1 Ebyo owebyawoire, oMusengwa oYesu nʼalonda abeegi abandi 72,* 10:1 72. EBiwandiike ebimo ebyeira bikoba biti, 70. kaisi nʼabatuma babiri babiri ibo beesooke mu buli kibuga nʼomu buli kifo iye egiyabbaire yatira okwabamu. 2 Era nʼabakoba ati, “Ebyokukungula bingi, neye abatambi niibo abatono. Kale musabe onyere akola oku byokukungula, ayongere okusindika abatambi abandi omu musirigwe. 10:2 Mat 9:37-38 3 Aale atyanu mwabe, neye mwekuume olwakubba mbatuma nga muli ooti ntaama entonto akati omu misege, ibyo ebisolo ebya kabenje. 10:3 Mat 10:16 4 Timwaba nʼomugoba ogubateekamu empiiya, newankubbaire ekisawo ngʼekyʼomuntu aali omu lugendo, newankubbaire kadi peeya yʼengaito eyokubiri. Era timugayaliranga omu nzira nga musugirya bantu. 5 Buli nyumba egimwaingirangamu, mwekererenge kukoba muti, ‘Eidembe libbe nʼabantu abʼomu nyumba eenu.’ 6 Singa yalibbaamu omuntu awoomera okusuna eidembe, iryo eeryo erimumutakirya lyalisigala naye. Era singa timwalibbaamu omuntu alisaanira, eidembe eeryo lyalibairira. 7 Omu nyumba eyo nago, niimwo egimubba muzwerenge amantasengukasenguka. Mulyenge era munywenge ebibabawanga oomwo olwakubba omutambi awoomera empeeraye.” 10:7 1Ko 9:14; 1Te 5:18

8 “Owemwaingiranga omu kibuga ni babasangaalira, mulyenge ebyokulya ebibabainulanga. 9 Era mulamyenge nʼabalwaire abali omu kibuga ekyo nago, nʼokukoba abantu baamu bonabona muti, ‘Obwakabaka bwa Kibbumba bubaigerereire.’ 10 Neye owemwaingiranga omu kibuga ni batabasangaalira, mwemereranga omu nguudo gyaco ni mukoba muti, 11 ‘Nʼenkungu egyʼomu kibuga kyanywe egibbaire gitukwaite oku bigere giinu tugyekunkumulyaku okulagisya nga muliku omusango. Era mumanye kinu muti obwakabaka bwa Kibbumba bwigereire.’ 10:10-11 Bik 13:51 10:4-11 Mat 10:7-14; Mak 6:7-11; Luk 9:3-5 12 Mbakobera nti oku lunaku olwʼokusaliraku emisango, abantu bʼomu kibuga kyʼe Sodoma balibasalira ekibonerezo ekiri gwai gwai okukiraku ekyo ekibaliwa abantu abo abagaananga okubasangaalira. 10:12 Nta 19:24-28; Mat 10:15; 11:24

13 “Wobe! Ala inywe abantu bʼomu kibuga kyʼe Kolaziini nʼekyʼe Bbesusaida nga mulabire! Kiri kityo olwakubba ebyewunyo ebibakolere mwinywe singa babbaire babikolere mu kibuga kyʼe Tiiro nʼekyʼomu Sidoni, abantu baayo nga beenenyere era ni bazwala nʼebikotiya, nʼokwepuuda eikoke okulagisya bati beenenyere. 10:13 Isa 23:1-18; Zek 26:1–28:26; Yow 3:4-8; Amo 1:9-10; Zak 9:2-4 14 Neye oku lunaku olwʼokusaliraku emisango, abantu bʼomu Tiiro nʼomu Sidoni balisuna ekibonerezo ekiri gwai gwai oku kyanywe. 15 Kaisi oolwo inywe abantu bʼe Kaperenawumu, niinywe abebaligulumalya okutuuka omwigulu? Ala kadi, era oKibbumba ayaba kubasindika mu geyeena.” 10:15 Isa 14:13-15

16 Awo nʼakoba abeegibe ati, “Abo ibo abawulisisyanga ebimwegesya, baabbanga bawulisisirye ninze. Era abo ibo ababatalanga, baabbanga batalire ninze. Kaisi abo ibo abantalanga, baabbanga batalire Kibbumba oyo iye eyantumire.” 10:16 Mat 10:40; Mak 9:37; Luk 9:48; Yok 13:20

17 Awo abeegi ba Yesu badi 72 ni bakanga egiri oYesu nʼeisangaalo era ni bakoba bati, “Musengwa, omu liinalyo, nʼemizimu gyona gyatubuliranga!”

18 Neye Iye oYesu nʼabakoba ati, “Naboine oSitaani ngʼagwa okuzwa omwigulu nʼokumesya ooti kumesya kwa ikendi. 19 Era kagira mbawaire obwezye okuwangula amaani gʼobulabe bwa buli kika, era waire ewaabbangawo okwema oku mpiri nʼoku biwuuka ebyasaagwa, era mpaawo akabbikabbi akabatuukangaku. 10:19 Zab 91:13 20 Neye timwajaagaana lwʼemizimu kubawulira kyonkani, wazira mujaagaane olwakubba amaliina gaanywe mawandiikisye omwigulu.”

21 Awo omu kiseera ekinyere ekyo, oMwoyo oMweru nʼaizulya oYesu eisangaalo, era oYesu nʼakoba ati, “Nkuwuuja, Bbaabba, iwe oMusengwa afuga eigulu nʼoku kyalo, olwakubba amazima ganu wagabisire abalabuki nʼabategeera, kaisi nʼogamanyikisya bantu ababula ekibamaite ooti baana abatobato. Niikyo ekyo Bbaabba olwakubba ikyo ekyo kwabbaire kutakakwo.

22 “OBbaabba yampaire obwezye oku bintu byonabyona. Era nze ngʼoMwana mpaawo ammaite okutoolaku oBbaabba. Era mpaawo amaite oBbaabba okutoolaku nze oMwana, nʼomuntu oyo iye ogumbannondere nti amanye oBbaabba.” 10:22 Yok 3:35; 10:15

23 Awo oYesu nʼaira oku beegibe nga basigaire bonkani, kaisi nʼakoba ati, “Muli bʼenkabi okubona binu ebimubona! 24 Ekyo kityo olwakubba mbakobera nti abanaabbi bangi nʼabakabaka beegombere okubona ebimubona, ni batabibona, nʼokuwulira ebimuwulira ni batabiwulira!”

25 Kale awo, omukugu omu byʼaMateeka ga Musa nʼasetuka omu lukumbaana okugezesya oYesu nʼekibuulyo ati, “Musomesya, niki ekinakola okusuna obwomi obutawaawo?” 26 Awo oYesu nʼamwiramu ati, “Amateeka ga Musa gakoba gatya? Ogasoma otya?” 27 Iye omusaiza nʼairamu ati, “Otakenge oMusengwa oKibbumbawo nʼomwoyogwo gwonagwona, nʼobwomibwo bwonabwona, nʼamaanigo gonagona, nʼebiseegobyo byonabyona. Era otakenge omuntu omwinawo, ngʼoweweetaka iwe onyere.” 10:27 Lee 19:18; Ama 6:5 28 Iye oYesu nʼamukoba ati, “Oiriremu kusani. Okolenge otyo, era walisuna obwomi obutawaawo.” 10:25-28 Mat 22:35-40; Mak 12:28-34 10:28 Lee 18:5 29 Neye omukugu omu byʼaMateeka ga Musa olwʼokutaka okulaga ati ekyabwirye kibbaire kyamakulu, era tete nʼabuulya oYesu ati, “Omuntu omunange oyo, niiye aliina?”

30 OYesu leero nʼairamu mulugero ati, “Wabbairewo omusaiza eyabbaire azwa e Yerusaalemi, ngʼaserengeta okwaba e Yeriko, kaisi nʼagwa omu batemo. Kale ni bamukubba, ni bamwambulya, era ni bamutoolaku nʼebintu ebindi ebiyabbaire nabyo, kaisi ni bamulekaawo oku luguudo ngʼabulaku katono kati okufa. 31 Kale ni wabbaawo okabona, era yena eyabbaire abita omu nzira enanyere eyo, neye oweyamuboine yakikimitire ku mbale kumwebitiraku. 32 Era nʼoMuleevi yena yakolere kinyere ekyo atyo olwakubba yena oweyatuukire omu kifo ekyo nʼamubona, era yena yakikimitire ku mbale kumwebitiraku. 33 Neye iye oMusamaaliya oweyabbaire oku lugendolwe, era nʼatuuka omukubbe oyo egiyabbaire kaisi nʼamubona, yamukwatiire ekisa. 34 Kale awo nʼamwigereraku, nʼamusuka obulezi omu biso, era nʼabisibaku ebiwero. Oluzwanyuma nʼamuteeka oku mpundawe iye oMusamaaliya oguyabbaire atambuliraku, era nʼamutwala omu nyumba yʼabantu abali omu nŋendo egibapangisyanga ni yeeyongera okumujanjabya. 10:33-34 2Mi 28:15 35 Oku lunaku olwairireku, nʼatoola edinaali 10:35 7:41 ibiri, nʼagiwa onyere enyumba ya bageni eyo, era nʼamukoba ati, ‘Omujanjabe. Empiiya gyonagyona egiwalikolesya nga gibitawo mu ginu, nalikusasula amaira.’

36 “Naani kwabo abasatu, ogwoseega oti niiye yabbaire omwinaye wʼoodi eyagwire omu batemo?” 37 Omukugu omu bya Mateeka ga Musa nʼairamu ati, “Oodi eyamukwatiire ekisa.” Kale awo oYesu yena nʼamukoba ati, “Wena aale atyanu oyabe okolenge otyo.”

38 Awo oYesu nʼabeegibe owebabbaire omu lugendo, nga baaba e Yerusaalemi, oYesu nʼatuuka omu kitundu omwabbairemu omukali eriinalye bati Maliza, kale nʼamucaaza omu nyumbaye. 39 OMaliza yabbaire nʼomugandawe ogubeetanga bati Malyamu. OMalyamu oyo iye nʼatyamira nakimo kumpi nʼebigere bya Musengwa, nga waawulisisya ekibonokye. 10:38-39 Yok 11:1 40 Neye oMaliza iye yabbaire mu miziringitano gyʼokutegeka kyokulya. Kale oMaliza oluzwanyuma nʼayaba nʼabuulya oYesu ati, “Musengwa, iwe tofaayo ngʼomuganda wange andekeire emirimo zenkani? Aale kaade omukobeku aize ambeereku.” 41 OMusengwa oYesu nʼamwiramu ati, “Maliza, Maliza, weeraliikiriire era oli kutegana nʼebintu bingi ebitagasa, 42 neye kaisi ngʼekyetaagisya eino kiri kimo kyonkani. OMalyamu iye kiikyo ekyʼalonderewo nga nago niikyo ekikiraku obusa era ekibatalimutoolaku kadi.”