11
OYesu nʼoYokaana oMubatizi
(Luk 7:18-35)
1 Awo, oYesu oweyamalire okwegesya abeegibe eikumi na babiri, nʼazwa omu kifo ekyo, nʼayaba okwegesya nʼokulaabba eeri abantu abʼomu bibuga byʼomu Galiraaya.
2 Atyanu oYokaana oMubatizi oweyabbaire omu mabbuusu nʼawulira ebintu oKurisito ebyakola, kale nʼatuma abeegibe okwaba 3 okubuulya oYesu bati, “Niiwe oKibbumba oguyasuubizire okutuma okwiza okununula abantu, ooba tukuumirire gondi?”
4 Awo oYesu nʼabairamu ati, “Mukange era mumukobere ebimuwuliire nʼebimuboine. 5 Ababbaire aboofu babona, ababbaire abaleme batambula, abagenge balama, ababbaire abamasiipe bawulira, abafu bazuukira, nʼabadoobi bona basuna enkabi gyʼokuwulira aMawuliro aMasa. 11:5 Isa 35:5-6; 61:1 6 Ali nʼenkabi omuntu oyo atambuusabuusamu.”
7 Abakwenda ba Yokaana owebabbaire nga bazwawo, oYesu nʼatandiika okubuulya ekiziima kyʼabantu ebikwata oku Yokaana ati, “Owemwabire egiri oYokaana omu kitera, mwasuubiire kubona muntu afaanana atya? Mwamwajiirye ngʼomuntu omugondi ooti lugada olutengeeta nabuli ompunga owaafuwa? 8 Ooba nga tikiikyo, mwasuubiire kubona muntu afaanana atya? Muntu azwaire ebizwalo ebyebbeeyi? Kadi tiyabbaire atyo, olwakubba abazwala ebizwalo ebyebbeeyi babba mu bisito bya bakabaka. 9 Aale kale mwabire okubona oYokaana olwakubba yabbaire naabbi? Ekinanyerenyeere nabakobera nʼokubakobera nti yabbaire akiraku okubba naabbi. 10 OYokaana oyo, niiye eBiwandiike ogubitumulaku biti:
‘Aale obone, ntuma omukwenda wange
akwekubbembere, okukwewulirya enzira egyoyaba.’ ” 11:10 Mal 3:1
11 Era ni yeeyongera ati, “Mbakobera amazima nti, kasookeede abantu babba oku kyalo kunu mpaawo muntu akira oYokaana ekitiisya. Neye Iye oKibbumba abala oyo amusemberya omu bwomibwe, waire nga niiye abantu ogubanyooma omu bwakabaka bwʼomwigulu, okubba akira oYokaana oyo ekitiisya ekyalimu. 12 Era okuzwa omu kiseera oYokaana oMubatizi oweyatandiikiire okulaabba paka atyanu, obwakabaka bwʼomwigulu babulwanisya nʼamaani, era abantu baazya nʼamaani okubwingiramu. 13 Ekyo kityo olwakubba abanaabbi bonabona nʼaMateeka ga Musa balagwire oku bwakabaka bwʼomwigulu paka oYokaana oweyatandiikire okulaabba. 11:12-13 Luk 16:16 14 Era owoobbanga otaka okwikirirya ekyo, oYokaana niiye onaabbi oguyatumwireku oweyakobere ati, ‘Eyaliiza ali ooti Eriya.’ 11:14 Mal 4:5; Mat 17:10-13; Mak 9:11-13 15 Aale omuntu aliku amatwi agawulira, awulisisye era ategeere ekintumula.”
16 OYesu nʼayongera okukoba ababbaire bamuwulisisya ati, “Abantu abʼomulembe gunu nʼabagerya kuuki? Bafaanana ooti baana abatobato, abazeenya omuzeenyo omu kisaawe abantu okubabona. Batyo nga beezulugumira abanaabwe bati:
17 ‘Twabafuwiire emirere omu wembo obusa,
neye nandi mubina;
kale ni twemba enyembo gyʼenima neye nandi mukunga.’
18 “Ekyo kityo olwakubba oYokaana oMubatizi yabbaire talya ebyokulya ebya buliijo waire kunywa nviinyo, mwakobere muti, ‘Aliku omuzimu!’ 19 Tete zena oMwana wa Muntu ndya ebyokulya era nnywa enviinyo era munkoba muti, ‘Omuntu oyo wa gukobbo, era muteemeere, kaisi mukaagwa wa basolooji ba musolo nʼabakola ebibbibibbi.’ Neye abantu abo bonabona abakolera oku malabuki ga Kibbumba, bakakasa bati matuuce.”
Okulabula abantu olwʼokuteenenya
(Luk 10:13-15)
20 Awo oYesu nʼatandiika okunenya abantu bʼomu bibuga ebiyakoleiremu ebyewunyo ebikira obungi, olwakubba abo tibeenenyere. 21 Awo nʼakoba ati, “Wobe! Ala inywe abantu abʼomu kibuga ekyʼe Kolaziini nʼekyʼe Bbesusaida nga mulabire! Kiri kityo olwakubba ebyewunyo ebibakolere mwinywe singa babbaire babikolere mu kibuga ekyʼe Tiiro nʼekyʼomu Sidoni, abantu baayo nga beenenyere era ni bazwala nʼebikotiya, nʼokwepuuda eikoke okulagisya bati beenenyere. 11:21 Isa 23:1-18; Zek 26:1–28:26; Yow 3:4-8; Amo 1:9-10; Zak 9:2-4 22 Neye mbakobera nti oku lunaku olwʼokusaliraku emisango, abantu bʼomu Tiiro nʼomu Sidoni balisuna ekibonerezo ekiri gwai gwai oku kyanywe. 23 Kaisi oolwo inywe abantu bʼe Kaperenawumu, inywe niinywe abebaligulumalya okutuuka omwigulu? Ala kadi, era oKibbumba ayaba kubasindika mu geyeena. Ekyo kityo olwakubba ebyewunyo eira ebibakolere mwinywe, singa babbaire babikolere mu kibuga Sodoma, ekibuga ekyo kyandibbaire kikaali kiriwo paka nʼatyanu. 11:23 Isa 14:13-15; Nta 19:24-28 24 Neye mbakobera nti oku lunaku olwʼokusaliraku emisango, abantu bʼomu Sodoma balisuna ekibonerezo ekiri gwai gwai oku kyanywe.” 11:24 Mat 10:15; Luk 10:12
Mwize egyendi era musune ekiwuumulo
(Luk 10:21-22)
25 Awo omu kiseera ekyo oYesu nʼakoba ati, “Nkuwuuja, Bbaabba, iwe oMusengwa afuga eigulu nʼoku kyalo, olwakubba amazima ganu wagabisire abalabuki nʼabategeera, kaisi nʼogamanyikisya bantu ababula ekibamaite ooti baana abatobato. 26 Niikyo ekyo Bbaabba olwakubba okwo kwabbaire kutakakwo.”
27 Awo nʼakoba abantu ati, “OBbaabba yampaire obwezye oku bintu byonabyona. Era nze ngʼoMwana mpaawo ammaite okutoolaku oBbaabba. Era mpaawo amaite oBbaabba okutoolaku nze oMwana, nʼomuntu oyo iye ogumba nnondere nti amanye oBbaabba.” 11:27 Yok 3:35; 1:18; 10:15
28 Kale oYesu ni yeeyongera okukoba abantu ati, “Mwize egyendi nywenanywena abali nʼebibakaluubirira, nze nabawa ekiwuumulo. 29 Inywe abananyere mugondere enjegesya yange,* 11:29 EBbaibbuli egimo gikoba giti, Inywe abanyere mwetiike ekijooko kyange. era mwegere ku ninze, olwakubba ndi wʼeiwooyo era ndi muwombeeki. Era mwasuna ekiwuumulo kyʼemyoyo gyanywe. 11:29 Yer 6:16 30 Ekyo kityo olwakubba engeri eginabekubbemberamu iyo nyangu, nʼebiragiro byange tibigosi.”
11:5 11:5 Isa 35:5-6; 61:1
11:10 11:10 Mal 3:1
11:13 11:12-13 Luk 16:16
11:14 11:14 Mal 4:5; Mat 17:10-13; Mak 9:11-13
11:21 11:21 Isa 23:1-18; Zek 26:1–28:26; Yow 3:4-8; Amo 1:9-10; Zak 9:2-4
11:23 11:23 Isa 14:13-15; Nta 19:24-28
11:24 11:24 Mat 10:15; Luk 10:12
11:27 11:27 Yok 3:35; 1:18; 10:15
*11:29 11:29 EBbaibbuli egimo gikoba giti, Inywe abanyere mwetiike ekijooko kyange.
11:29 11:29 Yer 6:16