1 Awo abamo oku Bafalisaayo nʼaBasedukaayo ni baaba egiri oYesu okumukema. Ni bamusaba abawe akamanyiciryo akalaga kati obwezyebwe buzwa giri Kibbumba. 16:1 Mat 12:38; Luk 11:16 2 Neye oYesu nʼabairamu ati, [“Obwire owebubba nga bwirugala, mukoba muti, ‘Bwabba busa eizo, olwakubba angulu atukuliki.’ 3 Era amakeezi pwi, mukoba muti, ‘Olwatyanu oikendi yatoonya, olwakubba angulu atukuliki, era awandi ebireri biirugazu zigi.’ Mumaite okuvuunula amakulu gʼemboneka yʼangulu, neye timwezya okuvuunula amakulu gʼebyo ebiri kubbangawo omu kiseera kinu!]* 16:2-3 EBiwandiike ebimo ebyeira bibulamu ebibono ebiri omu nyiriri ginu. 4 Abantu bʼomulembe gunu ibo abakola ebibbibibbi, era abazwazwa oku Kibbumba, ibo basaba akamanyiciryo. Neye mpaawo akenjaba okubawa, okutoolaku ako akebakoleire onaabbi Yona.” Awo nʼabazwaku ni yeeyabira. 16:4 Mat 12:39; Luk 11:29

5 Awo oYesu nʼabeegibe ni basalamu enyanza ni basomoka oku lubbba ludi, neye ngʼabeegi beerabiire okwabaku nʼemigaati. 6 OYesu nʼabakoba ati, “Mulabuke, mwekuume ekizumbulukuca kyʼenjegesya yʼaBafalisaayo nʼaBasedukaayo.” 16:6 Luk 12:1

7 Awo ibo ni beegeyamu bati, “Atukoba atyo olwakubba tituleetere emigaati.”

8 Neye oYesu oweyamanyicirye ekibakoba, nʼababuulya ati, “Inywe, lwaki mwegeyamu ni mukoba muti mubula emigaati? Nga muli nʼokwikirirya kutono! 9 Mukaali okutegeera, era timwewukirya owenagabuliire abantu 5,000 emigaati emitaanu? Kwolwo mwasolongere ebiibo bimeka ebiizwire ebitutundutundu ebyafiikireku? 16:9 Mat 14:17-21 10 Kaisi tete owenagabuliire abantu 4,000 emigaati omusanvu, mwasolongere ebiibo bimeka ebiizwire ebitundutundu ebyafiikireku? 16:10 Mat 15:34-38 11 Lwaki timutegeire muti timbaire ntumula na inywe ku migaati? Kale, aale mwekuume ekizumbulukuca kyʼenjegesya yʼaBafalisaayo nʼaBasedukaayo!”

12 Awo ni bategeera bati tabbaire abakoba kwekuuma kizumbulukuca ekibateeka omu migaati, neye kwekuuma njegesya embiibbi eyʼaBafalisaayo nʼaBasedukaayo.

13 Awo oYesu nʼayaba nʼabeegibe omu bubuga bwʼomu kitundu ekibeeta Kaisaaliya Firipo, nʼabuulya abeegibe ati, “Abantu owebabba batumula oku Mwana wa Muntu bamweta naani?”

14 Ni bamukobera bati, “Abamo bakweta Yokaana oMubatizi, abandi bati mbu niiwe onaabbi Eriya, kaisi nʼabandi bati mbu Yeremiya, ooba omoiza oku banaabbi badi abandi.” 16:14 Mat 14:1-2; Mak 6:14-15; Luk 9:7-8

15 Awo nʼababuulya ati, “Kaisi inywe munjeta naani?”

16 Iye oSimooni Peetero nʼamwiramu ati, “Niiwe oKurisito nago oKibbumba oguyasukireku amafuta, era oMwana wa Kibbumba onyere obwomi.” 16:16 Yok 6:68-69

17 OYesu nʼamukoba ati, “Simooni, omwana wa Yona, ngʼoli wʼenkabi! Ekyo kityo olwakubba amazima ago, omuntu tiniiye akumanyikisirye, neye Bbaabba aali omwigulu. 18 Kale nʼolwekyo nkukoba nti niiwe oPeetero, amakulu gaalyo nti Ibbaale. Era okwibbaale eeryo niigwo omusingi oku nalyemererya ekanisa yange. Era kadi nʼamaani agʼegeyeena tigalyezya okugiyinga. 19 Nalikuwa obwezye oku bantu bʼobwakabaka bwʼomwigulu. Era kyonakyona ekiwagaananga oku kyalo oKibbumba yena omwigulu yaabbanga akigaine, era kyonakyona ekiwaikiriryanga oku kyalo oKibbumba yena omwigulu yaabbanga aikiriirye ati kibbeewo.” 16:19 Mat 18:18; Yok 20:23

20 Awo oYesu nʼasisiitira abeegibe okutakoberaku omuntu yenayena bati, niiye oKurisito nago oKibbumba oguyasukireku amafuta.

21 Okuzwera omu kiseera ekyo, oYesu nʼatandiika okumanyikisya abeegibe ati ateekwa okwaba e Yerusaalemi. Era ati abantu abakulu omwigwanga, nʼabakabona abakulu, nʼabakugu omu byʼaMateeka ga Musa bamugadya ino, nʼokumwita, neye oluzwanyuma lwʼenaku ibiri, oku lwokusatu yalizuukira.

22 Awo oPeetero nʼairya oYesu oku mbale nʼamwakanisya ino ati, “Kadi naire, Musengwa. Ekyo tikyalikutuukaku kadi naire!”

23 Neye oYesu nʼagaluka nʼalola oku Peetero kaisi nʼamukoba ati, “Onzwe omu maiso, oli Sitaani! Oli kuntigalira okutuukirirya ekyandeetere olwakubba ebigendererwa bya Kibbumba tiniibyo ebyofaaku, neye ofa ku bya bantu!”

24 Awo oYesu nʼakoba abeegibe ati, “Buli muntu ataka okubba omusengereri wange, ali nʼokwerabira ekyali, ni yeetiika omusalabbagwe ogwa kugada olwʼobwakabaka bwa Kibbumba, era nʼansengererya. 16:24 Mat 10:38; Luk 14:27 25 Ekyo kityo olwakubba buli agezyaku okulamya obwomibwe okululwe, yalibufiirwa, neye buli afiirwa obwomibwe okulwange, yalibulamya. 16:25 Mat 10:39; Luk 17:33; Yok 12:25 26 Aale kirimu mugasoki omuntu okusuna obusuni bwonabwona obwa ku kyalo, neye kaisi nʼafiirwa obwomibwe? Era dala mpaawo omuntu ekyayezya okuwaayo okugula obwomibwe. 27 Ekyo nkitumula olwakubba oMwana wa Muntu ayaba okwizira omu kitiisya kya Iteeye, nʼabamalaikabe, era awo awe buli muntu empeeraye, ngʼasinzirira ku biibyo buli muntu ebiyakolere. 16:27 Mat 25:31; Zab 62:12; Lom 2:6 28 Mbakobera amazima nti abamo oku bantu abali aanu, tibalifa nga bakaali okubonaku oMwana wa Muntu ngʼaiza okufuga.”