1 Lwabbaire lumo oYesu nʼakoba abeegibe ati, “Ebintu ebigira abantu ni bakola ekibbikibbi tibyakayenge okubbaawo, neye, wobe! Nga yalaba oyo iye abireeta! 2 Ekikiraku, omuntu oyo kumusiba ibbaale erizito omu mamiro, ni bamudyaka omu nyanza, okukiraku owaazweraku omoiza oku batobato abo abanjikiririryamu okukola ekibbikibbi. 3 Kale mwekuume.

“Singa omugandawo owakukola ekibbikibbi, omulabule era oweyeenenya, omusoniye. 17:3 Mat 18:15 4 Singa owakukola ekibbikibbi emirundi musanvu omu lunaku, kaisi buli mulundi ngʼaiza egyoli okwenenya, omusoniyenge.”

5 Awo abatume ni bakoba oMusengwa oYesu bati, “Otwongereku okwikirirya.”

6 Iye nʼabairamu ati, “Singa mubba nʼokwikirirya okutyai ooti kansigo aka kalidaali, mubba mwezya okukoba omusaale omunene ngʼomusikamooli gunu muti, ‘Weiye oyabe weekome omu nyanza,’ era ni gubawulira.”

7 Awo oYesu tete nʼabakoba ati, “Singa omoiza kwinywe abba nʼomugalamawe amulimira ooba amuliisirya entaama, omuntu oyo ayezya okukoba omugalamawe eyankainuka ati, ‘Aale atyanu oize otyame olye?’ 8 Taira kumukoba-bukobi ati, ‘Ontegekere ekyokulya, kaisi weetegeke okubbaawo ngʼomusimaami okumpeererya nga ndya, oluzwanyuma kaisi wena olye?’ 9 Ayezya okwebalya omugalama oyo olwakubba akolere ebibamukobere? 10 Kale nywena, owemubbanga mumalire okukola ebyo byonabyona ebibabakobere okukola, mukobanga muti, ‘Iswe tuli bagalama, titusaanira okutusiima, olwakubba tukolere biibyo ebitubbaire tuli nʼokukola.’ ”

11 Olwatuukire, oYesu oweyabbaire ngʼayaba e Yerusaalemi, nʼabita akati oku nsalo yʼeitwale lyʼe Samaaliya nʼeryʼe Galiraaya. 12 Kale oweyabbaire ngʼaingira omu kimo oku bitundu byayo, abagenge ikumi ni baiza okumusangaana. Era ni beemerera yalaku naye 13 kaisi ni bamukoba maaminkirira bati, “Yesu oMusengwa, otukwatire ekisa!”

14 Awo oweyababoine, nʼabakoba ati, “Aale mwabe mweyanjule eeri abakabona.” 17:14 Lee 14:2-32 Kale owebabbaire baaba, ni balama.

15 Neye omoiza kwibo, iye oweyaboine ngʼalamire, nʼakanga egiri oYesu ngʼawuuja oKibbumba nʼeigono eryʼamaani. 16 Oweyatuukire nʼakotamya omutwe ansi ngʼakomere amazwi okumpi nʼebigere bya Yesu, ngʼamwebalya. Era omusaiza oyo nago yabbaire Musamaaliya.

17 Awo oYesu nʼabuulya ati, “Abalamire tibabbaire ikumi? Kaisi omwenda bali yaina? 18 Mpaawo ogondi airire okuwuuja oKibbumba okutoolaku onu atali Muyudaaya?” 19 Awo oYesu nʼamukoba ati, “Osetuke weeyabire; okwikiriryakwo kukulamirye.”

20 Lumo, aBafalisaayo babwirye oYesu bati, “Obwakabaka bwa Kibbumba bwalibbaawo di?” Iye nʼabairamu ati, “Obwakabaka bwa Kibbumba nga bwiza tibuboneka. 21 Era abantu tibalikoba bati, ‘Buli yaanu,’ ooba bati, ‘Buli yaadi,’ olwakubba obwakabaka bwa Kibbumba buli mu myoyo gyanywe.”

22 Awo nʼakoba abeegibe ati, “Ekiseera kyalituuka ni mwegomba okubonaku oMwana wa Muntu waire lunaku lumo, neye nga tikyezyeka. 23 Kale walibbaawo abalibakoba bati, ‘Ngodi yaadi!’ Ooba bati, ‘Ngonu yaanu!’ Neye inywe timwabangayo, era timubasengereryanga. 24 Ekyo kityo olwakubba, oMwana wa Muntu oweyalibba aira, yalibba ooti kumesya kwa ikendi okumolekera oku lubba olumo olwʼangulu omwibbanga, era ni kuboneca paka oku lubba ludi olundi. 25 Neye ateekwa kaisi okusooka okukaanya ebintu bingi era nʼabantu bʼomulembe gunu okumwegaana.

26 “Era kityo nakimo ngʼowekyabbaire oku mulembe gwa Nuwa, era niiye owekyalibba nʼomu kwira kwʼoMwana wa Muntu. 17:26 Nta 6:5-8 27 Amataba nga gakaali okubbaawo abantu babbaire nga balya, era nga banywa, era nga bafumbirwa paka oku lunaku oNuwa oluyaingiriire omu lyato. Neye oluzwanyuma amataba gaizire era ni gajigirica abantu bonabona.

28 “Era kyabbaire kityo nʼoku mulembe gwa Luuti. Abantu babbaire nga balya era nga banywa, nga bagula era nga batunda, nga balima era nga bombeka. 29 Neye oku lunaku oLuuti oluyazwereire omu kibuga kyʼe Sodoma, omusyo nʼobuganga bwa mabbaale byagwire okuzwa omwigulu, ni bijigirica abantu bonabona omu kibuga ekyo. 17:28-29 Nta 18:20–19:25

30 “Era kyalibbeera nakimo kityo oku lunaku oMwana wa Muntu oluyaliiriraku. 31 Oku lunaku oolwo, omuntu eyalibba e ngulu oku nyumbaye, kaisi ngʼebintubye biri munda, tamalanga ekiseera okwingira okubitoolamu. Era nʼomu ngeri enanyere eyo, eyalibba omu musiri yena atyo, tamalanga ekiseera okukanga e ika okusyoma ekintu kyonakyona. 17:31 Mat 24:17-18; Mak 13:15-16 32 Aale mwewukirye ekyatuukire oku muka Luuti! 17:32 Nta 19:26 33 Kale buli agezyaku okulamya obwomibwe okululwe, yalibufiirwa, neye buli afiirwa obwomibwe okulwange, yalibulamya. 17:33 Mat 10:39; 16:25; Mak 8:35; Luk 9:24; Yok 12:25 34 Mbakobera nti omu kiire nago ekyo, abalibba ababiri oku kitaliri ekimo, omoiza balimutwala, kaisi iye ogondi ni bamuleka. 35 Abakali ababiri abalibba aamo nga basya, omoiza balimutwala, kaisi iye ogondi ni bamuleka. [ 36 Babiri abalibba omu musiri, omoiza balimutwala, kaisi iye ogondi ni bamuleka].”* 17:36 EBiwandiike ebimo ebyeira bibulamu olunyiriri lunu.

37 Awo abeegibe ni bamubuulya bati, “Musengwa, ebyo byalibba yaina?” Nʼabairamu ati, “Iwo awo awabba eisaaye, niiwo ensega egyegikumbaanira.”