OYesu oweyamanyicirye ekibakoba, nʼababuulya ati, “Inywe, lwaki mukoba muti mubula emigaati? Era paka atyanu mukaali kubona waire kumanyica? Emyoyo gyanywe gikaali mikakanyali? 18 Muli nʼamaiso, neye timubona? Nʼamatwi agemuli nago tigawulira? Era nʼokwewukirya timwewukirya? 8:18 Yer 5:21; Zek 12:2; Mak 4:12 19 Owenagabwire abantu 5,000 emigaati emitaanu, mwasolongere ebiibo bimeka ebiizwire ebitundutundu ebyafiikireku?” Ni bamwiramu bati, “Ikumi na bibiri.”

20 “Kaisi tete owenagabuliire abantu 4,000 emigaati omusanvu, mwasolongere ebiibo bimeka ebiizwire ebitundutundu ebyafiikireku?” Ni bamwiramu bati, “Ebiibo musanvu.”

21 Awo nʼababuulya ati, “Era paka atyanu mukaali okutegeera?”

22 Awo oYesu nʼabeegibe, ni batuuka e Bbesusaida. Wabbairewo abantu abaleetere omwofu egiri oYesu, ni bamwegairira amukwateku amulamye. 23 OYesu nʼakwata omwofu oku ngalo, nʼamutoola omu kabuga ako. Oweyamalire okwanda ebitanta oku maiso ga mwofu, nʼokugakwataku, nʼamubuulya ati, “Oliku nʼekyobona?”

24 Omwofu nʼabonakuumu katono kati, nʼakoba ati, “Mbona abantu abatambula, okutoolaku nti, bambonekera ooti misaale.”

25 OYesu nʼayongera okumukwata oku maiso, ni gabonera nakimo, nʼabona kusani buli kintu. 26 OYesu nʼakoba eyabbaire omwofu ati, “Oyabe e waanywe, tiwakangayo eedi omu kabuga.”* 8:26 EBiwandiike ebimo bimaliirirya biti, Tiwakoberaku omuntu ogondi yenayena omu kabuga.

27 Awo oYesu nʼayaba nʼabeegibe omu bubuga bwʼomu kitundu ekibeeta Kaisaaliya Firipo. Owebabbaire batambulatambula, nʼabuulya abeegibe ati, “Abantu owebabba bantumulaku, banjeta naani?”

28 Ni bamukobera bati, “Abamo bakweta Yokaana oMubatizi. Abandi bati mbu niiwe onaabbi Eriya, kaisi nʼabandi bakoba bati mbu niiwe omoiza oku banaabbi badi abandi.” 8:28 Mak 6:14-15; Luk 9:7-8

29 Olwo nʼababuulya ati, “Kaisi inywe munjeta naani?” Iye oPeetero nʼamwiramu ati, “Niiwe oKurisito nago oKibbumba oguyasukireku amafuta.” 8:29 Yok 6:68-69 30 OYesu nʼabasisiitira ino, ekyo tibakikoberaku omuntu kadi moiza.

31 Awo oYesu nʼatandiika okubeegesya ati, “OMwana wa Muntu, bateekwa okumugadya ino, era nʼabantu abakulu omwigwanga, nʼabakabona abakulu, nʼabakugu omu byʼaMateeka okumugaana. Era bali nʼokumwita, neye oluzwanyuma lwʼenaku isatu, yalizuukira.” 32 Ebyo yabitumuliire mu lwatu.

Awo oPeetero nʼairya oYesu oku mbale nʼamwakanisya ino. 33 Neye oYesu oweyagalukire nʼalola e nyuma, nʼabona abeegibe abandi, nʼakaawuukira oPeetero ati, “Onzwe omu maiso, oli Sitaani! Ebigendererwa bya Kibbumba tiniibyo ebyofaaku, neye ofa ku bya bantu!”

34 Awo oYesu nʼayeta ekiziima kyʼabantu, nʼabeegibe, ni kyaba egyali, nʼabakoba ati, “Buli muntu ataka okubba omusengereri wange, ali nʼokwerabira ekyali, ni yeetiika omusalabbagwe ogwa kugada olwʼobwakabaka bwa Kibbumba, era nʼansengererya. 8:34 Mat 10:38; Luk 14:27 35 Buli agezyaku okulamya obwomibwe okululwe, yalibufiirwa, neye buli afiirwa obwomibwe okulwange nʼolwʼaMawuliro aMasa, yalibulamya. 8:35 Mat 10:39; Luk 17:33; Yok 12:25

36 “Aale kirimu mugasoki omuntu okusuna obusuni bwonabwona obwa ku kyalo, neye kaisi nʼafiirwa obwomibwe? 37 Era dala mpaawo omuntu ekyayezya okuwaayo okugula obwomibwe. 38 Buli ankwatira nze era nʼebibono byange ensoni omu bantu bʼomulembe gunu abazwazwa oku Kibbumba era abakola ebibbibibbi, oMwana wa Muntu yena yalimukwatira ensoni oweyaliizira omu kitiisya kya Iteeye, ngʼali nʼabamalaika abeeru.”